"Buje pore nuje" nol ere altri che un sproc, une detule, une sentenzie antighe, un mot popolâr (magari un fregul maliziôs) par definî la int di Buje. Ma dal 1982 al è deventât ancje il titul di une riviste anuâl ch'e ven fûr a Buje puntuâl pe fieste di Sant Josef. Le àn volude Chei di Ursinins Pizzul in chel an che ur è vignude l'idee di tornâ a fâ in grant la lôr sagre di borc. Il prin numar al è vignut fur quasi par scomesse. Ce si podevial fâ par tirâ su une sagre che no fos nome par "smenteâ" ma ancje par "pensâ", no nome par divertîsi ma ancje par imparâ? In altris peraulis, ce si podevial inventâ par fâ un pocje di "culture" popolâr profitant de sagre?

In chei ains lis feridis dal taramot 'e èrin ancjmò viertis, la ricostruzion 'e ère ben impastanade ma al ère grant il pericul di pierdi la proprie identitât di paîs e di popul, la proprie muse culturâl. Bisugnave, duncje, salvâ la culture furlane de nestre int. "Fâ culture" in chel moment al oleve dî prin di dut "salvâ la culture"! Il vecjo sproc al è deventât alore une bandiere, un program: Buje 'e à di vivi, 'e à di cressi, 'e à di lâ indenant, cence pore di nuje! E ce miôr di un gjornâl par difindi e difondi cheste volontât di coerence cu la storie e di rinassite?

Cussì al è nassut il prin numar di "Buje pore nuje! Numar unic" al è scrit tal sottitul. Ma l'an dopo Chei di Ursinins Pizzul lu àn tornât a meti in program; e cussì vie... par altris dîs ains! Dîs numars chest an, 430 pagjnis, 146 articui. Passe cinquante colaboradôrs, une trentine dal paîs e plui di vinc' foresc'. Des 18 pagjnutis dal prin numar si è passâz aes 80 passe di chest an. Sfueant cumò chês quatricent pagjnis al pâr di ripassâ i ultins dîs ains de nestre storie locâl. 'E tòrnin denant di nô lis imagjnis dramatichis dal taramot, i problems, lis discussions su la ricostruzion. Ma ancje lis realizazions, lis fiestis par screâ la place o il domo di San Scjefin resurît... E po tantis pagjnis par furlan e par talian di storie, di leterature, di art, di lavôr, di vite... de int di Buje. Ce tante vitalitât ch'al à vut e ch'al à chest paîs! Al è ben che duc' indivèdin cussience e braure. Par chel si stampe ogni an "Buje pore nuje!"