come une prime a teatri

Sabide sere ai 15 di Setembar dal 2007 inte glesie di Vile,  plui di dusinte persones – sentades tra i bancs e les cjadreis, (se a jerin rivades ben ben adore), o ancje in pîts – a jerin alì e, in spiete dal vierzisi de serade, si contavin, a fasevin previsions, si spiavin robes sintudes a dî...:  “Ben ben, ce fature di lavôr, eh... e ce inzen!. Tant a àn fat che a son rivâts insom!.  Ah!, jo no sai nuie!, usgnot o soi vignût juste a sintî, a viodi chest imprest: ma coventavial, sì?, no vevino avonde di chel altri?... Cuissà ce tant content e braurôs che al sarès stât Pre Saverio!, cuissà che nus viodi di là sù!...  E Pre Felice, ce disial? Che al sedi sodisfat di cheste opare creade di sane plante inte sô glesie?  Ma sì che mi pâr che al jere stât propit lui...

Tal scoltâ dut chel cisicâ, chês vôs une parsore di chê altre, al pareve cuasi di podê sfreolâ tra i dêts chel ferment, chê brame di constatâ cun voli critic, e chê curiositât tipiche di un public che in teatri al spiete il vierzisi dal sipari pe presentazion di un event, come par esempli le “Prime ” di une grande opare musicâl o teatrâl.

Chê dal 15 di Setembar stât, in efiets – cu le scree uficiâl dal organo gnûf, batiât inte Parochie di Vile cul prin di une serie di cinc concierts – e je stade pardabon une “Prime”, spietade e gjoldude e che par sigûr e à emozionât il public presint par dute une serie di resons: l’organo stes, in primis, e le storie che i stâ daûr. E je cheste di fat une storie avonde origjinâl,  che e conte di disinis di persones, di miârs di ores di lavôr pazient, di disinis di miârs di tocs piçui e grancj che insieme a àn metût adun un strument, un organo gnûf, tirât sù dal nuie, fat dut in cjase, in parochie. Une storie che e je stade une vere imprese, che si pues dî che Ermanno Taboga, parochian di Vile, in pratiche al è lât a cirîse dut di bessôl!, cjapantsi le brighe di metisi a costruî chel strument e di coordenâ dute chê sorte di progjet.

 

lu vevin za let l’an passât, su chê riviste...

Se al pues jessi vêr che, in chê sabide di metât Setembar, tra chel fevelâ de int, cualchidun al pues vê ancje dite: – “par jessi onest jo no ai seguît plui di tant, ma mi pâr che di chest progjet o vevi let cualchi alc, l’an passât, su chê riviste… chê di Buie, po!, sì, su... “Buie pôre nuie”!! ... ... – al è ancje vêr che chest an, simpri su cheste nestre publicazion, nus par just di contâus i disvilups di cheste storie e zontâ ce che no si podeve ancjemò scrivi in chel prin toc, ven a dî ce che al è vignût indenant dilunc di chest an 2007 pene sierât. Lu fasìn parcè che o crodìn che les stories al sedi just di contâles dal inizi fintremai “ae fin”, cun tancj detais e particolârs, zontant ancje les emozions e les sodisfazions che, se pûr in cuintritindince cun altris gjenars di sodisfazions dal dì di vuê, a nô nus pâr che al sedi simpri biel e impuartant di condividiles!

 

“tra sium o matetât”, si scriveve...

Al inizi al someave dome un sium o une matetât... Cussì al diseve e al scriveve il stes Ermanno Taboga, autôr dal progjet de costruzion dal organo e di chel prin toc, scrit sul finî dal 2006 pe edizion di “Buie pôre nuie” 2007, e titulât  “Il nuovo organo di Avilla: una realtà in bilico tra sogno e follia”.

Buiês di nassite e di citadinance, eletronic di studis e di profession, apassionât di musiche e musicist par passion, tra chês pagjines, Ermanno za al spiegave che dute le aventure e jere partide cuant che, su incjarie di Pre Felice Snaidero, al veve scomençât a cjalâsi ator in prevision di une eventuâl sostituzion dal vecjo organo eletric che – donât ae glesie di Vile plui di trente agns indaûr –  al jere pardabon mâl metût. Il fat al jere - al scriveve Ermanno - che “di ricercje in ricercje o vignivi a capî che nol sarès stât facil comprâ un organo a canis, che al costàs ce che le parochie e podeve permetisi di spindi, e che al rispuindès a dute une serie di esigjences, che tra chestes, e jere chê di rivâ a valorizâ al miôr le acustiche une vore buine de glesie di Vile e le necessitât di rispietâ il plui pussibil les sôs lineis architetoniches”.

