Il libri di Pieri Menìs, Contis e Raconti, Chiandetti, Reana d. R., '88 dulà che 'a son stâz metûz adun «racconti» e «contis» di chest scritor di Buje, al è un grant regâl fat a dut il Friûl. Jo achì no vuei fândi la recension, che dal arest no si podares dî nuje di miôr di ce che al à scrit te sô lusorose prefazion Carlo Sgorlon. 'O vuei nome resonâ su une propueste che no si riferis a dut il libri, ma a la sole prime part, des contis furlanis.

Il furlan di Pieri Menis al è sclet, virgjn e tant pulît, sei come gramatiche, sei come peraulis e mûz di dî; cence ingredeis, nì peraulonis che nissun dopre, ancje se 'û so al è un favelâ che al jude il letôr a slargjâ la lenghe a cjapâ dentri il miei dai scritôrs di dut il Friûl. Lis contis son faz di veretât tocjâz a lui otor di lui che tal contâju ju torne a vivi e ti cjape dentri ancje te che tu lu lèis. Culì al torne fûr dut un pizzul mont di îr, cu lis sôs miseriis e lis sôs tristeriis, ma ancje cui siei valôrs e lis sôs grandecis: aghe passade, ma ch'e à jemplât di floridure e di vite la Buje di îr, di dulà ch'e diven la Buje di uê.

La miserie 'e scomence par Pieri Menis de ete de scuele: no plui di doi agns di scuele des elementârs, e chei cun tune mestre ninine e brave ma po cun tun mestri pontât e intrunît pal masse bevi 'za di buinore. A dîs agns al varès vût di lâ in tiarce, ma in chei timps a chê etât si veve di scomenzâ a movi il poleâr, a viodi di ce bande ch'e ven (p. 44). Cussì, frut o no frut, j tocje di partî e lâ pal mont su la fornâs, dulà che la scuele 'e je chê dal desc, dal lòdar e de fan: fan di afiet e di culture no mancul che di polente.

Dopo dîs agns passâz tes strussiis des fornâs al vè di frontâ siet agns di militâr, dal '12 al '18, e in chel jenfri in vuere dal '15 al '18, al front sul Pal Pizzul e fint a la presonie lassù che la Polonie 'e devente Russie.

Nome a vuere finite, ma biel planc, al rive a padinâsi e a sistemâsi par vivi tun so buteghiz di Buje, Lì al à mût di lei e di scrivi. Al à tant scrivût: di storie rude sul paîs, su la plêf, su lis glesiis, su lis personis di plui innomine... sei di Buje che di Trep, so comun di nassite. Ma te sô buteghe 'a rivavin ancje lis femenutis des liendis antighis; e lui a scoltâlis e a scrivilis, ches liendis

justanlis dal tant ch'a podevin sei stadis strambidis passant di bocje in bocje. Ma fra lis liendis e la storie vere 'a son lis contis, e Menis and'à scritis unevore ancje di chês, ce sui strolics, ce su rivistis, ce su gjornai. Lis contis 'a son strissulis di storie, che paraltri 'û scritôr cu la sô sgrimie lis à indarintadis a deventâ slambris lusinz di vite. Poben, chest libri al à metudis adun lis contis di Pieri Menis che finore si varès podût cjatâlis nome sparnizzadis in libris o publicazions che nol è facil vê sot man. 'O vin cussì un libri di umanitât e di sapience popolâr.

Nô uê 'o sin cetant plui siôrs di chel che si jere ai timps di Pieri Menis; ma par altris puaretâz 'o restìn inmò lontans dal sei propit siôrs. Vadì che la sapience di chestis contis nus sta ben ancje a nô, cence dî che il lôr biel furlan nus sune tes orelis tanche il glongâ gajarin des cjampanis di une gleseute di taviele.

Resonamenz chesc' ch'o ài fat par rivâ a la propueste ch'o ài tal cjâf.

Ancje chei mestris des elementârs e chei professôrs des mediis che no tègnin lezions risiarvadis a la lenghe e a la culture furlane, ma 'e stan dome a chel ch'al prescrîf il programe nazionâl par fâ cognossi lis culturis e lis lenghis locâls — ancje lôr — 'a puedin vê in chest libri un vantaz e un jutori. Andi ûl par fâ lei par furlan ai fruz un romanz intîr, fossial ancje il romanz di 135 pagjnis di Pieri Menis «Chei de murae»; cetant plui facil al è invecit fâur lei lis pocjs pagjnis di une conte. Al è po di dî che il romanz al passone cu la fantasie dal autôr, lis contis, o almanul chestis contis, 'a son sì insioradis cu la fantasie a dâur calôr ma 'e rindin pardabon la vite vivude 'm tai timps e tai lûcs innomenâz.

Par chestis resons 'o viôt chest libri adat ancje pes scuelis, di meti dongje dai libris di antologjis di prose e di puisie furlanis. Il siôr Sindic di Buje, che indi à 'sponsorizât cu la sô Ministrazion la stampe, 'o speri e 'o augùri ch'al vebi la pussibilitât di dâlu a presit ridot a duc' chei cumuns che j tegnin al furlan e a dutis lis bibliotechis des scuelis nol sarà un soreplui di culture furlane se vere 'e je che a fevelâ une lenghe si po' imparâ nome cul fevelâle, ma a lei e a scrivi no si impare cence scuele e cence spiei di scriture sot i voi.