Buje tai ultins ains si è insiorade di un'opare d'art di un cert livel, ma che no à vût ancjmò une proporzionade atenzion de bande dai studiôs locai (ancje parceche no je stade fin cumò publicade in nissune riviste sientifìche).

'O feveli di chel quadri a ueli ch'ai è stât metût te gnove glesie di Vile, il dì de so consacrazion, come don dal pape 'Zuan Pauli II, il 21 di novembar dal 1979. Al pape j al veve regalât il Fogolâr Furlan di Rome tal trenotesin aniversari de so fondazion, e 'Zuan Pauli II al à volût ch'ai fos destinât ae prime glesie ricostruide in Friûl dopo il taramot dal '76. "È il mio dono perché il Friuli rinasca": al à fat scrivi il pape su la targhe fìrmade dal Va-tican il 27 di otobar dal 1979. Cussi chê glesie, 'za famose pes sôs sculturis modernis de Via Crucis, cumò 'e à un'altre preziose bilisie d'art di mostra ai soi visitators.

La piture 'e rapresente in alt la Madone Imacolade tal miez dai agnui e dai nui, in bas inzenoglât San Luigi e un agnulut ch'al ten sù un libri viert dai "Santi Padri", come ch'e si lei; sul fond 'e compàrin architeturis classichis.

L'opare, che une volte si cjatave a sei te glesie de SS. Trinitât in vie Condotti a Rome, 'e jè atribuide ae buteghe romane dal pitôr Carlo Maratta (1625-1713). In realtât, lis carataristichis estetichis di chest quadri 'e rispuindin al orizont artistic di chest pitôr, ch'ai è un dai protagonisc' de prime reazion classicistiche cuintri la degjenerazion dal rococò tra '6 e '700 a Rome.
Marchigjan di nassite, intropât te scuele ecletiche dai Caracci, il Maratta al lavora te Rome dal tart Sîscent, favoride dal mecenatisin dai papis e dal esempli di granc' mestris cunvignûz di ogni bande d'Italie e d'Europe. Ben piane al quiste un so stil personâl, ch'ai va progressivamentri liberansi des manieris pomposis e sensuâls dal rococò, dai colôrs disfazzâz e ingussîz de arcadie, par bonâsi tun quilibri sapient di formis e di colôrs e di sintimenz.

'E je cheste la strade dal gnûf classicisin che de so sede naturâi, come ch'e je simpri stade Rome, al veve in curt di slargjâsi in dute la republiche artistiche di Soreliamont.