Sul principi dal tierç milenari la diocesi di Udin e à doi vescui a disposizion. Sô Ecelenze Monsigor Fredo Battisti e Sô Ecelenze Pieri Brollo. Il prin si è fat furlan tal pensâ, tal cjacarâ e tal stâ cu la int furlane. Cumò al à une cjase a Tresesin, daûr il santuari de Madone tal ciscjel. Monsignor Brollo al à cjapât puest tal palaç patriarcjâl e al à tacât a lavorâ pal ben de sô tiere. Lui al è il secont vescul furlan dopo passe cent ains di Monsigon Dree Cjasesole di Buje!

Monsignor Battisti al è rivât a Udin tal 1973 tun moment critic de arcidiocesi par vie de crisi che si ere creade cence colpe di Monsignor Zaffonato. Il vescul Monsignor Pizzoni al veve metût a puest la part economiche, ma il suspiet de int al ere ancjmò fuart. Ma subit dopo al è vignût il taramot dal ’76 e il vescul al fo il prin a lâ tai puescj plui sdramassâz e provâz dal dolôr. Ancjmò al ricuarde il vescul chei momenz, chês rispuestis dolorosis, chês scuviertis plenis di torment. E dopo al è vignût il Sinodo dal ??? e dut chel ch’al è vignût dopo. Ma lui al è stât par ducj simpri di esempli e di cunfuart. Cu la sô vite al à tirade su la sô glesie dì par dì. E cumò o volìn dîj grazie dal plui profont dal cûr!

Monsignor Brollo al è chel ch’al ûl continuâ l’opare cence interuzion. Al à zà començât a lavorâ cence soste pe sô glesie. Cu la esperiense che j ven dai ains passâz in Friûl come professôr, come retôr, come plevan di Dimpeç e di Glemone e infin come vescul di Zui e ausiliâr di Udin, prime di lâ a Belun e Feltre, al po fâ tant ben cumò ch’al à la responsabilitât direte de nestre diocesi. Par lui o preìn il Signôr che lu judi e ch’j dej tante gracie pal ben di ducj. Ad multos annos!