El 6 di Novembar dal 1893 in te famee "dai Polezzârs" 'e jè nassude Romilde Guerra: 'e ere fie di Pieri e di Anzule Papinutti "chei di Gjulie" ch'e veve vût sedis fruz, ma ch'e 'erin restâz vîs nome sîs; jê 'e ere le tierce.

Come le majorance dai 'zovins di chel timp 'e veve frequentât le tierce elementâr e plui grandute 'e judave i gjenitôrs in tai cjamps e plui tart cui fradis 'e ere lade a lavorâ su les fornâs de Ongjarie e de Gjermanie cun so barbe Selest Papinutti di "chei di Gjulie". Romilde 'e veve une indule dolce, ubidiente; 'e lave vulintîr in glesie a preâ.

Ma quant ch'e veve palesât, ai soi di famee, l'dee di fâsi muinie, so pari nol veve volût sintî reson: "No tu as voe di lavorâ", i veve rispuindût. Cussì quant che si ere fat indenant Nardo Calligaro "chel de Cuche" a domandâle in spose jê 'e veve scugnût ubidî ai soi e lu veve cjolt.

Al ere l'an 1915, jê 'e veve 22 ains. In chel periodo 'e ere scomenzade le Grande Vuere dal '15-'18 e Nardo, sîs mês dopo sposât, al ere stât clamât al front a fâ trincees in te Valade di Dogne. Une gnot Romilde si ere insumiade di jessi a cjâf di une grande procession, puartant su pe schene une crôs e di sintî le vôs dal so omp che le clamave e i diseve: "Cheste 'e sarà le tô strade!".

Pocjes zornades dopo chest sium 'e rivà le notizie de sô muart: 'e ere colade une granate propit dongje di lui e lu veve fat precipitâ in tun foram, i soi compagns lu vevin sintût a lamentâsi par tre zornades. Le sô femine ae fin de vuere, 'e lè a pît e cun tune crôs a preâ in chel puest che al ere deventât le tombe dal so spôs. El mês di mai dal an dopo a Madone al jere rivât un predicjadôr a fâ conferences, si clamave don Patrizio de Luc, e Romilde 'e cjatà el coragjo di confidâj i soi pinsîrs e i propris desideris.

Lui alore le veve conseade di voltâsi a une nobildone vedue che si clamave "Madre Teresa Grillo Michel" e ch'e veve apene fondade une congregazion in Alessandrie, indulà ch'e acetavin ancje les vedues, e si clamave "Piccole Suore della Divina Provvidenza". Il cugnât di Romilde al voleve sposâle, ma jê aromai 'e ere libare di decidi de sô vite e cussì 'e lè dai soi gjenitôrs a visâju ch'e sarès partide par Alessandrie par lâ a scomençâ el noviziât; al ere el 14 di fevrâr dal 1920....

Dopo un an le "Madre Fondatrice" le veve sielte par mandâle in Brasil a S. Paolo a finî el tirocinio e podê imparâ dôs lenghes: Spagnûl e Inglês. Cul non di "Suor Flaminia" 'e ere deventade muinie el 9 di genâr dal 1923 e el so tacament aes regules de mari fondadore lu veve dimostrât apene rivade lajù, refudansi di acetâ les gnoves idees di separazion de cjase origjnarie ch'e 'erin nassudes in chê sede e cussì 'e veve preferît trasferîsi tal convent di Rio de Janeiro.

Qualchi an dopo 'e sarà nomenade "Madre Superiora" in tal convent di Campos a Ubà, dulà che duc' i volevin ben e le rispietavin parceche jê 'e ere une mari comprensive pe comunitât e di esempli a dutes les suores pal so spirt di sacrifici e po sô fedeltât ai dovès religjôs. In tal 1931 'e fo elete "Madre delle Novizie": un compit une vore delicât, dulà ch'e veve dimostrade dute le sô inteligjenze e el so grant cûr, cirint di educâ les 'zovines al vêr pinsîr religjôs de Congregazion, capint di vê une grande responsabilitât.

El "1° Capitolo Generale" al fo fat in tal 1936 e jê 'e ere stade clamade in Italie par jessi presint. Tal 1939 'e fo nomenade "Madre Provinciale del Brasile". A jè i semeave impussibil di jessi buine di fâ un lavôr cussì impuartant e impegnatîf, tant grande 'e ere le sô umiltât. Dilunc i sîs ains passâz sot le sô direzion, le Congregazion dal Brasîl 'e veve vût un grant svilup tant spirituâl che materiâl, vint rivât a ingrandî il convent e el gnûf colegjo indulà ch'e po devin studiâ les 'zovines dal puest.

