Cun chest an si pò dî che la ricostruzion di Buje e jé finide parceche al torne te sô Plêf ancje il grant quadri di Sant Laurinz.

Zuan Batiste Grassi, un dai caporions dal Manierisim furlan, al torne a mostrâ un’opare che à contribuît a fâ la storie de piture te nestre regjon. Par chest o scugnìn dî grazie a ducj chei che àn cul lôr intervent economic rindût pussibil chest fat culturâl di prin ordin.

Il Vasari ancjmò tal XVI secul, celebrant la vite “de’ più eccellenti pittori, scultori e architetti” talians da l’epoche al nomene il Grassi come “pittore et architettore eccellente” (1).

Zuan Batiste Grassi al jere nassût a Udin tôr dal 1525 e nuje si sa de sô prime formazion, dai soi mestris furlans e dai soi viaz fûr de regjon. Cert al è l’influs tes sôs oparis dai grancj mestris de Rinassince. La prime opare cognossude e jè dal 1547 e e rapresente S. Zuan pe glesie di S. Cristoful a Udin e l’an dopo simpri pe stesse glesie al piture S. Ane. Dal ’56 al ven a fâ part dal Consei popolâr dal Comun di Udin e j ven afidât il compit di piturâ il parapet dal organo dal domo.

Al è in chei ains ch’al ciape l’incariche di piturâ pe glesie di Mont di Buje il “Martiri di San Laurinz” e, in doi quadruz pui pizzui, la “Vite di caritât” e la “Condane dal Prefet di Rome” dentri di une pale dal altâr majôr. I tre quadris a forin colocâz cu la pale te glesie di Mont dal 1558. A forin stimâz 285 ducâz. Cinc ains dopo il Grassi al pò comprâsi a Udin une cjase par 293 ducâz.

Dal 1567 al frescje la fazzade dal oratori di Sante Lussie a Udin; dal ’68 al piture San Valantin pe glesie parochiâl di Latisane; dal ’69 al ilustre part de Sale dal consei dal ciscjel di Udin e dal ’74 al firme une pale d’altâr pe glesie di Turiac. Dal 1575 al fâs un contrat pes puartelis da l’organo di Glemone che lu impegnà fin al 1577. Ma l’an dopo Zuan Batiste al mûr a Udin, te sô cjase di Borc Poscuel, a l’etât di cirche cinquantetre ains (2).

La pale di San Laurinz e jè la plui famose opare d’art che Buje e à. Di jê e fevelarin ducj i storics da l’art furlane, comenzant dal De Renaldis che tal 1796 la dîs “pittura elegantissima e molto ben conservata, creduta lavoro del Tiziano finché non si è scoperto il vero suo autore da’ pubblici Registri di quel Comune” (3). A part la date sbagliade, lis informazions a son sostanzialmentri coretis. E a part ancje chê de conservazion. L’autôr nol saveve che 38 ains prime la piture e jere stade restaurade di Pieri Zardi. De schede dal De Rinaldis a derivin dutis lis informazions posterioris. Di chê dal di Maniago (1819) a chê dal di Manzano (1885) (4). Il Cavalcaselle al dîs che la piture e jè deperide e scuride dal timp, ma al zonte: “Trovasi però un certo che di grandioso nella composizione, nelle forme e nelle attitudini delle figure, le quali, oltre che ricordare il Pordenone e il Tiziano, hanno del michelangiolesco, al modo che vediamo nelle opere del Salviati, del Vasari e anche dei due veneti Tintoretto e Palma il Giovane” (5).

Tal 1893 al publiche un articul Valentin Baldissera in ocasion dal gnûf restaur ch’al liberà la tele de “stratificazion di polvar e di sporcizie che vevin ridusût il quadri a un insieme di figuris cence contornos”. “Il restaur dal cont Valentinis – al conclût l’autôr – al merte propit il non di une rigenerazion, parceche al è propit il câs di une vite ridade!” (6). Ancjmò i storics da l’art si ocuparin dal quadri ma simpri ricorint a lis testimoniancis dai autôrs ricuardâz (7). Finalmentri si rive a Josef Bergamini che dal 1973 al cjape l’argoment metinlu tal contest di dute l’opare artistiche dal Grassi. La conclusion e jé che il Grassi “mostra di aver raggiunto una maturità di linguaggio tale da meritargli un ben preciso posto nella storia dell’arte del Cinquecento friulano, e ingiusto e malevolo appare pertanto il silenzio con cui per troppo lungo tempo è stata relegata la sua produzione artistica” (8).

Un ultin contribût nestri al è vignût dopo lis teribilis condizions che an cjapât ancje il quadri dal Grassi dopo il taramot dal 1976 (9). La tele e fo salvade e puartade prime tal luc di racolte di Udin e po al Centro di restaur de Vile Manin di Passarian. Chì e fo sometude a atentis analisis e a intervens conservatîfs di caratar pressôs (velinaduris, consolidamenz, fodraduris e campions di pulidure). In chestis circostancis, confuartadis di confermis documentariis, si ven a savê che lis tre pituris e jerin sieradis dentri une grande struture architetoniche di len intajât e dorât. Propit in chestis circostanzis la Plêf di Mont e metè in lûs l’abside antighe che nus dà la misure de largjece di cheste pale che misurave plui o mancul 6 metros (10). Le pale di San Laurinz duncje “partim in pictura partim in sculptura” e pò sei cussì ricostruide tai soi elemenz essenziai.

