No mi baste la lûs dal soreli che mi svèe de gnòt scure e dal so misteri.

No ài avonde di une ploe cjantarine sui cops che mi compagni tal polsâ.

No varès nuje ce contâ al doman se la mê vôs in cjant ’e fos simpri bessole.

El gno mont al è il mont de int, dai afiez, dai confronz.

El mont al è un curtîl, grant fûr di misure, dulà che si gjolt soréli e ploe, si cjàte e si patìs, si vîf el vué e el doman cule serenitât e cule pâs dal rispièt.

’O ài imparât dut chest a Ursinins Pičul là che i borgesans ’e àn vivude le sperance in compagnìe, ’e àn lagrimât pai stes patimenz; ’e an dividudes les esperiences dal timp cun pasšion: cule passion dal stâ insieme.

Al capitave subit dopo la vuere.

El timp, busarât, al va in presse bandonant sul so troj les intenzions ma ancje les robes fates e al propòn cumò ce che al è passât; par chest, se si pò, no si à di pierdi timp. Ma guai a côri!

Nol è Elio pes scarpes: miêi dopo suelades che di gnoves, ni Vitorio a fâ pan, o Ilonka lì di Taboghe a dâ il benvignût cun educazion a Gjovanìn de Gasete, ni Dolfo orlojâr cule lint tal voli par viodi ingranagjos di flabe, ni Noemi ’e puarte il so mus par un tragjìt no impegnatîf fûr de stale, e no son fruz sule ferade o tal curtîl di Siorchèco pal zuc in cumitive, e Sef Tomât nol spete le quote pal turcli.

’E jé muarte a Ursinins le prime centenarie di Buje, Ghessie de Criste ’e veve centetre ains.

Altre int par bontât e meriz ’e jè stade a Ursinins ma mai, a memorie, un predi.

Cumò ancje cheste le vin cuminade e te mancjance si va a meti un tacòn forsit misar (ma intant si scomence) ae caristìe di predis.

Come San Francesc al à scugnût nasši in Umbrie, don Luca al scugnive nasši te famee de Ciane. Nônos e nônes, bisnono e agnes ’e forin timorâz di Diu e boins di animo. Cussì i gjenitôrs.

No savevi nancje di chê vocazion e chês voltes che, a Messe, ’o vedevi un cleric plui vecjut dai fruz di scuele ’o ai pensât ch’al ves pierdude anade e dut al finive lì. Infàti no ài mai domandât a di nissun cui ch’al fòs chel “gjovanoto”.

Ma in chê dì dal vincjevòt di jugn mi soi inrabiât!

Cemût! Al naš un predi e par viodi le fieste, no bandierutes a Ursinins di lì di cjase fin par dut ma, jenfri curidôrs che si viestin dopo le corse, une machigne (sì di epoche) le ài vedude a Sa’scjefin!

Mi soi impensât des mês clapadàries: fates dibant!

Pense tu, te zornade di Storie dal borc mi àn fat chest afront. Ju varès copâz ma, dopo, invesse di lâ ae prime messe ’o sares lât in pereson: nol ere el câs.