Significât di un aniversari

Chest an 1992 'e colavin juste 1200 ains dal prin aveniment ch'al invie la storie scrite di Buje e de sô Plêf. Dal 792, infaz, Carli il Grant, il futûr imperadôr, al à confermât ae Glesie di Aquilee la proprietât su la Plêf di San Laurinz in Mont e sul so teritori, cjapanle dentri tai soi bens imunitaris. Si trate di un aveniment cussì antîc, che pôs altris paîs o citâz dal Friûl 'e puèdin vantâ, ma soredut si trate di un riferiment storic ch'al pò judânus a capî miôr il nestri vivi di uê.

Par chest il Circul Laurinzian, ch'al è un dai referenz plui autorevui e dinamics de cussienze etniche dal nestri paîs, comenzant de sô memorie storiche, al à volût dâj il just risalt al fat, inmaneant une schirie di manifestazions di prin ordin, che si scuen nome laudâ e dîur grazie a duc' chei che cun passion e sacrifici j àn lavorât.

Jo, duncje, 'o soi onorât di podê dî dôs peraulis su chestis iniziativis par metint in risalt il significât culturâl e sociâl ch'e àn vût.

Prin di dut al va dit che comemorazions dal gjenar no puedin jessi nome il rimpin par tirâ su qualchi frae matarane o qualchi sagrone morbinose, ma, se smirin a deventâ impresc' di vêr progress civil, 'e àn di rivâ adore di creâ momenz di serie riflession coletive. Ma cheste 'e je propit la strade cjapade chest an dal Circul Laurinzian. Une strade juste, ma - disinlu daurman - une strade dificil e cence glorie! Al è dificil, massime in dì di uê, fa pensâ la int. Ma il merit di cui ch'al prove al è grant e al va ricognossût e al va proponût come un bon esempli.

L'aniversari di un fat storic al à primariamentri - ben si sa - une sô problematiche sientifiche. E il Circul no le à dismenteade. Par chel al à clamâz in prin i studiâz par meti a pont lis nestris cognossincis storiografichis sul argoment, cun tune rieste di conferencis unevore smiradis.

Tirant il struc di chei intervenz si po metilu adun in curt cussì. La tradizion storiche furlane 'e conte che dal 792 Carli, re de France e d'Italia, al à confermade al Patriarcje Paulin la proprietât de Plêf di Buje e j à dade par prionte l'imunitât. La notizie 'e je riferide tun document dal 1195, ma compilât su la scorte di fonz siguramentri origjnariis, come ch'e mutìvin i esperz di paleografie e diplomatiche e 'e confermin lis ricercjs storichis e archeologjchis. Il fat al è duncje pojât su une solide fonde storiche. A chest propo sit, 'o ài il plasê di riferî a chei di Buje che cumò di pôc gnûfs argomenz 'e son stâz puartâz di studiâz foresc' a saponte de autenticitât di cheste tradizion.

Ma, di là des sutilecis sientifìchis, la memo rie di un aveniment dal passât 'e val massime pal so significât atuâl. E su chets il Circul nol à smetût di bati. E il significât da fat dal 792 al è unevore impuartant par Buje parceche al riclame la grande antichitât de sô Plêf. Baste nome rnemoreâ ce part che àn vude lis Plêfs te storie di dut il Friûl. Lis Plêfs chi di

nô, massime te Ete di Miez, no son stadis nome l'istituzion periferiche de diocesi di Aquilee pe organizazion pastorâl des campagnis e des montagnis, ma ancje il luc privilegjât dulà che il popul al celebrave, no nome la liturgje, i sacramenz de fede, lis processions, ma duc' i momenz plui impuartanz de sô vite co-munitarie, lis sagris, i marcjâz, lis riunions di corporazion, lis assembleis di Vicinie, l'aministrazion de justizie, parfin la difese militâr in câs di uere... Un luc di agregazion primari... de nassite fin ae muart. No par câs i elemenz materiai costitutîfs di une glesie di Plêf 'e son il batisteri e il simiteri! 'E je lì, atôr de Plêf, che tal cors di plui di 1000 ains si è formade la plui rampide culture furlane in gjenerâl e chê di Buje in particulâr. Par chest la Plêf 'e je ancjmò uê la materializazion plui fuarte de memorie des comunitâz, parceche in nissun luc miôr di lì il popul (la plebs - plêf apont) si vise di sei stât protagonist primari de sô storie.

Ma cemût fâ che i acertamenz sientifics e i lôr significâz culturai e' deventin patrimoni di duc? Cemût fâ che la storie 'e deventi memorie coletive e levan  de cussienze sociâl? Bisugne difondi cognossincis, rianimâ tradizions e lejendis, cjanz e ricuarz; bisugne ti gnî vive la lenghe mari, risurî nons smenteâz di lûc, di cjamps e di aghis, di culinis e di stradis; bisugne imparâ a lei il teritori dulà ch'e son sparnizzadis lis olmis dal passât ta l'ambient, tes  glesis, tes cjasis, tes  stradis; (i bens culturai, come che si ju clame). Po ben, i1 Circul Laurinzian si è impegnât soredut in cheste direzion, organizant incuintris, dibatimenz, mostris storichis. Il moment forsi plui alt di chest tentatîf di inviulâ la riapropriazion sociâl dal patrimoni culturâl si âlu vût cu la setemane di manifestaziôns organizadis ai prins di avost, in Mont, valadi tal luc di Buje plui cjariât di memoriis, di monumenz e di bens culturai, dongje di chê Plêf nomenade tal document di 1200 ains indaûr. In particulâr 'e merte ricuardade la biele rievocazion storiche. Par miez di une animazion senografiche di grande sugjestion il passât al à tornât a vivi par un moment come d'incjant tal presint, come patrimoni culturâl inalienabil e come espression di une nobiltât che al popul di Buje j spiete di dirit. Tune dimension metastoriche, omps e fruz 'e àn  fate  fieste  spontaniamentri  insieme  cun dutis lis fantasimis che (cui no lu saal?)  'e son simpri a stâ lassu in Mont dongje dal cjsciel e de glesie.

I 1200 ains di storie colâz chest an 'e son deventâz, duncje, par chei di Buje veramentri une grande ocasion par rifleti su la lôr identitât di popul, sul sens de lôr libertât di omps, su la lidrîs cristiane de lôr culture. Une riflession che paraltri no à mai di sfantâsi dentri di une comunitât civil.