La ricostruzion dal Friûl dopo il taramot dal 1976 no je stade nome une grande imprese sociâl e economiche, ma ancje un grant aveniment culturâl. «Culturâl» tal sens che dutis lis sieltis fatis, di chês publichis a chês privadis, di chês ediliziis a chês urbanistichis, tal ben e tal mâl, 'e son simpri il spieli de «culture» de societât furlane dal nestri timp, ven a stâj dal mût di jessi e di pensâ de int, dai siei modei di vite, di famee, di rapuart interpersonâl, dai siei ideai religjôs, dai siei condizionamenz culturai politics, economics e tecnologjcs... e ancje dai siei archetipos estetics e architetonics. Duc' chesc' elemenz 'e àn cjalcjade indentri la lôr olme pardut, modificant il stes ambient fisic dal Friûl e lassant di ogni bande l'«autoritrat» de nestre culture di vuê: i «bens culturai» plui resinz, apont.

Ancje Buje 'e sta adimplen dentri chest quadri, cui siei «ben culturai» resinz sparnizâz un pôc pardut ator pai borcs. Al è ancjmò adore par fâ un belanz complessîf e mutivât; ma vadì che alc di significatîf e di tipic, ch'al spegli la microculture bujate di vuê, al è stât fat. Par intant 'o presentìn culì nome une cerce di bens culturai resinz ch'e restaràn par unevore di timp a testemoneâ il nivel culturâl dai bujaz sul sojâr dal tierz milesin de nestre ete. La place di San Scjefin, la place di Madone e la place di Tombe...

eco tre bens culturai ambientai: sempliz ma tipic chel di Tombe, ambiziôs ma gaiarin chel di Madone, monumentâl chel di San Scjefin, cu lis lôr glesiis gnovis o restauradis, cu lis pavimentazions ben curadis, cui prestamenz ornamentai, cun vert, tant vert, forsi con qualchi bilisie di masse; ma il risultât nol displâs e par cuei la profonde mutazion culturâl ch'e jè vignude baste meti a confront chestis gnovis prospetivis cun chês di prin.

Nissun dubi però che, dongje dal municipi, il ben culturâl plui imponent che nus à dât la ricostruzion al è il domo di San Scjefîn. Culì, dut ce ch'al è stât ricuperât dal vecjo, lant daûr dal sintiment de int, al puarte il segnâl de memorie misturât cul savôr dal gnûf, su la linie de continuitât storiche de comunitât. Ancje s'al è stât pierdût il document autentic de antighe architeture (i mûrs vecjos cui lôr materiai e la lôr tecnologje), al è stât rimodelât adimplen il spazi (pensât tal secul passât dal architet Noacco) cun dute la sô dinamiche tension verticâl, 'e son stadis ricomponudis dutis lis espressions formals dal stîl neogotic voludis dai nestris paris, e che par plui di un secul 'e vevin segnât dentrivie l'anime de int. Ce maravee se cumò tornant in domo la int, s'ingrope? Lì jê 'e torne a cjatâ intate la sô storie, lì il passât e il futûr si dan cunvigne, lì, 'e vivin insieme gjenerazions di vons e schiriis di fruz ch'e vignaràn. Chest al è il testament di une fede ch'e devente «monument»; chest al è un slambri sflandorôs di culture vive. Vadì che il domo al starà a testemoneâ par qualchi altri secul il moment plui alt de fisionomie culturâl di dute Buje.

«Là ou s'exprime un désir collectif de la chose ancienne, là se trouve la patrimoine culturel... » al à scrit un mestri sapient: là che si realize un desideri coletîf di une robe antighe, lì si cjate di sigûr il patrimoni culturâl. Tal domo di San Scjefin si è realizât, cence nissun dubi, il desideri di dute la comunitât di Buje di tornâ a vê la sô antighe glesie... e alore chel, cence nissun dubi, al è un ancje grant patrimoni culturâl di dut il paîs.