Ai 26 di Jugn dal 1989 si son scomenzadis lis fondis par ricostruî la glesie dal Sacri Cûr, lûc di prejere, ma ancje puest dulà che i anziâns de Cjase di Ripôs e dal « Centro Anziani » e podaràn cjatâsi e sgambiâ dôs peraulis cun chei ch'e vivin difûr. A' forin l'Aministrazion comunâl e lis Circoscrizions a cjapâ sù la volontât di chei ch'e vìvin lì e a dâsi da fâ, cun convinzion profonde e cu l'aprovazion de la Autoritât religjose, in te persone di Mons. Aldo Bressani, par che le idee de glesie si concretizas.

Dut, dal progjet aes fìniduris, al veve di jessi fat dibant, cence podê contâ su finanziamenz publics, ni vê la sigurece di sovenzions de bande di privâz. Chei che si son cjapâz su la responsabilitât e il pês di puartâ indenant l'opare, 'e savevin che i timps no saressin stâz curz, che l'organizazion dal lavôr no sares stade facil, che lis incognitis su la situazion finanziarie 'e varcssin compagnât dì par dì il lâ indenant dai lavôrs. Però 'e savevin ancje che cheste 'e sares stade l'ocasion, pai Bujaz di vuè, di testemoneâ cui faz un valôr ccnce presit: la solidarietêt tantche espression di afiet e di ricognossince pai nestris viei.

Ben, in mancul di tre ains, la gleseute nassude dal nuje 'e jè rivade al pont di spietâ nome il cuviert, e ancje chel al è pront par cjapâ il so puest parsore dai mûrs in siment armât.

Intops burocratics, momenz di crisi, dificultâz di ogni dì, no an distudade la gjenerositât des personis di cûr che an fat in mût che la glesie 'e cjapas cuarp un pôc a la volte. Imprenditôrs, bancjs, comunitâz e parochiis 'e an contribuît cun granc' fìnanziamenz, ma ancje duc' i pizzui jutoris di tantis personis, parfìn dai fruz di scuele, 'e an dât un bon sburt par rivâ là ch'i sin rivâz.

Cumò 'e reste le ultime tape. Chei di Buje 'e son boins di dimostrâ che la lezion di solidarietât imparade in timp dal taramot no je stade dismenteade, se 'e jè in 'zuc la serenitât de int plui debil. Lu an dimostrât artigjans e operaris tai timps dal taramot ín Irpinie; lu an mostrât lis fameis di Buje in tantis ocasiôns, cuanche cualchidun al à vude bisugne.

A vê dibisugne, cumò, 'e son i nestris viei; alore al covente dâsi dongje par fâ l'ultin sfuarz in mût di finî il cuviert e, plui indenant, i implanz e lis pizzulis robis ch'e coventaran par dâ ai vons une glesie biele di viodi e ben finide.

Il grazie di cûr, de bande dal Comitât ch'al puarte indenant cheste ricostruzion, al è just e doverôs tai confronz di duc' chei che in ogni mût 'e an dade une man par fâ sù cheste opare; al è un grazie, però, che nol vâl nuje dongje de cussience di vê dât ae nestre int, che si cjate a vivi la ultime stagjon de vite, un lûc ch'e à simpri dimostrât di vê a cjâr pe incressite dal spirit e pal gust di cjatâsi, almancul a messe, cu la int dal so paîs.