A voli e crôs subìt dopo le prime grande uere, tôr dal vinc', a Buje e dintors 'e an pensât ben di tornâ a meti su les cjampanes sul tôr de Plêf di Mont, co 'e jerin stades robades dai todescs in timp di uere. Dopo un grum di discussions i sorestans 'e an decidût di fâ un grant cjampanon che di lassù 'e vessin podût sintflu par dute Buje e otri, e un tre cjampanutes pizzules par chei di lassù.

Dopo mil imberdeis, sia par cjatâ i bêz, sia par racuei el materiâl, in chê volte scjars e une vore cjâr, cheste opare 'e fo fundude a Padiâr, vizin Udin. Cun tun cjâr ben tressât pe ocasion e un tîr di sîs cjavaj, prudelât cun tun âtri tîr di cuatri sù pe rive che di San Florean 'e mene in Mont, a sun di vites e di cualchi 'crament fûr vie par judâ i cjavai, el cjampanon al è rivât te plazze de Plêf.

Dute le int che di ores lu spetave 'e je restade a viodi chel afâr cussì grant, al pesave passe trente cuintai. "E cumò cemût lu tirino sù?" 'e diseve le int. Ma a Buje, si sa, inzèn and'è di vendi, e cussì tra argains, cidules, cuardes e omps ben tressâs, cul comant dai caporions, in cinc ores el ciampanon al fo issât sul tôr de Plêf.

'E an lavorât dute le gnot par metilu a puest. Tal doman a binore, pene cricât dì, si sintirin i prins glons sparnizzâsi par dute Buje. Al jere un sun suturni che ti faseve vignî i sgrisui. 'e coventavin doi tîrs di cuarde, un par bande, e cuatri omps par movilu. Lu sunavin dome cuant che s'inmaneave un brut burlaz o ch'e cjapave fuc 'cualchi cjase; lu sunavin ancje cuant ch'al murive un membri de fraternite, co lôr ch'e vevin judât unevore cun bêz e robe par podê fâ le vore, jessint int di un ciert lustri e unevore timorâs di Diu. Cussì sunant dome tai mo mens di disgrazies cun chel sun gram, cuant che le int 'e sintive chei glons e pesseave di corse a insegnâsi.

Par furtune di chei di Mont che chês tre cjampanutes invezzit 'e vevin un sun tant pui legri, soredut un campanel ch'e disin ch'al fos stât puartât jù de gleseute di San Sebastian, lassù dal vecjo cjscjel, cumò sdrumât; al veve un sun indarintât che ti meteve murbìn. Le robe 'e jè lade indenant cussì fintremai dal cuarante.

A sun di glons e jessint fat cun materiai scârs, dade le miserie d'inchevolte, el cjampanon al à comenzât a sunâ zondar e a vê cualchi crepe. Bonsignor Chitus, ch'al jere Plevan in chê volte, al à pensât ben di butâlu jù, e insieme des cjampanutes e dal campanel fondilu par fâ tre cjampanes pui grandes sence cjampanon.

Le int 'e à bruntulât dome pal campanel, j displaseve no sintî pui chel sun gajardìn che ju jemplave di murbìn; ma al jere fat di un materiâl preseât, 'e dìsin d'arint, e cussì messedât cun chês atres mancul buines, 'e an tirât fûr un prodot vonde degnevul, sintint el lôr sun.

E son chês ch'e son tornades a meti sù dopo el taramot. 'E an un sun maestôs, antîc cun tune ponte di ligrie, un sgrisul indarintât, sierât tune scjatule di melodies suturnes. Un'atre storie 'e jè imparentade cul cjampanon e les cjampanutes di Mont. Jessint timps di miserie, Bonsigor Chitus, par no fâ spindi bêz ae int, al à pensât di metisi in cubie cu le int di Sante Marie Madalene, un paisut vizin Tarcint, par dividi les speses, cussì ancje lôr 'e an les stesses cjampanes di Mont.

No rivant jnmò a pajâ i debiz, al à fat tajâ i teis de plazze e ju à vindûz a Pieri Gurìn cjapant, in chê volte, cinc mil francs. Gurìn ju à puartâs a seâ par fâ brees là di Tite de See. 'E contin ch'e son colades cetantes maludizions, stant che i teis 'e jerin plens di cjviles e di claus batûs dentri par podê peâ i demai o par picjâ i manifesc'. Les femines 'e bruntulavin: "Danâs no steit a blestemâ in che maniere" i omps 'e rispuindevin: "Al è dut perdonât, robe di predis".