Nissun paîs in Friûl al à come Buje l’onôr di vê dât ae Glesie in timps resins doi Vescui, un adiriture Arcivescul di Udin. Nome dal 2000 Tumiez al à vût il privilegjo di dâ ae nestre Diocesi il Vescul di cumò, Sô Ecelenze Pieri Brollo. L’an passât e son stâz juste 200 ains ch’al nasseve a Cjamadùs Dree Casasola ch’al deventarà Arcivescul di Udin. E dal 1846 al nasseve a Sacastoe Aureli Briante ch’al deventarà Arcivescul di Alessandrie d’Egjt. E son dôs personalitâz che cui faz e àn onorât la patrie e la glesie di Crist! Lôr e son un esempli vîf di ce maniere che si po sei boins citadins e insieme boins cristians fedêi a Diu.

Sô Ecelenze Monsignor Dree Casasola al è nassût a Cjamadùs il 26 d’avost dal 1806 e la dì dopo al fo batiât di pre Tite Troiano. La sô e jere une famee di contadins che tirave indenant come che podeve. So pari al scugnì lâ a vore durant l’astât par uadagnâ il pan par sé e pai fruz.

Ancje Dree al scugnì partî cun so pari pa l’Austrie. A pît ben s’intint, parceche la ferade no jere ancjmò finide. Si conte che durant il viaz te cosse di so pari une poare vecjute e domandà la caritât e che so pari j disé: «O soi poar ancje jo e no pues judâus!». Ma chê j rispuint: «No steit a lamentâsi ch’o vês la furtune te cosse!».

A 8 ains il pizzul Dree al fâs un at di coragjo. Al scjampe dal alogjo di so pari in Carintie e al torne bessôl a pît a cjase. Lui al ûl lâ predi! Cussì al comence a studiâ sot la guide di un predi di Artigne, là ch’al leve ogni dì puartant tal fazolet la mangjative par misdì. Al invià cussì la sô scuele di culture. Dopo al jentrà in Seminari dulà che subit s’inpon pe sô volontât e pe discipline. A 25 ains il 4 di avrîl dal 1831 al podè dî la prime Messe te glesie di San Scjefin tra la gjonde di dut il paîs.

Il Vescul Lodi, che lu stimave une vore, lu destinà subit in Seminari come professôr dal Gjnasio e dopo pôs ains a la catedre di teologje morâl. Dal 1842 al ven incaricât di regi come Retôr il Seminari minôr di Cividât. Ma dal 1848, par cause dai ribaltons politics di chel an, il Seminari al fo soprimût.

Ae direzion dal colegio in chei ains al unì carichis delicadis che dimostravin la sô inteligjenze pronte e che movevin la fiducie dai superiôrs. Al vignive clamât a predicjâ pardut, suscitant amirazion pe sô dutrine che entusiasmave la int. Soredut a Madone di Gracie dulà ch’al lave la domenie. Il gnûf Arcivescul Mons. Zacarie Bricito lu nomenà so diretôr spirituâl.

Dal 1853 don Casasola al devente Vicjari gienerâl de Diocesi di Udin e dal ’54 Cjaluni de Metropolitane. L’an dopo Pio IX tal Concistoro dal 23 di setembar 1855 lu nomene Vescul di Concuardie.

La consacrazion episcopâl e ven in circostanzis straordenariis dal 1856 te capitâl dal Imperi austro-ungaric a Viene dulà che si tignive une adunance dai Vescui dal grant domini asburgic. Monsignor Casasola al ere l’unic no ancjmò Vescul e par chel al ven consacrât cun grande solenitât l’11 di mai. Al celebrave il Nunzi ae Cort di Viene Mons. Viale-Prelà apene nomenât Arcivescul di Bologne cu l’assistence dal Vescul di Udin Mons. Trevisanato e chel di Milan il Cardinâl Romilli. Presinz a erin ducj i Vescui dal Lombardo Veneto e dal vast domini dai Augsburgs.