Ae fin de Seconde Vuere Mondiâl, in tal 1946, le clamàrin in Italie pal "2° Capitolo Generale", jessint muarte le fondadore "Madre Teresa Grillo Michel". Si ere imbarcjade el 31 di lui sule nâf "Duque de Caxias", ma di gnot al ere scopiât un incendi e jê cun dôs muinies si ere salvade par meracul saltant fûr pal oblò de gabine. Purtrop però âtres dôs 'e restavin brusades insieme a tantes âtres persones.

Dopo un mês si imbarcjà di gnûf e 'e rivà in Italie pes votazions, juste in timp par jessi nomenade "Madre Vicaria Generale". El so desideri al ere chel di tornâ in Brasîl indulà ch'e veve vivût e lavorât par 24 ains, invezit 'e veve scugnût sotometisi al volè de gnove "Madre Generale Camilla Molinari" e restâ in Italie a sostituî cheste ultime ch'e partive par visitâ in convents in Americhe Latine.

Cussì 'e restà bessole a diregi, in tun moment tant delicât come le fin di une vuere, une comunitât ch'e veve bisugne di fâ florî di gnûf les osservances religjoses e rinsaldâ i principis fondamentâi de "Madre Fondatrice". Ma jê 'e ere come simpri serene e fiduciose, oneste e leâl e par chest 'e jè stade definide "la donna forte" che si lei in tal Vanzeli. In dodis ains di "Vicariato Generale" 'e ere tornade a visitâ in Brasil chei puesc' indulà che duc' i vevin volût ben e le vevin venerade.

Al "4° Capitolo Generale" dal 1958 'e fo elete ae massime incjarie di "Madre Superiora Generale". Par sîs ains 'e fo infaticabil in tai soi viaz par visitâ dutes le cjases de Congregazion, par fâ in mût che dut al las indenat second les regules; jê stesse 'e ere un model vivent di dutes les virtûz religjoses e umanes. E vignì riconfermade te sô cjarie tal 1964 e jê 'e continuà cun plui ardôr el so compit e le sô mission. Magari cussì no quatri ains dopo si inmalà e cussì jê, cun tante gjenerositât, 'e volè rinunciâ ae sô cjarie e 'e convocà par dicembar dal stes an un "Capitolo Straordinario" par ch'e vignis elete le sô sostitude.

El 7 di marz dal 1969 'e murì in te Cjase di Rome, ma i derin sepulture in Alessandrie, dongje de "Madre Fondatrice", cun tun funerâl imponent. Al partecipà ancje el Vescul di chê citât e cun chestes peraules le ricuardà ai presints: "Tutti voi sapete benissimo quanto questa Madre abbia fatto durante la sua vita, noi tutti ne fummo testimoni, e tutti l'ibbiamo ammirata nel suo spirito soprannaturale e nell'esercizio delle quotidiane virtù.

Fedele alla sua consacrazione, Madre Flaminia si è consumata come una candela in spirito di umiltà e conservandosi pacificatrice e confortatrice, ha saputo seguire le orme di chi l'ha preceduta". Les visites de agne muinie si trasformavin ogni volte in tun grant e felîz aveniment par duc' i parinc' che in chê ocasion si davin dongje simpri par fâi fieste. Jê 'e scriveve spes a duc' desiderant di vê notizies ancje di duc' i nevôs e pronevôs; si ricuardave parfin dai lôr nons.

Nô le ricuardìn imponent come figure, 'o volarès dî maestose; une muse no biele ma ch'e rivelave une straordenarie fuarce di caratar, dôi vôj inteligjens e luminôs. El so tono di vôs al ere simpr bas e prin di rispuindi 'e veve un atimo di riflession; dopo cun pocjes peraules 'e meteve in clâr le situazion e ae fin 'e faseve bocje di ridi che i inluminave le muse; nonostant chest 'e meteve in duc' un rivuart reverenziâl.

Aes gneces al è semeât just e doverôs fâ cognossi aes gnoves gjenerazions di Buje le figure semplice e inteligjente di une femine de lôr tiere che partint di une umil origjne 'e jè rivade al massim nivel in tal so ordin religjôs pes sôs virtûz di laboriositât, coragjo e onestât che ancje in dì di vuê 'e son tignidues in cont.

O ringrazi i miei cusins pal ajût che mi an dât, in particolâr Flaminie che cui soi ricuarz mi àjudade a fâ rívivi le figure di nestre agne.