I Plevans di Buje

tal secul XX^m

FOTO

Cent ains e son passâts di quant ch’al murive a Buje Monsignor Pieri Venier ma ancjimò il frut de sô opare al reste tes lidrîs di chest paîs. Un secul plen di aveniments ch’e an lassade la lôr olme ancje tal panorama fisic di cheste tiere, e il spirt al è cressût e madurît come une plante tressade. Siet Plevans e son vignûts dopo di lui, ognun cu la sô personalitât, ma l’olme dal Venier e jè restade intate.

Quant ch’al vignì a Buje dal 1864 al cjatâ un paîs unît aministrativamentri ma dividût in tantis cubiis dulà che il segno dal timp al veve lassade la sô olme profonde. Ma lui al veve lis ideis claris e providenzials. Dal 1871 al pon la prime piere par slargjâ la glesie di Mont, centro irrinunciabil e segno de unicitât. No stin a smenteâ che in chê volte al ere Vescul di Udine Monsignor Andree Casasola (1863-1884) di Buje ch’al cognosseve une vore ben la situazion locâl. Cu la colaborazion dai parochians il Venier al lavore d’unviêr parceche vie pal astât i omps e erin ducj pes Gjermanies. Dal 1883 al po benedî la glesie gnove par ducj i citadins di Buje. A Nadâl dal 1896 al benedis lis primis pieris des glesiis di San Scjefin e di Madone. Ma l’an dopo al fo fermât di un colp apopletic. I lavors a van però indenant. Tal  novembar dal 1899 lis glesiis e son finidis. Ma cheste ativitât spasmodiche mo ere che la patine di une funzion profonde che lave incjessint tal fons une cussience dute gnove de unitât parochial. Chest al è il significât profont di un’opare providenziâl che quant ch’al murì dal 1902 al lassà in ereditât ai soi successôrs.

Il prin Plevan dal secul XX^m al fo Monsignor Josef Bulfoni. Ma lui, dal 1902, al fo il continuadôr fedêl de opare dal so mestri parceche lui al ere so cooperadôr fin dal 1885. Si po dî duncje che lui al continuà su la strade dal mestri. Lui infati al completà lis ativitâts materials dal Venier pensant al Simiteri di San Bortul, ae Cjase di Ricovero, ae Canoniche. Ma soredut lui al completà la sô opare spirituâl. Quant che dal 1914 e sclopà la uere mondiâl lui al fo l’agnul dal cîl par ducj i soi fiis sparniçâts pes montagnis. Al cognosseve ducj e a ducj al puartà la sô peraule di confuart e di sperance. Quant ch’al murì dal ’32 al podé dî cun veretât: «O soi vignût poar a Buje e poar o voi cul Signôr!». Ma al lassave une comunitât che sintive la sô paternitât.

Po al vignì nomenât Plevan di Buje il cooperedôr Pre Gjovanin Chitussi che al veve zà in man i problemas de Parochie. I 24 automobii che lu compagnarin in Mont pe prese di possès e forin une nuvitât par ducj. Il mont al gambiave! L’amôr fanatic pe sô glesie  al ere il segno di ce tant ch’al amave la sô int.

Dal 1934 al tirave su la glesie dal Sacri Cûr, dal ’36 al ristorà la glesie di San Bortul, dal ’37 al tache i lavôrs plui impegnatîfs de façade dal domo che ae fin dal an e metarà la sô ultime piere e i ains dopo i puartai, lis cuspidis e i  mosaics; dal ’40 al tire su il tôr di San Scjefin fin a 70 metros e a Nadâl di chel an lis cjampanis a sunin il gloria a Diu tal pui alt  dai cii. Po lis cjampanis di Mont e dal ’45 al fâs il Batisteri cul marmul, cun mosaics e cu la statue di bronz che ten la cape. Il 17 di novembar dal ’45 al fâs consacrâ il domo dal Vescul Monsignor Josef Nogara.

A son ains di une ativitât sbalorditive che an lassât il paîs cu la sô inconfondibil fisionomie. Ma ancje lis animis no son restadis chês di prime. Quant che tal 1934 il Pape al ricognossè ae Parochie il dirit di vê par Plevan un Monsignor (par interessament dal Podestât, di Pieri Menis e Pieri Giampaoli) lui al acetà il fat come un segno dal amôr de Glesie pe int! Il fassisim, la uere, i partigjans, la liberazion cun dut ce che an puartât cun lôr al è come che non fossin pal Plevan di Buje.

E pûr ancje lui al fo par un mês in pereson in vie Spalato par il “continuo contatto coi partigiani”. Ma lui al lavorave par quant ch’al fos dut finît. Dal 1946 lis dimissions e forin acetadis  e Monsignor Chitussi al fo nomenât cjaluni dal domo e capelan des peresons.

Dopo l’an dal Professôr Monsignor Ivo Sant ch’al passà come un fulmin tra i Plevans di Buje, al rivà Monsignor Domeni Urbani, dal 1950. E forin ains dificii pal paîs, ma lui cu la sô grande fiducie in Diu al rivà a tignî alte la fede de int di Buje. Cu la sô predicazion e cul so esempli lis robis plui dificilis si superavin. La sô memorie e reste come une benedizion di Diu. Al mancjà tal 1965.

Dal 1966 al rivà il gnûf Plevan di Buje Monsignor Agnul Cracina. E forin tai prin ains di intense ativitât pal ben des animis. Il paîs al gambiave e bisugnave cori cui timps. Po al vignì il taramot ch’al fasè pierdi a ducj la bussule. La Plêf di Mont ridote a un sdrum di clas, il domo inagibil, la canoniche sdrumade, lis glesiis minôrs di comedâ... la int di sostignî. E forin chei ains impegnatîfs dulà che ognun al pensave par sè e pôs che pensassin aes struturis publichis. Ma Monsignor Cracina, judât dal capelan, des sûrs e de int di bon cûr, al tignì dûr e al fo l’agnul di consolazion par tancj di lôr. Quant che dal 1982 al fo nomenât cjaluni dal domo di Cividât ducj a ricognosserin che chel al ere un segno de Providenze.

Dal 1983 al rivà come Plevan di Buje il Professôr dal Seminari Monsignor Aldo Bressani. Cun dute la esperienze che al veve fat come insegnant di dirit e come diretôr de Caritas dopo il taramot, lui al cjapà a cûr i problemas de Prochie di Buje. La costruzion dal Domo e de Canoniche e forin i prins compis ch’al frontà e ch’al puartà a bon fin. Intant il paîs si rinovave dut, e la Glesie e faseve la sô figure. Lis glesiis di Ursinins Grant, di San Florean, di Tombe e poderin cussì tornâ come prin. E lui al sburtave ducj a completâ, a finî, a fâ biel il paîs. Ma dal ’98 un brut incident a Osôf nus al puartà vie! Dal cîl lui cumò al cjale la sô Buje rinbovade e sflandorose!