Dôs e son les ricorences ch'e còlin prossimamentri: el 3 di avrîl le "Fieste de Patrie dal Friûl" e le domenie dopo, el 8, 'e jè Pasche.

De Pasche, dai soi profonz significâz cristians, di trop indentri ch'e son te culture e te civiltât furlane, ža 'j sin a cognossince; cussì come che ben 'j cognossìn les tradizions cressudes intôr, come chês des merindes sui prâz e di lâ a fâ côri i ûs jù pai cucs. Difindìn cence pôre chestes lidrîs e chestes tradizions!

Un pâr di peraules di pui par spiegâ el 3 di avrîl: chel dal 1077 al è le date di quant che l'Imperadôr Enrico IV al à firmât el diploma cul quâl al atribuive al Patriarcje di Aquilee Sigeardo, sô fedêl aleât, le inviestidure feudâl, ven a stai somant e unificant ai podès de cariche religjôse ancje chei di diret "vassallo dell'imperatore"; di fat creant un Friûl indipendent (miôr: dipendent dome di lui).

Une date ch'e jè stade cjapade a simbul, come riferiment de istituzion de "Patrie dal Friûl" (cussì documentade a partî dal XIV secul). A volê si puès pierdisi a cavilâ se chel al fos un vêr Stât, cun tun Parlament veramentri indipendent o fin trop democratic; ma nol è chest el sît just par fâlu. Ce ch'al vâl al è, benapont, el simbul, le ocasion che nus dà par podê ricuardâ che el Friûl al è di pui di mil ains ch'al esist, cun pui o mancul fortune e cun pui o mancul autonomie, pui o mancul rispietât e pui o mancul sassinât de nature o dai omps.... Ma cun dut chest al'è ancjemò presint.... E cun braure 'j vin di ricuardâlu!