Cheste primevere a Ursinins Pizzul `e vignarà consacrade e uficialmentri inaugurade la gnove glesie dal Sacri Cûr. Dal mês di novembar da l'an passât `e ven, però, `za doprade duc' i dîs par celebrâ la S. Messe. Fin dal estât passât, difat, dutis lis oparis essenziâls, come l'implant eletric e di riscjaldament, l'isolament, i pavimenz e i sieramenz `e jerin bielzà finidis.

Ancje il gnûf aredament, destinât a sostituî chei che, traslocât dal vieri prefabricât, al ven provisoriamentri doprât cumò, al à `za podût sei stât ordenât grazie ae gjenerositât de int di Buje.

`O crôt che une volte completadis ancje lis pizzulis rifiniduris ch'e mancjn tal dentri, la glesie `e ledi valorizade cun tun grant sagrât ch'al rivi fin sul plazzâl lì che cumò al é il prefabricât dal daspò taramot e cun tun biel tôr ch'al permeti une adeguade sistemazion a lis dôs cjampanis.

La glesie dal Sacri Cûr no jé dome la glesie di chei di Ursinins Pizzul o dai vielis dal centri anzians e de cjase di ripôs, ma ancje il lûc di incuintri in te prejere de înt di Buje cui soi vons e un ringraziament concret par dut chei ch'e an fat pe nestre comunitât.

L'edifici, tacât tal estât dal 1989 e fat sù tal puest de viere cjase di ripôs, butade jù ancjmò prime dal taramòt, al ven costruît, cence finanziamênz publics, dome grazie ae gjenerositât de înt ch'e capìs l'impuartance di vê une glesie in mûr.

Un ringraziament particolâr al va a duc' chei ch'e an pensade cheste gleseute, al Comitât ch'al à seguide la progjetazion e i lavôrs, a Mons.

Bressani pal impegn costant e pes pocadis dadis tai momenz di dificoltât, a dutis lis Aministrazions comunâls di chesc' cinc ains pal lôr jutori, ai professionisc' ch'e an ufiert progjet, direzion dai lavôrs e colàut, al President de Associazion Chei di Ursinins Pizzul ch'al à simpri crodût in te rinassite de glesie, a duc' chei che cence nissun sunsûr `e an contribuît a finile pe lôr gjenerositât.

`O crôt ch'al sedi un segn impuartant che ancje lis ultimis tre o quatri robutis ch'e màncjn par completâ la glesie `e viòdin ancjmò coinvolz e unîz duc' i bujaz. Il dì de inaugurazion `o sarìn duc invidâz a fâ fieste `e `a sarà une zornade di grande gjonde, un moment di unitât di dute la int di Buje tôr di une opare concrete, unitât e colaborazion ch'i speri `e vebi di continuâ ancje tal futûr e in dutis lis robis.