Cjalant, miôr sares dî amirant, chê sorte di "enciclopedie de bujesitât" ch'al à metût dongje su DVD par compiuter Celso Moschetin, cul aiût di Egjdio Bolzon, 'e salte ai vôi le schirie di personaz che di continuo, tai àins passâz, e son vignûz fûr tal nestri paîs. No si riferìn a figures straordenaries des artz o de culture, ma semplicementri a dute chê int ch'e veve une personalitât particolâr, che saveve meti in public idees e capacitâz uniches, mûz di fâ e di sei che èrin dome lôr.

Cumò,... e simpri di pui, chestes diviersitâz e stan sparint, e le societât, forse pui siore di bêz ma no di curviêi, no cjate spazis pes particolaritâz; 'j sin duc' un pôc sburtâz a sei compagns, a seguî les modes, a pensâle pui o mancul tal stes mût.

El timp al passe e el mont al cambie: 'e jè une lec di vite mai cambiade tai secui. Chesc' àins in tanc' 'e an metût in risalt, come cambiament dai pui significatîfs, le premure, le buride, cu le quâl si è ridoz a vivî in dì di vuê. Ch'al sedi chest un dai motîfs dal cambiament soredìt al è evident.

Sicheduncje, sares ben che ognidun al cjatàs, almancul ogni tant, le voe di fermâsi: par pensâ di pui, par rivâ a dedicâsi alc di pui ae famee, ai amîs e ae vite sociâl,... par sei pui se stes: par sei aplen persones e vadì ancje personagjos.