Tornât in Friûl il Vescul Casasola al cjapave possès de sô Diocesi di Concuardie, dulà ch’al restà pôc timp parceche Pio IX lu destinà ae Diocesi di Udin che ere vacant pe promozion dal so Arcivescul Trevisanato a Patriarcje di Vignesie. Infati il 29 di novembar dal 1863 il nestri Vescul “tra la fieste plui sclete dal popul – e còntin i gjornai dal timp – al cjapave possès de sô gnove Diocesi”.

Riassumi in pocjs riis l’opare monumentâl di ben e di pietât, di pastorâl e di caritât svolte di Monsignor Casasola tai vincjeun ains ch’al guidà la nâf di Pieri in Friûl nol è facil. Tal dificil compit lui al restà simpri leât al Pape e a l’Imperatrîs d’Austrie Marie Ane di Savoia che j forin vissins.

Il Seminari al fo simpri la “pupile dai soi voi” che se nol fo suprimût des les dal timp al fo merit so. Al Istitût al lassà, murint, ducj i soi bens. Fra lis duris dificultâz dal timp al fasè simpri la visite pastorâl a dutis lis glesiis, ancje aes plui pizzulis e lontanis e dut al ûl viodi. Al à inculcade la devozion al Cûr di Gesù e ae Imacolade Concezion. Devotissin de Madone, al consacrà la Diocesi ae Madone di Gracie, al organizà pelegrinagjos a Madone di Mont. Fedelissin al Pape al lè plui di une volte a rindi onôr al Sucessôr di Pieri. La Sante Sede lu incaricà di studiâ questions dificilis e delicadis. Al partecipà al Concili Vatican I e al fo presint ae proclamazion dal dogma de infalibilitât pontificie che al veve aprofondît cun studis e conferencis. Pio IX lu vè simpri cjâr e in ocasion dal so giubileo episcopâl j invià il regâl preziôs di un cjalis. Il Vescul Casasola al fo un dai plui impegnâz par otignî il privilegjo de celebrazion des tre messis il dì dai muarz.

La vite privade dal nestri Vescul e ere austere; quasi claustrâl. Al faseve la caritât a ducj chei che batevin ae sô puarte. Ma al vè une vore di sufrî a cause di une stampe partigjane e massoniche, par sopressions di glesiis, par profanazions, par caluniis e infedeltâz.

Dal 1866, quant che il Friûl si unî a l’Italie, qualchidun al rivà a passâ la puarte dal episcopio e cu la scuse di un Vescul austriacant e antipatriote e butàrin paraiar dut il vescovât, robant ce che podevin cjatâ. Casasola al rivà a salvâsi di chei spirtâz par une scjale secondarie e butansi su lis spalis un mantel neri.

Il Vescul al restà par un an sierât tal so palaz. “Quant che qualchidun al scrivarà di chel ribalton – al è stât scrit – al scugnarà ingropâ il non di Dree Casasola a chê schirie gloriose di Vescui che plui instancabilmentri e lavorarin e plui a lunc e penàrin pe glorie di Diu e il triomf de Glesie”.

Monsignor Casasola al murì te Abazie di Rosacis il 12 di avost dal 1884 e al fo vaît di dut il Friûl. Il funerâl si tignì a Udin il 14, tra une fole di int vignude di dute la regjon, a la presince di dutis li autoritâz religjosis, civîls e militârs. La sô tombe e jè te capele dal simiteri di Udin.

Sô Ecelenze Monsignor Aureli Briante al è nassût a Sacastoe il 1ⁿ di lui dal 1846 in une umil famee di agricoltôrs e emigranz. Sô mari e murì quant ch’al ere ancjmò in fassis e so pari al passà a secondis gnocis. Par mancjanze di afiez sincêrs, mâl capît in cjase, mincjonât dai fruz de sô etât, al vignì su timit e salvadi. Su la puarte de cjamare al veve scrit cun tun claut: “Memorare novissima tua et in aeternum non peccabis” “Ricuarde che tu as di murî e no tu pecjarâs in eterno!”. Al cjapave gust nome cul lâ a scuele e a dutrine, passant pai boscs di bessôl, cui soi siums di frut. Ma un predi dal luc, pre Zuan Ursella, sinacuargè di chel frut solitari e al indovinà l’anime buine e la lûs de inteligjenze che si viodevile tai voi dolzs, e al scomenzà a protegilu e a curâ la sô istruzion.

