Duc' sa che la Glesie primitive no veve congregazions religjosis di fraris e di muiniis, seben che la vergjnitât 'e fos tignude in onôr sul esempli di Pauli e sui conseis dal Signôr. Ma cul timp, finide l'epuche dai martars, 'e son vignuz fûr avonde organizâz i omps e lis feminis di vite monastichc. Basili in Orient e Benedet in Ocident 'e àn regolât lis lôr comunitâz e i lôr munistîrs.

Ai timps di San Francesc e di San Domeni si son fondâz chêi ordins di fraris cercandui e predicjadôrs ch'o cognossìn. Il monachesim nol é un fat nome cristian e lis religjons asiatichis nus presentin diviersis formis di munistîrs e di monastics ('o scugnìn dî cussì parvie che la peraule monacus 'e à dât in furlan la peraule muini, passade al significât di sagrestan).

'O vin di jessi ricognossinz ai monastics (o muinis) di vênus conservade la culture antíghe e puartât a perfezion il cjant gregorian, par no fevelâ dai tesaurs di spiritualitât che nus àn lassâz. Domenicans e Francescans 'e son di squasi votcent àins in Friûl e nol risulte che il popul furlan al vei pierdudis lis sôs carateritichis etnichis, religjosis specifíchis, linguistichis par cause dai fraris.

Barbane, Madone di Mont, Madone di Gracie 'e son di agnorums custodidis dai Capucins, dai Conventuâi, dai Servîz e a' restin santuaris furlans e promotôrs di sane e cristiane furlanetât. Baste viodi che Madone di Mont 'e jé cumò slargjade in Argjentine e in Canadà fra i Furlans emigrâz in chei paîs. Ancje a San Vît al Tiliment tal santuari di Madone di Rose 'e son i fraris. I Oblâz, a miege strade fra il predi di paîs e û religjôs, 'e diregin la Madone Missionarie di Tresesin.

'E vevin ancje la Madone di Lussari, ma cu la scuse che no servivin Slâfs e Todesc, ma nome pelegrins Talians e Furlans (ma però i Oblâz 'e curavin duc'), ju àn parâz vie. Tal ospedâl di Udin si veve pensât di fidâ la cure spirituâl dai malâz ai Capucins, ma une clape di predis nostrans si è oponude in non dal slogan "À malât furlan predi furlan".

E ce tanc' fraris no sono furlans? O erial par un âtri mutîf? Nancje i malâz 'e son simpri Furlans. Cumò une part di chei sòliz predis che si autonomènin "Glesie Furlane" (Ma par me la glesie furlane 'e jé chê diocesane des tre diocesis dal Friûl) 'e jé in vuàite cuintri la presince dai fraris a San Pieri di Zui. Secont lôr 'e gjavaressin la gjenuine religjon dai Cjargnêi e no capiressin l'anime dal popul e a' puartaressin une devozion di santuz e di fufignis cence serietât.

Ma i fraris no sono omps libars di lâ a preâ e evangjelizâ dulà ch'e vuelin, massime se un Vescul ju acete? Il monopoli de Fede lu àno nome i predis furlans in Friûl? Nome chei de "Glesie Furlane"? No si puedial lavorâ insieme Furlans e Foresc' pe Glesie che dopodut si clame Catoliche e duncje universâl? Il Friûl (e tal Friûl 'o met ancje la Cjargne ch'e dìsin ce ch'a vuelin chei che si consolin cu lis divisions e i serais tribâi) nol dâ fìs e nol dà vocazions.

I predis, secolârs o regolârs, 'e àn di vignî di qualchi bande. E jo mi auguri che i Capucins 'e puedin lâ in Cjargne come ch'e son ladis lis Clarissis a Muez e lis Carmelitanis a Tresesin e come di secui 'e son i Gjesuiz a Gurizze e i Salesians a Udin, Pordenon e Tumiez, i Stimatins a Glemone e a Udin par no citâ che un pocjs di congregazions di chês ch'e lavorin par Crist e pal popul te nestre Regjon.

Il pericul di sparî dal Friûl al ven di un'âtre bande, no di sigûr dai fraris. Tal nestri timp di fruz al é un cjaruz di frari di Glemone cun tante blave parsore.