Tra lis tantis distruzions ch' e àn fate Buje plui poare di «bens culturai» 'e je stade ancje chê de vecje Canoniche. Une cjasone tirade-sù de int di Buje in timps di miserie nome cun sacrifizis e tante passion! Un monument di architeture neogotiche ch'al jere un spieli impuartant de culture storicistiche mitteleuropee e locâl di chei ains. La furie dal taramot no le à sparagnade e mancul ancjmò lis ruspis, e cussì nus tocje fâsù ne Canoniche gnove, ch'e sarà ancje jê, volint o nolint, spieli de nestre comunitât cristiane di uê.

Il tema de gnove Canoniche al é stât dât ai architez di Buje, ch'and'ê tanc' di zovins e di brâfs. E tanc', di fat, e' àn concorût. Sichè nol é stât facil pe Comission incaricade di decidi. Duc' i progjez presentâz 'e vevin alc di gnûf e interessant. Alafin al é stât preferît il progjet dal architet Gianfranc Pezzetta, come plui rispuindint ai criteris ideai e funzionai proponûz.

In realtât, la Canoniche pensade di Pezzetta, e deventarà come chê di prin, une des plui bielis dal Friûl. Nol podeve jessi diferent tun paîs di artisc' come chest!

Provìn a cjalale insieme. Prin di dut, si sa, la Canoniche 'e je la cjase dai predis, ven a staj dal plevan, dal capelan, di qualchi altri predi di passaz pes ativitâz pastorâl, di qualchi parint dal predi e di amancul une «collaboratrice domestica». Un grop di personis a servizi de comunitât ch'e àn di vê un alogjo cun tun minim di comoditât e di privacy. Par lôr al é stât riservât dut il prin plan de gnove Canoniche e un zardinut privât, de bande de Braide di Scoi, dulà ch'e podaràn lâ a respirâ une bocjade di pâs.

Ma la Canoniche 'e je principalmentri la cjase de comunitât, la cjase di duc'. Par chel la progjetazion sì é ispirade a un model formâl e simbolic facil di capî subìt par duc'. Chest «messaggio» progjetuâl si podarès dîlu cussì in pocjs peraulis:

1. LA CANONICHE 'E INVIDE A LÂ DENTRI

Le sô no je infati une architeture sierade o foreste pa l'ambient circostant, ma al contrari vierte e urbanisticamentri insedade cul rest dal centro storic. Particolarmentri chest si palese cun tune stradele pedonâl che, partint de Place di San Scjafin, 'e passe par traviers dal zardin e dal sotpuarti de gnove Canoniche, fin a rivâ là de cjase de zoventût. Un element ch'al unis, ch'al invide e ch'al puarte dentri de dôs alis denant de Canoniche viertis come doi braz butâz a brazacuel.

2. LA CANONICHE 'E INVIDE A PENSÂ

Duc i soi elemenz formai, pur tratâz cun tecnologje moderne, 'e son di fat rigjavâz de tradizion architetoniche sacre, in particulâr dai claustris dai convenz medievai, dulà che l'omp cence visâsi al ven puartât a pensâ a l'anime, al eterno, a Diu... La sacume dal Domo lì dongje, il vert dal zardin, la fontanute ch'e sclipigne, la proporzion fra plens e vueiz... dut al concorarà a creâ une oasi sacrâl.

3. LA CANONICHE 'E INVIDE A IMPEGNÂSI PE COMUNITÂT

Lì dentri al é infati preparât un puest par duc chei ch'e uèlin dedicâ un pôc dal lôr timp par chei atris, zovins e vecjos, omps e feminis. Si cjàtin a sei no nome i ufizis de parochie e lis salis par incuintrâsi cui predis, ma ancje la biblioteche, lis salis pe «dutrine», pe cantorie, par conferenzis, par grops di studi o di meditazion, pe bande, pai zovins, pai fruz... Al é previodût ancje un cjamput par zucs e un teatro scuviert... Cui no podarajal cjatâsi come a cjase sô?

Cussì la gnove Canoniche di San Scjefin 'e deventarà veramentri, come cWe à di jessi, la «cjase di duc'».

Gian Carlo Menis