Dal ricognossi chês dificoltâts e chei impediments ogjetîfs,  – e tal stes timp – di un interès, simpri esistût in Ermanno e rinfuarcît a fuarce di cirî, valutâ e domandâ ator, in lui al veve cjapât forme il desideri di progjetâ chel organo e di costruîsal di bessôl. Dite, fate. O miôr: “dite, fate” si fâs par mût di dî!, par vie che les dificoltâts, o ben le aventure – cemût che Ermanno le à definide plui voltes – e je scomençade propit tal decidi di partî, o ben tal inviâsi a fâ une robe che nol veve mai fate, che nol veve mai viodude a fâ e che ancje cualchi espert, contatât par domandâ opinions e sclariments, i sconseave di metisi a fâ, a sun dai varis: “ma ti rindistu cont?”, o ben ancje, “ma sêstu propit sigûr di volê imbusâti intune aventure dal gjenar?”.

Chestes perplessitâts par Ermanno si jerin tramudadis in spirt di condurance, orgoi e voe di fâje. E cussì, dopo dute une fase di studis e di ricercjis, i lavôrs scomençâts tal Otubar dal 2005, za tal Avost 2006 a segnavin un prin travuart: si veve tirade sù le struture puartant dulà che al sarès stât posizionât l’organo. A Novembar 2006, pe Fieste de Madone de Salût, les 50 canis di façade dal strument a fasevin za biele mostre di sè, e a Nadâl – al concludeve cun sodisfazion “l’impresari dal impussibil” – l’organo gnûf al veve za vût un colaut funzionâl e… al sunave!: a mancjavin ancjemò le cordadure, le intonazion e le consolle… ma l’organo gnûf al sunave!!

Tra sium o matetât, l’emozion tal scoltâ chei suns ferbints, vêrs e reâi e jere stade une sodisfazion parimentri vere e reâl, grande e indescrivibil, a coronament di un an di serades e di gnots, fiestes e dîs di vore, e ogni moment libar passât a lavorâ, cuntun o cun chel altri membri di chê grande scuadre di volontaris che si jere tirade dongje par dâ une man e par risolvi piçui e grancj problemis di dutes les fates.

 

tra cualchi disaventure les confermes…

Zenâr 2007: “Buie pôre nuie” al è za scrit e stampât. Ermanno, tra les ultimes ries dal so toc, al dîs che l’organo al è in pratiche completât. A restin les ultimes vores cui finiments che a van fats, ma aromai le strade – al somee di capî – e je cuasi di rive jù.

Ma, secont vualtris, a Ermanno e ae sô scuadre, podevie lâ verementri cussì slisse?  Ma nancje par idee!! Une disaventure, tra les tantes criticitâts za superades, par finî in glorie e veve pûr di presentâsi! Di fat... Dut câs, si è tratât apont “dome” di une disaventure (ma nancje tant piçule!) e al è ancje di dî che fin dopo Pasche al jere lât dut ben. Cun di fat, par cheste Fieste – domenie ai 8 di Avrîl dal 2007 –  l’acompagnament musicâl dal organo gnûf ae liturgjie cristiane plui impuartante dal an e jere stade une vore preseade. Le pussibilitât di podê usufruî dal strument par chê ocasion, e jere rivade dal fat che le consolle di len e jere stade consegnade par timp e dal fat che a jerin za stades fates les vores di cordadure des canis dal strument; par fâ chest lavôr specific, cun di fat, si jere spietade propit le Primevere, tant che stagjon plui clipe e duncje plui adate a une operazion di cheste fate, par altri ancje avonde fadiose e lungje. Si è za dite, di fat che les canis dal strument, a son pardabon tantes: ben 1185, che 622 si cjatin tal cussì tecnichementri clamât “Grand’Organo”, altres 463 a stan tal “Organo Espressivo” e 100 tal pedâl. Za il lavôr de cordadure, si che duncje, al jere ben che fat par Pasche. E fin chi... E ben dopo… Cualchi timp dopo di cheste celebrazion, a discjadenâ le disaventure, o sei, un intric tecnic no di pôc, e jere stade chê butade di cjalt  – dal dut esagjerât par chel moment dal an – de Primevere 2007. Stant che les canis dal organo a son fates di stagn e di plomp, che a son  materiâi che a fondin a bassis temperadures, a cause di chel calôr masse brusc che al jere rivât masse adore cualchi valvule e restave blocade, lant naturalmentri a comprometi le jessude foniche dal strument. Le soluzion e jere une e dome une: smontâ, regolâ e tornâ a meti dongje dut cuant. E cussì si è fat: dutes les canis – a part chês di façade – a son stades gjavades vie e regolades; dut chest cul grant aviliment, che si pues dome imagjinâ, di chei che chel lavôr lu vevin za ben fat une prime volte!... Cuant che si dîs che “fâ e disfâ al è dut un lavorâ”!!!...

