Cumò le Madonute nere 'e jè plene di sgrifignades blancjes e il Bambìn al à pierdût el so cjavùt. Dut colpe dal taramòt e de ploe di rudinàz... Ma Santine distès no le à butade vie parceche ancje par jê 'e je plene di memories: le à vidude par tanc' agn sul armâr di sô mari, gnagne Irme, e prime su chel di none Milie Busùt.

Mi visi di cuant ch'i tornavi in vacance dal colegjo di San Pieri al Natison: j levi sù a Sacuèl, te cjase sot el bosc, a saludâ none Milie e jê ogni volte 'e voleve mostrâmi, te sô cjamare, el cassetìn dal so piciul tesaur: rincjns, anêi, pontapèt... Mi diseve di cjoli-sù une robe, a sielte, ma jo no olsavi di tocjâ nuje e j disevi: Unâtre volte! E dopo mi faseve bussâ le Madonute nere che je veve puartade nono Drèe di Monico, ancjmò ae fin dal secul passât, cuant che ancje lui al leve a fâ les stagjons su le fornâs.

L'àur e le Madone! Forsit tal 'subconscio' di none al jere un rapuart tra dôs robes cussì lontanes... Intant le Madone j veve simpri preservât el so omp e j veve dât ancje un pocje di furtune.

Eco parcè che, cuant che Santine si è ufierte di regalâmi le Madone Nere, jo j ài vût tant plasê. Chê statuine di gès, che duc' 'e varessin butât vie, 'e veve cjapât valôr dopo ch'j ài let un biel studi di Pieri Menis sul "Sot la nape" (1977-2). Lui nol saveve de nestre Madonute, ma an publicave une precise puartade a Buje da Giuseppe Ursella di San Florean; 'e jè le Madone

di Altòtting de Baviere, dulà ch'al è un famôs santuari de Madone Nere: "meta continua di pellegrinaggi... ", al dîs Menis.

Posto che pai studiôs les madones neres 'e àn un revòc di antighes divinitâs de fertilitât, j scuèn dî ch'e à vût efièt pe mê none 'prolifica; ancje cence clamâ in cause el 'subconscio !