Nus à subit corezûts cuant che lu vin clamât "scritôr furlan": "Viodêt che jo o soi dome un furlan che al scrîf... lu ai dite ancje in chel an che o ai vinçût il Sant Simon..."

Forsit masse modestie par un che al à publicât siet romançs (doi Premis Sant Simon di Codroip tai agns Novante: “Il Muc” e “Crete vierte”; dôs segnalazions Sant Simon: “Il grant lavio” e “Il Pecjât di Mosè”, publicât par iniziative dal Comun di Maian cul jutori de Provincie di Udin tal 2003), e altris doi a son pronts par lâ in stampe. Al à ancje voltât par furlan “La Metamorfosi” di Franz Kafka e “La bottega dell'Orefice” di Sô Santitât puar Karol Wojtyla.

Ma la liste e podarès lâ indenant une vore se nol fos che al è propit Roberto Ongaro che nus ferme simpri cul so fâ franc e sclet "Par rispiet di chei che a àn studiât, viodêt di no esagjerâ cui compliments, dopo dut o ai fat il fari e o ai tacât a scrivi par furlan dome cuant che o soi lât in pension..."

E se ancje un fregul tart, par fortune che lu à fat, o disìn nô!

Di fat Roberto Ongaro al è un autodidate, ma la passion e la curiositât di un anim di fantat, no cate la anagrafe (al è de classe dal 1930!) lu àn puartât a taiâsi fûr un puest di dut rispiet tal panorame leterari contemporani de produzion in marilenghe.

Desenis lis contis e i articui publicâts su rivistis culturâls de regjon, ma soredut preseâts a son i romançs: dal sigûr une des listis plui lungjis di dute la produzion leterarie furlane.

Leint Ongaro a son doi i elements che a vegnin fûr: un realisim che lu àn fat definî plui voltis tant che promotôr dal romanç storic furlan e un spiritualisim di font che al denote une fede tal sorenaturâl, te cussience de esistence di une Divinitât.

Il realisim di Ongaro al nas de esperience direte: come tal “Muc” (bielzà ricuardât, premi Sant Simon) li che la ambientazion de Seconde Vuere Mondiâl e ven fûr dai ricuarts di un frut che al viodeve cori fûr e dentri di cjase sô i partigjans e tal paîs al cjalave cun curiositât lis divisis dai soldâts todescs.

Il spiritualisim al nas invezit di une maturitât vignude cul timp che lu à puartât a tornâ a scuvierzi une fede te Divinitât, o miôr, propit in Diu. La bielece de nature, la presince di une Man che e à bielzà disegnât e scrit il “Destin” (altri romanç di fuarte testemoneance storiche).

Une profonditât di messaç che però al rive adore ancje a rindi une vore lizere cuant che tal “Pecjât di Mosè” al fâs vivi la storie ai animâi dal bosc, disegnant par ognidun une carateristiche peculiâr.

Duncje un om che cun grande umiltât si misure dì par dì cun se stes regalant bielis pagjinis di furlanetât al Friûl, che al à gust di lei in marilenghe, cjapant sù une vore di consens.

In chescj dîs al è jessût il so ultin lavôr "Trente pas a misdì": une parabule moderne che e insegne cetant mâl che e pues fâ la sêt di insiorâsi e la aviditât.

Prime di lassâsi, i domandìn se dopo tantis sodisfazions, al à ancje cualchi displasê.

Nus cjale e di bot nol rispuint... daspò al devente seriôs e nus dîs "Te mê vite o 'ndi ai viodudis tantis e se Diu al à volût o soi rivât li che mai o varès crodût. Par chest mi riten fortunât, ma un displasê lu ai: mal à dât tancj agns indaûr un frut che, invezit di scjampâ dal coleç dai predis di Pordenon par lâ a cori tal palût di Cjasesole, al varès vût di stâ un pôc di plui sui libris..."

Nus lasse un fregul incocalîts e nus ven scuasit naturâl di domandâi "E cui saressial chest canai? Un fi, un nevôt?"

Po dopo fasint bocje di ridi "No, no... chei a son brave int, migo come chel bifolc... ma salacor, lu cognossês: al à non Berto e mi àn dit che al à fat il fari..."

Christian Romanini