Pra Saverio Beinat 

une strade di storie, 

fede e coragjo

FOTO

Tal 2003, sest inovâl de muart di Bonsignôr Saverio Beinat, la Aministrazion comunâl di Buie e à poiât in vie uficiâl la volontât dai parochians di Vile di intitulâ une strade al plevan titolâr di cincuante agns de lôr storie. Ma cui isal stât chest om? Fevelâ di lui cence smenteâ nuie e dedicâ a ducj i siei percors la impuartance juste, no je imprese di pocjis pagjinis. Par tant, cheste e intint jessi dome une sclipignade di ricuarts. 

cui jerial chest om?

“Al cjaminave devant di nô… sentâts imbambinîts su dôs filis di cjadreis (in chei agns a dutrine si jere in tancj, a Vile),  mieçs stufulîts di chel lâ sù e jù dal plevan, e niçulâts di chel sun lizêr des sôs clâfs che al tignive in man, daûr de schene. Indenant, dietro front, indaûr. Cussì al faseve par cuasi dut il timp, cjalant fis devant di sè un pont invisibil, a moments sbassant il cjâf, che po al tornave a alçâ viers il stes pont imagjinari. Al someave che a nô nol cjalàs mai, cussì che di tant in tant si sintivin autorizâts a riduçâ par sot, come che a fasin ducj i fruts, e a scambiâsi cualchi peraule “di disperazion” par chê ore di dutrine che no finive plui. E lui, che in realtât no i scjampave propit  nuie, in chel, si voltave viers di nô. Ti pontave i voi e cuntune espression tra il sevêr e la misericordie ti glaçave: “Tu. Ce stavio disint cumò jo”? o ancje: “Ce atu capît vuê”?.

E li… Nô, gjenerazion che tai prins agns ’80 o vevin dai 6 ai 10 agns no jerin propit abituâts a chescj metodis cussì direts, ni o savevin ricognossi che a fasevin part di altris timps… ײ

Pre Saverio Beinat (che a Buie ducj a varessin clamât “Pra Saverio”) al jere nassût ai 22 di Avost dal 1912 a Mels di Colorêt. Secont fi mascjo rivât dopo Ines, Tilde, Asterio e Zita Beinat, Pra Saverio, furbo, vivarôs e plen di ideis fin di piçul, al veve vût une educazion severe, marcjade - prime in famee, e soredut dopo, in seminari- di une intransigjence indiscutibil.

E in chê volte, e conte vuê Marie Beinat, la sûr plui piçule di Pra Saverio, “nissun si smaraveave se cui fruts i predis a vevin une maniere ruspiose, nancje se a rivavin a slungjâ cualchi scufiot o se cu la bachetute ti davin jù pes mans”. “Mi visi che tai agns di seminari, vie pal istât, il predi di Mels al domandave a gno fradi di judâlu a fâ lezions di latin o cualchi altre materie ai fantats dal paîs. E li la dissipline e jere pardabon sigure; dut câs a voltis al capitave che par cualchi anime plui “racomandade”, parcè che fie di… il plevan al domandàs a Pre Saverio di tignî une linie plui morbide cence intervents di nissune fate. “Ah, che po no vè!”, al rispuindeve gno fradi: “se al merte un pataf o une vosade, lui al è come ducj chei altris, no viôt il parcè di chestis preferencis”.”

E  forsit ancje in gracie di cheste dissipline morâl, marcade di une fuarte percezion de justizie, de avualitât e dal rispiet di ducj i oms, scandide par plui di mieç secul jenfri dôs gjenerazions di une comunitât, prime in vuere, po taramotade e smenteade dai sorestants e dai dirits civîls, rivant fin a une gjenie di zoventût indifarente cuasi a dut, bonsignôr Saverio Beinat al à savût jessi un pilastri e une guide spirituâl e culturâl. La fiducie de sô int se veve savude concuistâ planc a planc. Partint dal nuie. O miôr: de indiference e de ostilitât plui assolude…

une comunitât dificil.

L’Arcivescul Giuspeppe Nogara lu veve ordenât predi ai 19 di Lui dal 1936. In cjase, in chê dì e jere stade fate fieste grande; la sodisfazion di so pari Agnul, e sô mari, Vigje Snaidero, si respirave fin di bot a Maian. Nol jere di ducj vê un fi predi! 