L’altâr retangulâr, soreelevât dal paviment dal coro di tre scjalins, al jere flanchegjât di dôs puartis ai lâts che si completavin cun tun arc. Parsore di lôr a jerin i doi quadris pizzui rapresentants a gjestre la caritât di San Laurinz e a zampe la sô condane. Po al vignì l’arc cu la figurazion di len de Nunciazion: l’agnul a zampe e la madone ingenoglade a gjestre. Tal miez, parsore l’altâr, la grande figurazion dal Martìri di San Laurinz, che si concludeve ad arc, di metros 4 par 2,60.

Te part centrâl in bass al è rapresentât San Laurinz nut, cul sôl perizoma ai flancs, distirât e leât ae gridele, ma cul cjâf radiôs e i voi ch’e cjalin viers l’alt. Sot un sghero in scrufujut al stice il fuc cun tun soflet. A lât dal sant in pins a son figurâz a gjestre i sanz soldâz Gervâs e Protâs e a zampe Sante Lussie e Margarite. Daûr di chestis si viôt un soldât ch’al cjale la scene comovût (salacôr si trate di int presint che secont l’hymnus di Prudenzio si convertirin al cristianesim viodint la fuartece dal martar). A gjestre, daûr dai sanz soldâz si viôt il prefet di Rome sentât in trono che cu la zampe al rêz il baston dal comant e cu la gjestre al indiche la sentence che un personagjo al lei sun tun rodul daviert. Plui in su un soldât a cjaval al rêz la bandiere dulà che comparin lis letaris SPQR (Senatus PopulusQue Romanus). Altris figuris e stan ancjmò intôr. Un colonât semicirculâr cun tune scjalinade ovoidâl denant al è implenât di int turbade. In alt, tra bocui di nui, al centro al è rapresentât il Redentôr risurît ch’al ten cu la sinistre la bandiere cu la crôs e cu la gjestre al benedis. Ae sô gjestre la Madone e San Pieri e a zampe il Batiste e San Pauli. Sot dal Redentôr un agnulut lusint al puarte al Sant la grande corone de glorificazion!

Tes dôs telis minôrs, la prime, ch’e misure 98x84 cm, e puarte la figure di San Laurinz ch’al fâs la caritât ai poars. Il Sant, cun tuniche e dalmatiche diaconâl, cu la sinistre al cjôl li monedis di un plat che un frutat i rêz e cu la giestre al met l’ufierte te man di un strupiât. Une pizzule fole di malâz j sta intôr. Chê altre tele, che misure 94x84 cm, e rapresente San Laurinz denant dal prefet di Rome. Il Sant, ch’al cjale l’uficiâl, cu la man gjestre al mostre la fole dai poars ingrumâz in chê part dal quadri, ven a stai personis che secont l’hymnus a son la vere ricjece de Glesie. A zampe il prefet in trono, sot un baldachin circolâr e torceât dal so seguit di soldâz e di sapiens, al ordene imbilât che il Sant al sevi mandât al suplizi.

Nus reste di dî di une scuvierte resint, impuartant pe storie dal Grassi, fate dal restauradôr dal Museo diocesan Lucio Zambon (11). Tal grop di int che si dà dongje a gjestre dal quadri, daûr dai Sanz Gjervâs e Protâs, fra i personagjos presinz si viôt ancje il ritrat di Zuan di Udin. La muse chì rapresentade e semèe quasi il model pal frontespizi des “Vite” dal Vasari che dal 1568 j dedicave un cjapitul. Cheste e jè une testimonance preziose pe cognossince de familiaritât dal Grassi cul “Ricamadôr”!

notis

1) – G. VASARI, Vita de’ più eccellenti pittori, scultori e architettori, edizione a cura di G. Milani, Firenze 1878-1885.

2) – G. BERGAMINI, Il pittore Giovanni Battista Grassi informatore del Vasari, Memorie Storiche Forogiuliesi 53 (1973) 99-116.

3) – G. DE RENALDIS, Della pittura friulana. Saggio storico, Udine 1796, 75-78.

4) – F. DI MANIAGO, Storia delle belle arti friulane, Venezia 1819; F. DI MANZANO, Cenni biografici dei letterati ed artisti friulani dal sec. IV al XIX, Udine 1885.

5) – G.B. CAVALCASELLE, La pittura friulana del Rinascimento, a cura di G. Bergamini, Vicenza 1973, 105.

6) – V. BALDISSERA, La pala restaurata della Pieve di S. Lorenzo martire di Buja, Il Cittadino Italiano 16, 6, 1893.

7) – O. MARINELLI, Guida delle Prealpi Giulie, Udine 1912; N. POJANI, Pellegrino da S. Daniele ed anneddoti, Corriere del Friuli 23, 9, 1911; P. MENIS, La Pieve di Buja, Gemona 1930; C. SOMEDA DE MARCO, Cinque secoli di pittura friulana. Catalogo della mostra, 1948; G. MARCHETTI, Gemona e il suo mandamento, Udine 1958; G. C. MENIS, Civiltà del Friuli centro collinare, Pordenone 1981.

8) – G. C. MENIS, Contributo a Gian Battista Grassi. La pala di S. Lorenzo a Buja (1558); Studi forogiuliesi in onore di C. G. Mor, Udine 1983, 171-184.

9) – G. BERGAMINI, o. c. 116.

10) – G. C. MENIS, Ricerche archeologiche nella Pieve di Buja: Aquileia Nostra 53 (1983) 60.

11) – L. ZAMBON, Giovanni Battista Grassi e il “Martirio di S. Lorenzo” di Buja: 4 (2003) 75-78.