E les vores – cence nissun altri “disfâ”, dopo cheste ultime disaventure – dilunc dal 2007 a   son lades indenant, cence altris problemis impussibii di risolvi...

Cussì, le ocasion par gjoldi di dut chel sfadiâ e je rivade ai 29 di Jugn, cuant che pe fieste di St. Pieri, patron de glesie di Vile, l’organo gnûf al è stât testât e magjistralmentri sunât di Padre Ercole, che al è stât organist in Vatican dilunc dal papât di trê pontefiçs.

Chel di Padre Ercole –  che par altri al à preseât une vore il progjet –  al è dome un dai nons dai straordenaris musiciscj che a àn provinât il strument vie dilunc dai cinc concierts organizâts (che al inizi a ’ndi jere dome cuatri in program). La prime di chestis esibizions e je stade propit chê dai 15 di Setembar dal 2007, inte suaze de cerimonie di scree dal organo, batiât ae presince dal arcivescul di Udin Alfredo Battisti. Le emozion par chest event –  rindût ancjemò plui significatîf dal fat che le date e je vigude pratichementri a coincidi cul diesim aniversari de muart di Pre Saverio (17.9.1997), che a Vile al è stât plevan par 55 agns – e je stade incressude e valorizade de strordenarie musiche di Johann Pachelbel, proponude dal ecelent mestri Diego Menegon, conciertist, organist titolâr dal organo dal Sîscent de Plêf di St. Eusebio a Bassano del Grappa (VI), e organist tal domo di Vicenze e de B.V. di Monte Berico, e altri ancjemò. A sotliniâ le bielece di cheste musiche cussì proponude a son stâts ancje le deliziose vôs dal flaut de zovine e une vore prometent mestre buiese, Fosca Briante (intervignude ancje tal conciert seguitîf) e les notes cetant sugjestives dal oboe dal otim musicist di Cosean, Andrea Martinella.

Nons prestigjôs di organiscj di ecezion a son stâts ancje chei dai musiciscj che si son alternâts al organo dilunc di chei altris cuatri concierts e che al public, cu le lôr esibizion, a àn ufiert ognidun une divierse e personâl espressivitât foniche; cussì al è stât par il  mestri Manuel Tomadin, organist titolâr de Capele Civiche de Catedrâl di St. Giusto a Triest, protagonist dal secont conciert dal 30 di Setembar. Pardabon favolose le sô gjenerose ufierte musicâl al public.

Cambi di palinsest, invezit, domenie ai 7 di Otubar:  le proiezion dal film “Le passione di Giovanna d’Arco”, cu le esecuzion des musiches di bande dal ilustri mestri Paolo Paroni al organo, dal mestri Gesing al sax e dal coro Panarie di Dartigne, no si è podude fâ in chê sere par un probleme di salût di Gesing.

Le serade che – pe dificoltât di organizâ un conciert su doi pîts, intun prin moment e someave lassâ une buse dolorose tal progjet conciertistic di inaugurazion, e je stade prontementri salvade di une altre prestigjose firme musicâl: chê dal mestri Massimo Pinarello, organist al Grande Organo “Kuhn”, inte Catedrâl di Trevîs e organist titolâr al Grande Organo “Dell’Orto e Lanzini” ae Glesie di San Giuseppe, simpri di Trevîs; clamât e intervignût cun grande disponibilitât al ultin moment, Pinarello al à incjantât il public cuntune esibizion sublim di un simpri emozionant Bach. Il conciert in palinsest, sul imprin aparentementri pierdût par vie di chel impediment pardabon impussibil di imagjinâ, al è stât invezit rimandât a une altre serade (ve chi duncje il parcè dai cinc e no cuatri concierts) organizade ae fin; alì, le splendide esecuzion di Paolo Paroni - intervignût su les senes dal filmât –  za avonde imbombât di sintiments par produsi un grant impat emotîf – e a scjadenât une grande emozion e maravee dal public, cence lassâ plui nissune olme  di chel piçul probleme. L’ultin conciert dal program uficiâl – ultin, ma par sigûr no mancul impuartant, come che e recite une detule inglese –  al è stât un regâl autentic, presentât dal mestri Domenico Severin, organist titolâr de Catedrâl di St.Etienne de citât francese di Meaux, che al à sierât in bielece cuntun repertori vast che al à cjapât dentri diviers dai autôrs contemporanis plui significatîfs.