Capelan a Maian cun Pre Zamparini par plui di cinc agns, viers i ultins di Març dal 1942 al jere stât clamât a Vile di Buie a fâ cualchi messe. Al jere timp di vuere, e vuere a Vile di Buie e sarès stade ancje par lui!  “Guide spirituâl” e pastôr de vicjarie di Vile al jere in chei agns Pre Berto: un om une vore inteligjent, a ricuardin ancjemò vuê i parochians che si impensin ben ce  simpaties che al veve savût tirâsi dongje cu la sô maniere di fâ; un grant predicjadôr, une vore disponibil a “lâ incuintri” ai siei fedêls… soredut… se di anime feminine. Une “sensibilitât” cheste, che rivade aes orelis dal Vescul cun chê grande casse di risonance che tai paîs di ducj i timps e à simpri funzionât miôr di Internet, e veve imponût la sostituzion di Pre Berto. E cheste sostituzion si clamave Saverio Beinat!. 

Di lui - predissut  di 30 agns che al vigneve fûr dal nît, magari cu la solite pretese dai predis zovins di indutrinâ la int (cussì si pensave) - la comunitât di Vile  no  voleve propit savênt. A fâjal capî cence masse zîrs di peraulis, za dal biel inizi, e jere stade chê puarte de glesie: tressâde, par no lassâlu jentrâ a dî messe. Vierzude in graciis di Santo Zonton intervignût cuntun ramondin, la messe e fo celebrade distès, ae presince di cuatri animis e cence  un sôl riferiment a chel benvignût cussì “vilan”.  Ma nol jere avonde, la ostilitât de int e veve di colâ ancjemò plui in bas e cussì, jessint di messe, Pra Saverio al veve cûr di cjatâ la biciclete che lu puartave sù e jù di Mels, sbusade, platade o butade intune cise. Par no daûr masse sodisfazions, alore, al veve imparât a cambiâ strade e par rivâ a Vile al cjapave la scurte de Cicule, lassant la biciclete a mieç percors.

Lu faseve  ancje par pôre di vignî clapadât vie pe strade stant che za une domenie, une sdrume di “santis feminis”, ancjemò disperadis pe pierdite de lôr “guide spirituâl”, e par nuie rassegnadis al gnûf predi, lu vevin spietât  par clapadâlu. Dut in glorie di Diu: al continuave a fâ messe e a predicjâ come se nuie al fos; fin che planc a planc, chel predissut al à scomençât ancje a fâsi scoltâ. Ma intant par Pra Saverio i prins timps a àn di jessi stâts pardabon garps. Par vie de vuere o forsit dome par ignorance o  parcè che schifâts des cjacaris sul vecjo predi che, voies o no a jerin saltadis fûr, chei di Vile, a difarence di ce che a vevin fat prime par Pre Berto, no rivavin plui a passâ in canoniche par puartâ doi ûfs o cualchi toc di formadi. E a jerin agns di miserie. Ancje par Pra Saverio, che in plui de fam, al à di vê patît soredut dute chê indiference. Fin che la int di Vile no à viert i voi. E di lì a pôc, il coragjo e la fede di pra Saverio ur varès viert ancje il cûr.   

agns di guere. agns di ricostruzion

Ai prins di Mai dal 1945 la vuere si inviave a finî, ma il so flagjel e il furôr dai partigjans, chei, a restavin une presince vive che Pra Saverio al veve tocjât di dongje (lis testemoneancis in materie,  racueltis ancje su chestis pagjinis di “Buje pore nuje”, a meretaressin un cjapitul a part).

Deventât plevan (il prin plevan) dopo che intal 1943 la vicjarie di Vile di Buie e jere deventade “parochie”, Pra Saverio si inviave in chei agns, tra chês esperiencis umanis e chei episodis di vite e di muart  a deventâ  une vere figure di riferiment. La vuere e jere stade  pardabon dure par ducj e la int, ancje cuant che no le domandave, e veve bisugne di sintî une peraule che no fasès dome cubie cun “ocupazion, miserie, fam, disperazion”. “Predi de int” di lì indenant al sarès simpri stât e par chê int al sarès in curt deventât ancje il “predi de ricostruzion”.

