In tiermins sietìfics si dîs che l’omp al è un animâl. Ma, salvo qualchi ecezion, nol è une bestie. Chel che nus diferenzie sostanzialmentri di lôr e jè le venerazion dai muarz, no dome come rispiet pal cadavar, ma pai sintimenz che stan dut atôr: le pietât, le memorie e, almancul par chei che cròdin, el leamp tal aldilà.

'E son pinsîrs sui quâi si fermìn darâr, e pal pui malvulintîr. Timp indaûr, tra vueres e miserie, cu le muart ogni famee e veve di fâ i conz dispes, e ‘e scugnivin... imparâ le rassegnazion, cence pratindi di volê capî i disens de Providence.

In dì di vuè si à pôc timp, si è simpri in premure, e pai simiteris no si vâ quasi mai; e ancje le fieste dal 2 di novembar e sta lant pierdinsi, surbide ta chê de dì prin. E pensâ che zà tal an 998, a Cluny in France, si à le prime memorie uficiâl di une fieste cristiane pai muarz, deventade comun in dute europe tôr dal 1300.

Quant che però chê dal falcet nus passe dongje o e cjape di mire qualchi zovin che no le mertave, 'j restin sconvolz, justamentri. E chei pinsîrs, almancul par qualchi ore o qualchi dî, nus busìnin tal cjâf e tal cûr,... e 'j tornìn a dâ impuartance a une preere o, almancul, ae memorie.