 

le peraule al puarte vôs dal progjet

“Mi soi simpri insumiât di costruî un organo. O soi simpri stât convint di volêlu fâ e i parês critics dai  esperts e di cui che mi incoragjave a lassâ pierdi, forsit a son stâts ancje chei a dâmi il sburt decisîf. Il câs, le fortune o le Providence – a seconde di cemût che si à voe di clamâju – a àn fat il rest, metint par esempli su le mê strade les persones justes e  dispostes a judâmi. Une di chestes al è par sigûr il mestri Saverio Girotto; organâr di profession e vere colone puartant di dute cheste aventure  al è stât propit lui à intonâ, une par une, les 1185  canis che a componin il strument. A lui e va dute le mê ricognossince parcè che di amì mi à insegnât tant e mi à seguît in dute cheste imprese cu le sô esperience, cun altruisim, discrezion e disinterès.

E po i ringraziaments che o varès di fâ a son pardabon tancj, masse par rivâ a ducj cence lassâ fûr nissun; le colaborazion che o ai vût, di fat, e je vignude prime di dôs o trê persones, po des lôr fameis, dal vicin di cjase e dai coleghis di lavôr e si è slargjade pardabon a tantes, tantes persones. Un grazie, alore, al va par sigûr a Pre Felice che, adun cul consei parochiâl, mi à simpri dât sostegn e fiducie e un ringraziament mi è doverôs almancul par ducj i colaboradôrs strents che cun grande disponibilitât, snait, entusiasim e pazience a àn lavorât cun me dilunc chescj doi agns, dant ognidun l’esperience dal lôr mistîr: cui dal lavorâ il len, cui dai colegaments eletrics, cui che al veve les competences par distrigâ fûr lavôrs di muradure e vores di cjarpentîr...

Grazie ai miei di cjase che mi àn supuartât e mi àn dât tant sostegn morâl, cuant che o ’ndi vevi bisugne”.

 

in progjet ancjemò cualchi finiment

A restin ancjemò des vores di fâ, al dîs Ermanno. 

“Ancje cualchi espert e i stes organiscj che si son esibîts mi àn fat notâ des carateristiches peades ae sonoritât dal strument che nol jere pussibil di imagjinâ prime che chest al fos inserît tal ambient de glesie. Cumò che o vin testât a dilunc il strument, o podìn notâ une lizere disparitât tra il prin e il secont manuâl e chest, in peraules puares, al vûl dî che bisugnarà lavorâ sul nivel dal volum de tastiere. Pe completece dal lavôr, par di plui, o ai za pensât di intervignî su le cualitât dai regjistris; le impostazion atuâl dal organo, di fat, e je une impostazion foniche classiche, ven a dî che le percezion  che si ven a vê e je chê di une sonoritât italo – todescje, cuntun sun clâr e brilant; le serie dai regjistris atuâl, duncje, e prodûs za diviersis varietâts timbriches in stât di sunâ benon sedi Bach che le musiche baroche, ma par miorâ le cualitât e incressi le pussibilitât di eseguî musiches di dutes les etes, si larà a inserî ancjemò cualchi altri regjistri cun carateristiches divierses”.

 

un siôr carnet di apontaments 

L’organo al è za daûr a jemplâ un so carnet di concierts, che a son ancjemò di confermâ ma che i contats e le disponibilitât a son ben za inviâts. Par testâ le biele sonoritât di chest strument, duncje, a podaressin rivâ in curt nuie mancul che l’organist de catedrâl di Notre Dame di Parigi e chel de Basiliche di St. Pieri in Vatican.

In progjet, in graciis al interessament di Diego Menegon, ancje un conciert cul coro de catedrâl di Vicenze, cu le Orchestre Baroche dal Conservatori “A.Buzzola” di Adria (Vi) e cun altris conservatoris ancjemò.

E i programs cetant impuartants a son ancjemò chei des liturgjies, des messes “piçules e grandes” che l’organo di fat al nas cun cheste vocazion primarie.

Le storie, alore, no finìs ancjemò achì, ma e lasse il puest a un gnûf cjapitul dulà che il protagonist assolût al sarà l’organo cu l’auguri formulât di Ermanno Taboga  par che “il  sun di chest strument al puedi jessi simpri font di emozions dilunc vie le strade de nestre comunitât”.