Forsit, a pensai ben, no dome des sôs glesies, ma  ancje di une gnove sperance scandide in chê frase ripetude ai amîs plui cjârs “O ai tante fiducie des robes che si crodin impussibiles”. E dute cheste fiducie Pra Saverio al à di vêle tirade fûr ancje intal 1949 cuant che Bonsignôr Nogara, in visite pastorâl a Buie, i à domandât di  tornâ a meti in sest la glesie. Fate! Se il gjeni de costruzion e dal inzen al veve di saltâ fûr, chel al jere il moment just! Se a judâlu e a dai la ispirazion e sedi stade chê Vergjine Sante de Salût, partide 75 agns prime di Haidhausen, chest nissun sa. Sigûr al è che la opare de gnove glesie e varès vût di rindi onôr propit a chê ricorince e a chê  presince de Vergjine a Buie. E cussì al fo. In cuatri e cuatri vot Pra Saverio al veve contatât l’architet Leo Morandini di Cividât e cun lui al veve studiât il progjet. Om di grande culture, oltri che di inzen, Pra Saverio al à di vê capît “un cualchi alc” ancje di art.

Fat sta che dopo chel tor, che za ai 11 di Dicembar dal 1950 al misurave 7 metris di altece  e che, completamentri finît, Bonsignôr Nogara al benedive l’an dopo, la glesie dal popul di Pra Saverio e deventà a sô volte un piçul zoiel di art. Cui siei 14 panei in bronç de vie Crucis, donâts di artiscj  celebris, tra chescj il famôs scultôr di Gjenue Edoardo Alfieri che za la sere de scree de glesie al imprometeve a pra Saverio di realizâ ancje  i rilêfs in piere di St.Pieri e Pauli; la statue di mieç metri di San Zuan  che Troiano Troiani, grant scultôr di Buenos Aires al veve  inviât pal Batisteri de glesie; lis vetradis figuradis e il grafìt diAlessandoro Riccardi di Netro. Dome par nomenâ lis principâls oparis d’art di chê prime ricostruzion dai agns ’50-’60.

Purtrop il taramot dal 1976 al varès vanificât un grum di chel sfuarç riconstrutîf. E, se no dut, ma une buine part e varès scugnût tornâ a jessi fate.

i ûfs de ricostruzion

“Nô, che tai agns ’50 o vevin tra i 12 e i 17 agns, cun pra Saverio o vevin un bon rapuart. O stevin atents parcè che cun lui si podeve scherçâ fin a un ciert limit (une vore contignût), ma o vevin ancje capît che il personaç al podeve jessi interessant. E po, di tant in tant, o nô, o lui indi cumbinavin une par podê ridi parsore cualchi setemane. Cussì, sul finî dal istât, al jere sucedût che un trop di nô  al fos rivât in parochie juste in timp par pierdisi une sene che dopo, Celso Santi, protagonist de barzalete nus veve contât in ducj i detais. 

Al jere capitât che dopo vê fat dute l’istât a lezion di latin dal predi, che nol voleve propit jessi paiât ni di bêçs ni di nuie, in chê dì si jere presentât distès cuntun cunin che sô mari e voleve regalâ a Pra Saverio par ricognossince. E tant che si usave fâ, il cunin al jere vîf. Anzit disìn propit “vivarôs”, e cussì ferbint che vierzint la sporte al veve petât un salt e dopo un atim di sbaldiment al veve tacât a cori ator pe canoniche: e sù su pes scjales, e dentri tal studi e fûr pe cusine… il cuninut denant e Pra Saverio e Tilde (la sûr che e viveve cun lui) daûr a cori. Fin cuant che, dome in glorie di Diu, o disevin nô, la besteute  si jere lassade cjapâ. Ce numar!! E trop inrabiade che e jere Tilde cul plevan che al continuave a ridi!

 Cun lui nô si cjatavin  soredut la domenie dopo gjespui cuant che par cjapâ sù bêçs par fâ i lavôrs de glesie, nus mandave a vendi la Vite Catoliche o a cjapâ sù ûfs pes fameis. Nus dave un cuadernut. Li, nô o vevin di segnâ dut ce che o vendevin e che o tiravin sù parcè che i conts a varessin vût di tornâ.

