Nadâl e jè le ocasion che si ricuarde le nassite di nestri Signôr. Cheste e jè l'origjne, el struc di cheste fieste. Quindi une lidrîs cristiane, su le quâl si è davuelt ancje dut un clime sociâl gjenerâl, dute une serie di manifestazions civîls, che àn tirât dentri par intîr les civiltâz ocidentals; dutes in tal agâr de bontât, dal stâ insieme, de riconciliazion, di fâ e fâsi fieste in famèe, cun rivuart pai fruz...; rivant a deventâ tradizions socials, cence contâ les cerimonies religjoses (pûr simpri impuartantes e partecipades), e a jentrâ tal cûr di dutes les persones, no dome dai cristians: le fieste di sigûr pui popolâr e pui sintude, tra dutes.

Un spirt, chel dal Nadâl, talmentri fuart che, al merte ricuardâlu, in tantes ocasions al à rivât fintimai a fâ tasê, magari dome par pôc, el davoi des armes in plene vuere.

Un clime che, chesc' àins, ben al sâ sfrutâ el consumismo, jemplant el cjâf de înt ancje di fufignes e po les lôr cjases di strafaniz. Ma, cundutachest tra tantes luminaries, tra tant spindi-e-spandi, tra tantes mangjades e bevudes, distes le essence di cheste fieste e resist; e 'j sperìn che resisti a lunc, cence côri el riscjo di scugnî cambiâle, se nò âtri tal non (par chê strane e... moderne tolerance che stâ cjapant pît ancje chenti), venastai scogninle clamâ "festa degli alberi con le palle colorate"...