FOTO

Fevelâ di art cun tun artist al é simpri un moment di gracie.

Massime quant che si à di creâ insieme une gnove opare. Lui, l'artist, al à il podê magjc di gambiâ i claps in aur, ven a stâj di tradusi l'astrazion in concretece, la logjche in emozion, il concet in forme, figure, colôr, prospetive, poesie... Jo quant che, par esempli, mi pas i voi a cjalâ i afrescs dal Tiepolo tal Palaz patriarcjâl di Udin, 'o pensi ai discors ch'e varàn fat il Pitôr venezian e il Patriarcje par inventa che sequenze maraveose di quadris su la Bibie ch'e insiorin lis parêz di chel monument.

Di sigûr il Patriarcje Dionisi Delfin j varà contai cemût che te vite dai antics vons d'Israel si scuen viodi la man di Diu ch'e guide i omps e la storie e cemût che tes vicendis di Abram, di Isac e Jacob si rivele pe prime volte l'identitât di Diu. Concez teologjcs altissins, ma astraz e assolûz. J coventave alore l'artist par materializâ chês ideis, par trasformâlis in personis vivis, in senis passionadis, in azions dramatichis, in messazs eloquenz e cunvincenz, in figuris incantesemadis di colôr e di lûs... il meracul da l'art! Ancje a mì mi è tocjât qualchi volte di fevelâ cun qualchi artist par dâ forme a une gnove opare d'art. E chei 'e son stâz par davêr momenz di gracie.

Par esempli, quant che cun Fred Pittino, tal '60, si à progjetât il plan iconografic pai altars in mosaic dal Tempio Ossario di Udin. O quant che cun Pieri Giampaoli si à studiade la medae dal milenari di Buje. O ancjmò quant che cun Lucian Ceschia si à inmaneâde la medae dal Congres eucaristic nazionâl dal 72 o il munument "ae anime di Buje" pe Piace di San Scjefin.

Un di chei momenz di gracie al è stât par me ancje ideâ cun Enore Pezzetta la grande statue dal Sacri Cûr di meti te glesie dal stes non a Ursinins Pizzul. Mi visi ancjmò i discors ch'o vin comenzât a fâ, te sô cjase di San Florean, dongje di une butilgje di picolit straordenari che lui al tirave fûr nome pes
grandis ocasions.

La devozion al Cûr di Gjesu - 'o disevi jo - no à par ogjet il cûr in sè, il muscul de circulazion dal sanc dal Redentôr, ma la persone di Gjesù, ch'ai ame l'omp, duc' i omps, cun tun amôr cussi grant che lu sburte a dâ vie la sô vite par lôr. Un amôr ch'ai cjate tal cûr il so simbul plui espressîf.

Alore - al intervignive Enore - bisugne rapresentâ dute interie la figure dal Crist e dâj une espression de muse e un moviment des mans ch'e rìndin clare e "fevelant" cheste idee. E, cjapadis cjarte e lapis, al comenzà a disegnâ... a disegnâ... une muse, une figure, mans ch'e mostravin il pet, sede dal cûr. Mai content, quasi cun furie, al jemplave sfueis sore sfueis.

Ma - 'o 'zontavi - l'amôr di Gjesù nol è finît cu la fin de sô vicende umane, al è ancjmò vîf uê, presint tal miez dai omps dal nestri timp. Quant che un al larà te glesie di Ursinins Pizzul al varà di sintî cheste presince, al varà dí fâ une esperience religjose autentiche, al varà quasi di sintî dongje di sè il respîr di Un ch'j dà la man par judâlu a lâ indenant te vite cun fede e cun co ragjo.

Po ben - al ribateve Enore - se cun tune man il gno Crist al mostrarà il cûr par significâ il so grant amôr pe umanitât, cun chê altre, spalancade come une ale di agnul, si rivolzarà a cui ch'j sta denant come par jevâlu su o judâlu o cjarezzâlu o cjapâlu a brazzacuel... Ma i vôi... i vôi... chei 'e àn di dî dut!

Ma cemût - 'o insistevi jo - cemût fâ sintî a duc' l'universalitât, la smisurade imensitât di chest amôr ch'al cjape dentri duc' i omps, di duc' i timps e di duc' i lucs dal mont, di uê, di jar, di doman, di simpri?

Nome cu la grandiositât des sôs proporzions! -'o vin concludût insieme. - II nestri Sacri Cûr al varà di sei grant, tant di jemplâ dibessôl dute l'abside de glesie. Grant e distacât dal mûr come une improvise aparizion di un omp potent e afetuôs, che ti ven incuintri par inneâti tun brazzacuel di gjonde infinide... Potent pe sô grandece e pal so rût bronz; afetuôs pes sôs mans e pai soi voi...

Cussì, 'e je nassude la statue dal Sacri Cûr che chest an 1997 'e vignarà inaugurade a Buje te glesie dongje la Cjase di ripôs. Dopo 'e son vignûz i timps dal bozet, la modelazion istintive e passionade, lis lungjs meditazions, il discorisi cidin des sornadis smalitadis, i dubis, lis corezions, lis 'zontis e infìn la sodisfazion dal trauart e la preparazion dal model in misure reâl. Ma chi a Enore j son mancjadis lis fuarcis.

Une lûs stralusint 'e à imbombâz i soi voi di frut e lui al è lât incorint incuintri a chel Crist ch'j mostrave il cûr cun tune man e cun chê altre lu cjapave a brazzacuel par simpri.

La realizazion dal model pe fusion 'e je restade a miez. Ma, par volontât di duc' chei ch'j volevin
ben a Enore, l'opare 'e je stade completade di un artist ami e grant intindidôr da l'art dal scultôr bujês, Gianfranco Malison. Buje 'e podarà cussì vê tal orizont dal so moderno panorama artistic ancje cheste gnove perle, la ultime opare di Enore Pezzetta, forsi la plui impuartante e significative de sô cariere di scultôr.

Come ch'al à scrit Anzil su Buje pore nuje dal 1986 "al sarà necessari riviodi dute l'opare di Pezzetta, cun tune analisi critiche plui oculade" par definî la sô juste posizion tal concert da l'art furlane e nazionâl dal nestri timp. Lis sôs oparis - al continue - "no son tantis (purtrop), ma 'e son avonde par dî ch'e son impuartantis te storie da l'art de nestre regjon". In realtât, dal cjanton de so otiche personalissime il Pezzetta dal '45 in ca al à metût adun tes sôs oparis dut il travaj da l'art moderne, pûr restant simpri fedêl a une interpretazion realistiche dal mont.

Un realisim che di une bande lu lee ae tradizion tipiche de art furlane di duc' i timps, e di chê altre j permet di operâ chê trasfigurazion liriche de materie ch'e je l'aspirazion costante dal so lengaz estetic.
'O concludarai, duncje, chestis notis visant diretamentri il gno letôr, ch'al sarà (lu speri) prin di dut chel di Buje ch'al larà a viodi e a preâ il Sacri Cûr di Ursinins Pizzul, cu lis peraulis di Ovidio, mai tant veris come in chest câs: "Crede mihi, plus est quam videatur, imago... " {Herod., Ep. 13).