Pra Saverio al à simpri vude cheste smanie di rindi cont ae int di ce che al cjapave, des spesis che al faseve pe glesie, di ce che si tirave sù cu la pescje de Madone de salût e di ce che al rivave a dâ in beneficence atôr pal mont. Insome une vere “fisse”, fie di  chê dissipline e chê coretece che o vin bielza dite.  E chei ûfs? Se Pra Saverio nol rivave a vendiju al poleçâr di Mels o di Tonçolan, Tilde e veve cûr di metint vie doi o trê par fâ une fertaie a so fradi. Pecjât che un grum di voltis, cuant che e lave a ciriju a jerin za sparîts: Pra Saverio ju veve  puartâts a cualchi famee che e veve plui bisugne di lui!”

Predi de int, Pra Saverio al saveve cuasi dut di ducj stant che lis sôs zornadis lis passave propit tra  i siei parochians, tra chei che di lui no volevin propit savênt o tra chei che nol vedeve mai a messe: nol veve impuartance. Cun lôr al fevelave, voies o no al indutrinave, al lassave une peraule divierse par ducj e se al podeve al cirive di dâ une man a risolvi piçulis cuestions tant chê…lis pensions. In paîs, soredut intai ultins agns ’70, al jere famôs par cheste grande abilitât a fâ conts, calcolâ agns che a mancjavin, che a restavin, si studiave lis cjartis e dispès al tirave fûr lambics e soluzions… e par tancj di lôr si jere fat plui di cualchi zîr a Udin tai ufizis Inps par risolvi cuestions intrigadis. In citât, dut câs, al jere distès almancul une volte ae setemane par cjatâ i malâts ricoverâts.

Chê e je simpri stade la sô prime mission. Par chei che a stavin mal al veve une atenzion speciâl. Di une cjase a chê altre, di un ospedâl a chel altri al jere simpri a puartâ un confuart.  Dulà che nol rivave cu la sô biciclete, intai agns plui furnîts di mieçs publics al sarès rivât  cu la coriere o cun cualchi anime gjenerose che tant di fâ un viaç e une tabaiade cun lui si sarès cjapade il timp di puartâlu. Soredut tai ultins agns 70/’90 al  sucedeve di spes. Fevelâ cun chest om une vore inteligjent, cuntune schirie di contats vie pal mont e une sdrume di esperiencis sul gropon al jere un onôr. Sintîlu a contâ al jere un plasê… 

pra saverio beinat al contave

“Il Friûl al jere une zone  depresse, plen di miseriis e di dibisugnis. A Rome no volevin scoltânus, ma in cualchi maniere bisugnave fâjal jentrâ tal cjâf. Di dut chest, in chei agns, tra il 65 e il 70,  la int no someave capî nuie, lassant la sensazion di jessi sotane par sielte: par chest bisugnave stiçâle a cjapâ cussience  des condizions che e jere tignude la nestre regjon”. Cussì al contave Pra Saverio cuant che al ricuardave chel document che al veve butât jù insiemit a Pieri Londero (miôr cognossût tant che Pieri Pizzul) professôr dal seminari di Udin e so grant amì e confident, bonsignôr Natale Perini, arcipredi de parochie di Cividât, e pre Giuseppe Cramaro. Si tratave di une mozion nassude par denunciâ une volte par dutis la opression e l’isolament dal Friûl che une vore lontan dal boom economic che chês altris regjons a jerin daûr a vivi in Italie, al pative invezit il boom des casermis, lis servitûts militârs e la depression economiche. 

A chê denunce, cognossude tant che “mozion dai  predis furlans” intal 1967 a vevin aderît cuasi ducj i predis furlans, tant che intun mês di lavôr si jerin cjapadis su plui di 529 firmes. Strade fasint intant,  al vigneve indenant chel Moviment Friûl nassût juste l’an prime de Mozion dai predis  dulà che lôr a varessin podût poiâ dome dal esterni stant che a vevin la proibizion di jentrâ e vê carichis in partîts politics.  Pre Checo Placerean e  in part ancje Pra Saverio a  vevin vût di sigûr un rûl avonde atîf te fondazion di chel moviment. Par lôr, dut câs, si sarès in seguit dome tratât  di difindi la int, frontâ cuestions sociâi e morâls che a tocjassin fats di cheste societât etniche intune regjon smenteade di ducj, cirint di meti i dêts su lis plaies e stiçant ce che a podevin. Tignìnsi in ducj i câs fûr.

