Le leç finanziarie regjonâl pal 1999 (L.R. 13/99) 'e à destinât al Comun di Buje doi miliarts par "il recupero di aggregati edilizi di particolare interesse storico ed architettonico". Dit in peraules puares, el Comun di Buje al à domandât ae Regjon - e otignût - un contribût di doi miliarts par comedâ dai fabricâts ch'e son logâts in Mont di Buje. Prin di dut, un grazie a chei che in Regjon 'e an capît che Buje 'e veve dibisugne di un sostegno efetîv. Le Ministrazion Comunâl no podeve domandâ contribûts ae Comunitât Eropeane, parceche el teritori di Buje no l'è dentri in nissun dai progjets finanziâts. No l'è stât nancje pussibil di tacâ un progjet in "partenariato", parceche cirî - ma soredut cjatâ - altris doi paîs europeans ch'e vessin dibisugne di comedâ cjases, cjscjei e zardins - al è un grum complicât. I timps si saressin une vore slungjâts. Buje no po plui spetâ: i lavôrs 'e son di fâ prin di pierdi ce ch'ai è restai.

Ma, parcè Mont? Cuâl isal el "progjet"} E... di cuâi fabricâts si fevelial?

Vuê ducj 'e cìrin di recupera les lidris e le storie, par fâ cressi i fruts cu le consapevolece des sôs origines. Buje 'e jè nassude e cressude jenfri Pidicuel e Mont - seont i studiôs. E alore Buje 'e à di tornâ a cjapâ in man Mont; 'e à di torna a fâlu rivivi, tal mont dal tierç milenari, ma cu le cussience di ce ch'ai è stât. Cemût? Comedant el Cjscjelàt (ce ch'ai reste) e part dai mûrs vieris dal cjscjel, viergint el Museo Citadin, metint a puest i trois che puartin dai borcs di Buje in Mont e dant une sistemazion definitive al toc di tiere de sagre e dai zucs.

Peraulis? No. Fin a pôc timp indaûr al jere un sium, une sperance; cumò el sium al sta deventant un progjet e tra cualchi an al sarà veretât, fat concret.

Seont les ricercjes dai storics, el Ciscjel di Mont al'è nassût intôr dal V o VI secul, come ancje le Plêf di San Laurinç (1). I "diplomi" di Carlo Magno tal 792 e di Ottone II dal 983 'e confermaressin cheste teorie dai studiôs. Daspò, fin tal XVI secul al à cognossût moments di pâs e di vuere, di miserie e di invasions, parceche el puest dulà ch'ai jere logât e les sôs carateristiches lu vevin fat deventâ un luc strategjc pe difese dal Friûl. Daspò, tai ultins cuatricent agns, al è stât lassai murî. Ancje dopo el taramot dal 76. ma ancjmò vives 'e son les liendes nassudes tal timp di une storie cussi viere e complicade, tant ch'e son studiades tes scueles (si visaiso — par esempli le dediche de Scuele Elementâr di Colosomàn a Pieri Menis?), ma 'e podaressin jessi, un doman, une suage par manifestazions tematiches. Ma... ferminsi culì! I siums 'e an di stâ tal scansèl di chel che si insumìe... fin ch'e son siums...

Tornant ai fats, cualchi an indaûr el Comun al à comprât une viere cjase di comedâ par meti dentri el Museo Citadin. E jè chê a man çampe, rivant in Mont, subit dopo de strete, di front de piace. Cheste cjase, de fin dal 700 seont i studiôs, 'e jè in veretât fate di dôs cjases e le stale. Scuasit dute in clap, 'e sarà comedade cule tecniche dal "cuci e scuci", ch'ai è un mût di regolâ tignint le struture origjnâl dai fabricâts. El museo, une volte viert, al varà cinc sezions: l'ambient e il timp antîc; le ete di mieç; le ete moderne; l'etnografie e l'art (uniche sezion vuê vierte cule istituzion dal Museo d'Art de Medae).

Un architet, cul so "staff, al è daûr a meti dongje el progjet gjenerâl che al sarà in curt presentât in Comun, e po dopo ancje ae int. Cheste 'e jè di sigûr une grande ocasion par recupera el recuperabil, ma ancje par rinfuarçâ le anime storiche milenarie di Buje, in particolâr di Mont.