Cussì chel zovenùt al voleve deventâ predi. Dopo bataicis cui gjenitôrs che no volevin savent, al jentrâ tal convent di Sant Antoni di Glemone come novizi. Lì al restà fin al 1865 cun profit, tant che al fo inviât a Giaffa di Jerusalem par completâ i studis e imparâ lis lenghis. Il 25 di lui dal 1869 fra Aureli al rivà a dî la sô prime Messe tal Santissin Sepulcri di Gesù a Jerusalem.

Al comenzà la sô vite di predi a Cipro, come Missionari apostolic da l’isule cul compit dal insegnament tes scuelis grechis. Dopo siet ains al fo riclamât come Prefet dai novizis a Betlem. Ma subit dopo al fo mandât in patrie, a Verone, come mestri di lenghis arabis e grechis. Dal 1884 al fo nomenât Vuardian dal Sant Sepulcri, cariche che lu poneve a capo di dutis lis Missions d’Orient.

Dal 1887, dopo vê plui voltis preât il Ministro Gjenerâl dal Ordin di esonerâlu da l’incariche, al vignì a Rome e al rivà a vê un sucessôr. No si sa parceche al otignì la sucession. Ma in chê volte la Vuardie dal Sant Sepulcri e veve un’impuartance grandissime no nome sot l’aspiet religjôs, ma ancje sot chel politic internazionâl. La Provincie francescane, metude sot il protetorât de France, e ere componude di sogjez che vignivin di dutis lis nazions, no nome da l’Europe ma ancje dal paîs dal governo turc e de diplomazie europee al jere tignût come une specie di staterel internazionâl. Di chi duncje facilmentri e podevin dipendi lis dificultâz di pari Aureli.

Prime di tornâ in Tiere Sante fra Aureli al vignì a Buje tal setembar dal 1887. “Al cjantà Messe e al predicjà te glesie mari lassant une cjarissime memorie di sè”, al scrivarà il Plevan Mons. Venier tal Libri storic de Plêf. Tai ains 1888-89 lu cjatìn Vuardian dal Convent dal Noviziât. Dal ’90 al è nomenât Pro-Vicjari gjenerâl de Delegazion Apostoliche d’Egjt, cun residence ad Alessandrie, dulà ch’al restarà quatri ains. Dal ’94 infati al ven rielet Vuardian dal Sant Sepulcri. Pari Briante al ere pront cumò ae delicade mission. Dal ’95 al celebrave une solene uficiature a sufragjo dai muarz talians te zornade di Adua. Scjadût il periodo di Vuardian tal 1900, in setembar al torne a Buje dulà ch’al podè viodi la maestose fabriche dal domo apene finide. «Cui sa che chest an ch’al ven o puedi fâ une scjampade pe consacrazion? Deus scit», al scriveve par furlan a Mons. Bulfoni, il gnûf Plevan.

Ma la Providence e veve altris plans su di lui. Il 8 di setembar dal 1904 fra Aureli al vignive consacrât Arcivescul di Cirene in Libie e destinât a sucedi al so mestri e superiôr, l’Arcivescul Bonfiglio in Alessandrie.

Dal 1910 Sô Ecelenze Monsignor Briante al podè pe ultime volte viodi l’Italie. Di Glemone dulà ch’al ere rivât al scriveve a Mons. Bulfoni: «O soi partît d’Alessandrie d’Egjt il 10 di chest e o soi rivât a Triest il 14 a lis dîs oris di matine, di là sul vapôr di tiare soi rivât a Glemone a lis cinc di îr sere. Soi un pôc strac e o ai bisugne di polsâ culì un pôc. Intant a V. S., ai cjars predis, a miò fradi Tite, a Zef Venturini ec. ec. une particulâr Benedizion e un cordiâl salût». Buje lu ricevè cui onôrs dovûz a un so fi lustrissin. Tal domo lui al tignì un cors di predicazions ch’al clamà une fole enorme, ancje dai paîs vissins, e che si sierà cun tun soleni pontificâl e cu la procession de Madone dal Rosari.

