Finîz i sgjâfs archeologjcs te Plêf di San Laurinz

Chest mês di marz a' son lâz indenant e finîz te Plêf di San Laurinz in Mont i sgjâfs archeologjcs dentri dal perimetro de glesie. Cussì la Sorintendence ai bens culturai de regjon, subit dopo Pasche, 'e podarà tacâ il secont lot di lavôrs che si concludarà cu la ricostruzion dal tôr. Si spere par Nadâl di chest an di meti a puest lis cjampanis e di tornâ a dâj vôs ae mari di dutis lis glesiis di Buje.

Intant, finide la ricercje archeologjche, 'o sin in grât di fâ un prin belanz dai risultâz plui impuartanz, che ju presentarai culì cumò in struc. Prin di dut si à vude la prove che su la culine di San Laurinz al é stât presint l'omp simpri, par dute l'ete storiche, cun tune continuitât d'insediament ch'e tocje i 2000 ains. Tal prin e tal secont secul lassù 'e jere une biele vile romane, forsi destinade ai soldâz romans dal presidio. Dopo, tal III e IV secul, la costruzion 'e je stade trasformade in tune fabricute artigjanâl, dulà che si fondeve il bronz par fant pizzui impresc' agricui, massarìe di cjase e bilisiis di ornament. Finalmentri tal V e VI secul sul luc 'e je stade tirade-su la prime glesie cristiane. Cussì la culine di San Laurinz 'e à vude chê destinazion cultuâl ch'e à ancjmò uê.

Il secont risultât impuartant al è stât chel di vê podût ricostruî dutis lis vicendis architetonichis, i ampliamenz, lis ricostruzions, i imbielimenz di passe mil e cinc cent ains. Ven a stâj dute une storie che prin si cognossevile nome pai ultins secui. Cussì cumò 'o savìn che la semplice glesie paleocristiane tirade-su tal VI secul, 'e à vût tal secul VIII - IX une gnove capele cun abside semicirculâr viers misdì e che tôr dal 1000 'e je stade slargjade de bande di soreli a mont. 'O savìn po' che in ete romaniche (tor dai secui XII - XIII) la Plêf 'e je stade completamentri ristruturade e ingrandide, cjapant a soreli-jevât une grande abide semicirculâr e sul cjanton di Nordovest une fuarte tore quadrade che

j dave al comples une muse dute gnove. Cheste tore (no si sa parcè) 'e je stade eliminade in epoche gotiche (secui XIV - XV) e sostituide cun tune toresse polifore pojade sul colm de fazzade, secont la mode tal timp. In chê ete 'e je stade ancje tirade-su la capelute de Madone, imbielide di afrescs, tacade dal mûr di misdì. Finalmentri dal '500 la glesie 'e à vude une gnove abside poligonâl e denant de fazzade 'e àn elevade la famose tore pentagonâl, ch'e je une raritât de architeture sacre di dute la Furlanie. Si sa po' che dal '800 il plevan Venier al à dopleade la superficie de glesie costruint il transet e il coro gnufs. Une storie di mûrs, di claps, di cops, di altars... ma ch'a son ancjmò l'olme de fede, dai sudors, dai fastidis, des sperancis di tanc' predis, di tanc' cristians, di tantis gjenerazions di bujaz che in chê glesie a' vevin lassât il cûr.

Altris risultâz impuartanz a' son la cognossince des usancis funerariis antighis de int locâl (in particulâr la tipologje des tombis, l'orientament, il coredo ecet. ), la storie antropologjche de popolazion di Buje a partî dal VI secul dedusude' dal scrutini di passe 100 scarsanâi cjatâz in situ, e vie indenant.

Ma la cjatade plui impuartant, no nome pe storie religjose locâl ma par dute la storie de cristianizazion des campagnis te Italie setentrionâl, 'e je stade fate propit durant lis ultimis setemanis di sgjâf. Tal setôr setentrionâl de nâf de glesie paleocristiane al è vignût in lûs infati, il batisteri origjnâl.

Une scuvierte ecezionâl, ch'e je la prove sigure che lì, 'zà tal VI secul, 'e jere la Plêf: ven a stâj une comunitât cristiane, cul so presbyter plebis, cu la sô struture organizative e cu la sô vite sacramentâl. Si trate di une pizzule vascjute in muradure rigjavade tal paviment, profonde 40 cm., di forme ovoidâl, decorade cun cure (daûr e chel che si pò capî di ce ch'al reste). 'E servive par batiâ secont la liturgje proprie de glesie aquileiese, ven a stâj par «imersion», cemût che si lei tai rituai antics. La vascjute 'e je disponude su l'as Est - Ovest in mût che chel ch'al vignive batiât al jentras-dentri cui pîs ta l'aghe de bande di soreli a mont e al jessìs - fûr cjalant viers soreli jevât, viers là ch'e nass la lûs, simbul di Crist. 'E je la prime volte che in Friûl si cjate un monument di chest gjenar tune glesie rurâl cussì viere. E 'o soi content di dâ cheste gnove pe prime volte propit su chest sfuei, par chei di Buje. Chel batisteri, infati, al è un document ch'al parten prin di dut ae nestre comunitât. Al è il segnâl de nassite ae fede dai nestris vons di 1500 ains indaûr, il segnâl de lidrîs cristiane de nestre culture. Cjalant chel sempliz argagn al è d'ingropâsi. Al è lì, infati — 'o podìn dî ancje nô cul vescul Cromazi di Aquilée — che la glesie nus à spiritualmentri concepîz e nus à parturîz come fîs di Diu: la vascje par batiâ est enim spiriîalis uterus ecclesiae qui concipit et parit filios Dei (Ser. 18).