Par capî ben lis rogazions, bisugne ricuardâ che la Plêf 'e jè un ent teritoriâl, come il cumun o il stât. La Plêf 'e podeve nassi, vivi e cressi dome se la int di un teritori 'e rivave a tirâ fûr di chê tiere chel ch'al coventave par vivi e mantignî il plevan! Vuei par fâ nassi une gnove parochie al baste un decret, mutivât cun resons demografichis.

Al nas, mitìn, un gnûf "villaggio residenziale" di doi o tre mil personis e tant al baste par tirâ sù une glesie, par dî almancul une messe di domenie, batiâ cualchi frut e sapulî tanc' muarz! Nissun si domande se chei abitanz 'e son in grât di sapuartâ la spese de parochie, o par dî miôr, se la tiere dal "villaggio" 'e pues mantignî ancje il predi e la glesie.

E chest par dôs resons: prin di dut parcèche la int no vîf plui dome cui fruz de tiere; pò parcèche la spese dal plevan 'e je cumprindude tes tassis, in dì di vuè. Ma in âtris timps, un grop di contadins al podeve meti in pins une gleseute e un cjampanilut e pajâ lis spesis dal predi, dome se la tiere lavorade dal stes grop 'e podeve sapuartâ ancje chê tasse ch'e vignive clamade "cuartês": un corantesim dal racuelt dal forment o de blave, ma ancje formis di formadi, ornis di vin e fassinis.

La division de plêf in parochiis 'e fo pussibil tal XII secul, parcèche raument demografic e la meliorade produtivitât de tiere 'e an permetût la nassite dai paisuz decentrâz (chei viei 'e vègnin bandonâz de int, ancje culì, in Friûl). Al è clâr che in chestis cundizions tant il popul (la plebs) che il predi (plebanus o plevan) 'e vevin interes a preâ pe salût des bestiis e pe bondanzie des plantis.

Cu lis peraulis dal Pape Benedet XIV, si pues dî che lis rogazions 'e erin preieris fatis par parâsi de ire di Diu, "che nus spaurìs di ogni bande". Par preâ al sarès bastât adunâsi in glesie; ma par spiegâ ben al Signôr cuai cjamps ch'al veve di protegi o di sparagnâ de Sô ire, al 'ere miôr lâ in prucission in primevere fra i butui e lis menadis dai arbui.

Ogni paîs-parochie al preave par sè: "Chacun pour soi et Dieu pour tous"!. Lis prucissions, scomenzadis a Vienne, in France, tal 470 dopo Crist, sul stamp di antighis prucissions paganis, lis ambarvalia, 'e vignivin ripetudis an par an, a ogni stagjon viarte, ma 'e servivin ancje par altris intenzions: par esempli par segnâ cu la presince umane i cunfins dal teritori comunâl e parochiâl.

Se i cunfìns 'e erin clârs e ben segnâz cun aghis, come tal miò paîs, Frofeàn, la prucission 'e ere curte e simboliche. Ma là ch'a erin barufis e lotis fra paîs par cuestions di cunfins, lis rogazions 'e erin fatis ancje par confermâ o par slargiâ il Lebensraum de comunitât. Giuseppe Vale, te sô storie de parochie di San Laurinz a Cjaurià, al scrîf: "La processione della prima rogazione fa il giro delle campagne verso le parrocchie di Madrisio di Fagagna, Rive d'Arcano, Farla e Pers (... ); la seconda tocca pure i confini con Pers, e quelli di Mels, Lauzzana, Moruzzo e Fagagna... " Luigi De Biasio mi à fat viodi une cjarte disegnade dal Spinelli tal 1709, dulà che une crôs 'e . sègne la fermade des prucissions denant dal vât di San Durì, su la rive zampe dal Tiliment; il prof.

De Biasio mi à dite che ancje a Ronchiettis lis rogazions a' confermavin i cunfins. In cualchi câs lis rogazions a' servivin par tignî unidis e in pâs parochiis nassudis de stesse Plêf. Giuseppe Burba, te sô storie di Rivis d'Arcjan, al scrîf: "Per la prima rogazione i sacerdoti e i fedeli delle tre parrocchie di Rive, Rodeano e Coseano, si attendevano a San Martino, quindi per Giavons si portavano prima ad Arcano e San Mauro, poi alla chiesa di San Leonardo di Rive (... ).

Dopo il pranzo riprendevano il cammino fino ad un certo sito, dove le croci di tutte le chiese venivano fatte toccare in segno di reciproco bacio di pace, e poi dascun sacerdote ritornava con la sua gente alla propria chiesa". E Mario Toller, ta un resint articul par "Sot la Nape", al scrîf che "le rogazioni di Socchieve sono sempre aperte da dieci alfieri recanti le singole croci frazionali".

E a Buje, disarês vuâtris, cemût làvino lis rogazions? Il professor Menis mi à let cuatri riis dal "Libro storico" de Plêf, ch'a clarissin ben l'impuartance des rogazions e la partecipazion dal popul. Tal 1879, al scrîf don Pietro Venier, il guviâr al veve proibît dutis lis prudssions, e duncje ancje lis rogazions, ma il popul lis à fatis dibessôl, cence predi, e 'e son vignudis ben, cun tante int e tante devozion, plui ben di ogni an.

A Buje 'o sin furtunâz parcèche il plevan di chel timp tal "Manuale del Parrocchiano" (Turin 1876), al conte ancje l'itinerari des rogazions: Rogazioni. - Per rallontanamento dei divini flagelli e per la conservazione dei frutti della terra. Prima. - Cominda la processione a San Lorenzo con Messa o senza; va per Madonna ove si canta la Messa di rogazione e si fa la funzione del Mese di Maggio; indi si riawia la processione, che termina a S. Stefano. Seconda. - Messa di Rogazione e funzione del Mese di Maggio a S. Stefano, ove cominda la processione, che termina a San Pietro di Villa.

Terza. - Messa di Rogazione e funzione del Mese di Maggio a S. Lorenzo. Di là facendo un gran giro la processione termina a San Pietro di Villa o a S. Stefano. Ascensione. - Messa parrocchiale a San Lorenzo. Vespero a S. Stefano e Madonna, colla funzione del Mese di Maggio, o colle Litanie se cade in Aprile o in Giugno. " Il passaz de agricolture ae industrie al à svuedât di signifícât ancje lis rogazions.

Tal 1926 il Vescul di Udin al racomandà di scurtâlis par fâ cressi la devozion de int, ch'e calave di numar an dopo an... e trente agns fa 'e fìnirin di vivi par disusance. Al sarà ben ricuardâ che no simpri lis rogazions 'e fínivin ben e in pâs. L'onorevul Vittorio Marangon mi contà une dì che lis prucissions di Sante Marie e di Sclaunì si fermàrin su doi trois a cjalâsi. Duc' 'e tasevin, e al partì un clap: chel al fo il segnâl de barufe, fìnide "a signoradis".

O' ai contât chest fat al prof. Luigi De Biasio che ridint al à dite: "A Ronchettis un predi al è muart cussì". P. S. Cheste relazion, lete a Buje, in Mont, ai 7 di avost dal 1992, in ocasion dal 1200n aniversari dal prin document ch'al nomene la Plêf, 'e je dedicade ae memorie dal prof. Luigi De Biasio, che nus à lassâz te primevere dal 1993.