E Pra Saverio al faseve la sô buine part intal puartâ indenant lis sôs ideis in materie. Al crodeve in maniere ferme, sclete, indiscutibil a une  autonomie regjonâl, ae necessitât di salvâ e prudelâ lis tradizions, la lenghe e la culture furlane. A cheste bataie in chei agns al partecipave cence metissi tant in evidence, come simpri lavorant par sot, ma imbusantsi dapartut dulà che al coventave. Za inserît inte scuele libare furlane, insiemit a Pre Domenico Zannier, intal 1963 al veve scomençât a lavorà ancje cul gjornâl “Int Furlane”.

“Cun nô in redazion, - al conte cumò Tarcisio Venuti, diretôr dal sfuei - Pra Saverio nol mancjave un incuintri, une riunion; al à scrit tant, puartant indenant e pandint une vore, dulà che al podeve, lis dibisugnes e lis aspirazions  de sô int di Vile di Buie, di Maian, di Mels e di chê sô tiere culinâr.

Intal moment che si batevisi par une Europe di mieç, la “Mitteleuropa”,  Pra Saverio al è stât ancje in chel grup di predis che al cirive di smovi e  recuperâ la part patriarcjine e la sô culture; in cheste suaze, adun cuntune comission di predis des diocesis di Udin, Gurize e Pordenon, al à colaborât ae stesure dal Messâl par furlan, autorizât dal vescul di Gurize, Bonsignôr Pietro Cocolin e po  presentât  a Aquileie;  insiemit a Pre Checo Placerean e Pieri Londero al à promovût la traduzion dai Vanzelis; cun Pre Pieri al veve invezit  scomençât a voltâ diviers libris de Biblie che a varès vût di jessi tradote dute insiemit a Bonsignôr Copolutti e forsit Pre Domenico Zannier. La muart di Pre Pieri e à invezit cjonçât il progjet. 

masse orgoiôs par jessi sotan.

A jessi puartât fin in font al sarès stât invezit il progjet de seconde ricostruzion de Glesie di Vile, dopo il taramot. Sdegnât par chê visite dal Comissari dal Guviêr, On. Zamberletti che intal mês di Lui dal 1976, dopo vê fat il zîr dai comuns taramotâts,  al jere tornât a Rome cence  passâ a visità Buie e i siei claps sdrumâts, Pra Saverio al decideve che la sô ricostruzion se sarès fate di bessôl, cence domandâ nuie ai sorestants, cence spetâ che si degnassin di interessâsi concedint cuissà cuant i lôr contribûts.

Orgoiôs, come che al jere simpri stât, plen di fiducie di chei miracui impussibii, come che al diseve lui,  za intal 1976 Pra Saverio  si tornave a “tirâ sù les manies”. Cun lui, cun grande solidarietât, la sô int. I timps des clapadadis a jerin pardabon un ricuart lontan. Su chê aree de vecje glesie, demolide tal Dicembar dal 1977, ai prins di Zenâr dal 1978 Bonsignôr Battisti  al benedive la piere dal gnûf edifici progjetât dal architet D. Manzoni. Al fo consacrât ai 18 di Otubar 1980. 

Chê di Vile e jere la prime glesie tornade a fâ su in Friûl dopo il taramot. Nol jere merit so, al lave dilunc a dì il confermât predi de ricostruzion, Pra Saverio. Dut al jere stât pussibil, al diseve, in graciis des tantis donazions dal popul, de int di Buie emigrade tal forest, di ducj i fornasîrs dal Trivenit, de Austrie e de Gjermanie. Ma il merit, lu savevin ducj, al lave di sigûr in primis a lui che chê int al veve savût tignîle dongje in maniere sincere, spontanie e di chel so popul al veve savût lassâsi preseâ; chei materiâi e chei modons recuperâts cul furgon in Austrie, o chel ciment vût di Monselice, il plui des voltis a jerin la fadie dai siei viaçs.

E chi la volontât, il volontariât e la grande solidarietâ che rivave un pôc di dut il mont e la grande amicizie cui lôr aiûts inesauribii, soredut des comunitâts di Onigo, Como e tantis altris, a son stâts pardabon miraculôs. Cussì e conte la int di Vile che di chel piçul zoiel plen di ricjecis che e je la lôr glesie, cumò si sint une vore braurose. Ultim ricuart che ur reste dal lor predi costrutôr, deventât bonsignôr intal 1985,  e je la gleseute di Tonçolan. Pardabon ultime opare di Pra Saverio prime di lassânus par simpri ai 17 di Setembar 1997, daspò 50 agns di edificazion umane de sô int.