Le glesie, grande, imblancjade di roses: tre cjandelîrs a gjestre je tre a çampe di une crôs sul altâr; un galiardèt di chei ch'e compagnin a Lourdes i malâz uardiât di doi carbenîrs in alte uniforme: chest'o ai vedût dal gno puest che, ormai forest, 'o ài robât ae memorie dal Poète di Mont daûr dal confessionâl dongje le puarte in fons.

Un grop mi à strent il cuél co' 'o ài vedût a jentrâ il corteo: tanc' predis, doi monsignôrs, un predi forest.

La glesie, plene, 'e cisiche ma dut al tâs dopo un moment quant che le man apene onzude dal sacri vueli 'e tache: "In nomine patris...". Si scomence el rît che nol à fin. Ecce Sacerdos! "Tu es sacerdos in aeternum secundum ordinem Melchisedech.

Mi ven frêt e di plui mi sint cjapât a strent de emozion e mi giri e i vôi van sul At di dolôr parsore la grate dal confessionâl e dut lu lej, tun flât par no pierdi prejeres e il cjant de Pontificalis dal Perosi.

Po' qualchi peraule di monsignôr Goi che, in latin e tradòt, al dîs a chel che al ûl capî ce che si sta fasint alì e ce che di lì indenant chel zovin predi al cirarà di fâ.

E, jenfri i nons di predis, jo 'o ten a mens chei ch'o ài cognossûz e che mi àn fat ben cul esempli, cu le peràule, cule cognossince e cule fede e mi scjampin i ricuarz dai toi nonos don Luca: Serafin e Gjusepine ma prime inmò Toni che, a Rome, al à lavorât cun gno barbe di Cjassà; e mi impensi de beorcje là che, soresere, d'astât, si leve a sentâsi tal fresc tant che qualchidun al faseve, a pît o in biciclete, el gîr di Colaut.

E po' il Credo, Messe dai Agnui:... et incarnatus est... e si sbasse il cjâf come ai miei timps.

El cjant di Sanctus e Benedictus e po' duc' i predis, cu les mans in protezion e ufierte e tu, gnûf predi tu cjàpis une no umane fuarce: "Hoc est enim corpus.,."etu alcis le particule e jo 'o bergheli dentri di me: "Signôr, 'o crôt" e mi inacuarç di vaî.

E po' el cjant cul Paternoster e po' l'Agnus Dei e infin le Cumunion di dut il Domo. E i motèz dal coro in acompagna-ment.

Al ven che tu fevelis e tu ringrazis e jò no ten a mens tantes robes ma une sì. Tu âs dite di jessi omp tradizionâl: splendit! Par me tu âs dite cussì che tu sarâs un predi.

Di te nissun po' pretindi altri: sei predi come tal cjant: "in aeternum secundum ordinem Melchisedech".

Che Diu ti judi e di sigûr lu fasarà!