Si visàiso ce bielis sagris une volte a Buje? E nò nome chê di Sant Ramacul, ma ancje la sagre de trute, la fieste di primevere, e dutis chês altris sagris di Madone, di Vile, di Urbignà, di Tombe, di Ursinins Grant, di Colosoman...

E cumò? 'E uèlin dî che Buje cumò no je plui chê di une volte. Che, dopo il taramot, a Buje duc' pense par sé, che nissun al à vôe di spindi timp e bêz par chei altris... Ch'al pensi il Cumun aes fiestis, che lôr 'e àn altri ce pensâ.

— E, invezit, no je vêre! — 'e àn dit chei di Ursinins Pizzul.

Buje 'e sarà magari un fregul gambiade te sô muse difûr, ma la muse dentri 'e je simpri chê. Il taramot nol à sdrumade l'anime dal nestri paîs. No disevino, une volte: Buje pore nuje?! Cà si cjate ancjemò int disponude a spindi timp e bêz par chei altris, ven a staj pal ben di duc', pal paîs, pe nestre 'zoventût, in conclusion pe nestre culture. Parceche si trate propit di culture, che no je une robe di savê, ma un mût di vivi insieme. E ancje Buje 'e à une sô microculture di no piardi, un so mût di vivi e di vivi insieme tune rêt di rapuarz, nò nome di parentât e di afârs, ma ancje di sintimenz, di ideâi, di tradizions, di compuartamenz... e, parcé nò, ancje di sagris!

— Nô, intant, 'o tornìn a fâ la sagre di Sant Josef— 'e àn dit chei di Ursinins Pizzul.

Nol impuarte se no son plui la corse dai sacs, la gare des pignatis o il pâl dal agnel. Chel ch'al impuarte al é che la int 'e torni a stâ insieme a cjantâ, a sunâ, a mateâ, a ridi... magari ancje a rasonâ, tra un tai e chel altri... Intant che la campanele de glesie di Sant Josef 'e scampanote ancjemò come une volte cul so banducel parsore il borc.