Monsignor Briante al tornà ad Alessandrie e al tignì la cariche fin al 1922. E forin disevot ains di mil ocupazions e preocupazions par solevâ miseriis e dolôrs, massime chês procuradis de prime grande uere mondiâl dal ’14 al ’18.

Ma il so governo materiâl nol fo di mancul. Prime di dut lis scuelis ch’al favorì in ogni maniere, convint che la formazion inteletuâl e fos la prime condizion pe promozion di un popul. Cussì a Nazaret, a Jerusalem, ad Harissa, a Bosset, a Betlem, Giaffa, Maràsc, Ismailie, Suez, Porto Said, Tiro, Der Mamas, Knaie, Jacubiech, Limassol e altris istituz. Al promovè il restaur di glesiis e capelis, simiteris e locai glesiastics in dute la Tiere Sante. Al fondà gnovis glesiis a Bolasco, al Cairo, Antiab, Maràsc e Belfage. Al preparà progjez e al tirà dongje materiâi pes glesiis di Emmaus e Nicosie. Al comprà la Val di Gjosafat e al ordenà scavos archeologjcs al Tabor. A Nazaret al tirà su la Cjase Gnove pai pelegrins che podeve tignint fin a dusinte. Al amplià la Cjase di Jerusalem. Al tirà su il lebrosari feminîl des Missions francescanis a Jerusalem. Al fondà abitazions pes popolazions di Jemingekale e Muginkderesi. Al judà i colegios serafics di Washington e di Giaccherin in Toscane, mantignint fin ae Messe dîs elemenz che si preparassin a lâ te Custodie di Tiere Sante. Ma no si còntin i santuaris ch’al judà pal restaur, proviodint cjampanis, aredos sacris, cjasis e terens che servivin a decorâ i santuaris dai lucs de Redenzion.

Soredut sflandorose e fo l’opare di Monsignor Briante ta l’Armenie Minôr dopo i massacros dal 1895. Dut il so zelo di Vescul e di apuestul al doprà par fâ resurî e flurî il cristianesim ta chê tiere sconsolade. Al tornà a tirâ su glesiis, cjasis pai missionaris, orfanotrofis, scuelis e abitaziones pai cristians.

Al favorì il Vescul Briante les publicazions riguardantis la storie dal Ordin in Palestine, comenzant de serie cronologjiche dal Pari Gulotovich fin ae opare monumentâl de Tiere Sante e dal Ordin dai fraris minôrs.

Durant il so governo si ricuarde la visite ai Lucs Sants dal re Vittorio Emanuele III, di Rico duche di Orleans cun sô sûr Eline, di Don Carlos di Borbons cu la femine, da l’Arciduchesse Stefanie d’Austrie, dal Arciduche Carlo Luigi fradi dal Imperatôr.

Une ativitât no comune il nestri Vescul al impiegà pe difese dai Lucs Sants de nestre Redenzion, mostransi omp di fede e di coragio cuintri dutis lis insidiis e i atentâz dai nemîs di Crist. Si metè cuintri lis inovazions tentadis dai scismatics su la Tombe de Madone te Val di Giosafat. Al protestà cuintri lis violencis fatis dai grecs tal Getsemani e a Betlem.

Ma cheste no jè che une part de ativitât fate dal nestri concitadin pe difese e promozion dai Lucs Sants de Redenzion.

Monsignor Aureli Briante al rinuncià ae cariche tal 1918 e si ritirà tal Convent dal Sant Salvadôr, dedicansi ae prejere, meditant su la vite e la muart e spetant la grande clamade. Al murive a Jerusalem tal Convent di San Salvadôr il 18 di lui dal 1929. Al fo sepulît cun grande partecipazion di autoritâz e di popul in une tombe de antighe basiliche dal Getsemani.