La vita cattolica 22 dicembre 2007

Si va ae preistorie di popui di divignince difarente, 
che a àn imbastide la gjernazie furlane, cul gnûf poeme «filii petrae»

La poesie epiche di pre Zannier

Pre Zannier al à inviade in Friûl une origjnâl tradizion di poesie epiche e storiche seconde a dinissune. La sô opare leterarie e je tant che un viaç traviers di tieris e oms diviers, che a fasin part de storie universâl.

Seont chel chel che al À vût scrit Aristotele, la poesie epiche, par vie che e risulte imitazion di nobilis impresis, e je parele ae tragjedie, ma di cheste e je ancje disfarente par vie che no à limits di timp, e pal usaç di un unic «metri» poetic, che, di fat, «epos» in grêc al significà sul imprin peraule, discors, e dome plui tart «esametri», oben il viers eroic dai poetis epics.

E se intun prin timp il fìlosof Vico al crodè di invividuâ tal poete-cjantôr epic la espression di une coletivitât etniche, plui indenant la fìlologjie di stamp romantic e disferenzeà une epiche spontanie e popolâr di une bande, e di «art» o «riflesse» di chê altre, cheste ultime produsude de bande di civiltâts maduris e creazion di poetis culturâts: al è il câs, par esempli, de «Eneide» di Virgilio o, ancjemò miôr, de «Gerusalemme liberata» di Torquato Tasso.

Interpretazions che a part il mît romantic de origjin spontanie e popolâr de poesie, a convivin te moderne fìlologjie, compagnant la idee di nazion e di mît etnic-religjôs. Cun di fat, ogni nazion e je infondade sul mît, ven a stâi, cemût che al sosten un altri studiôs des religjons, Mircea Eliade, su di un avigniment «mitic» che al è sucedût - pensait ae fondazion di Rome - intun timp lontanon: chel de albe di une civiltât.

Insume, il mît al conte, in grazie aes impresis di creaturis antighis, cemût che e sedi nassude une civiltât, formât un ciert compuartament, nassude une istituzion o une nazion. Simpri, ben si intint, cu la narazion di un alc produsût «ab ovo», che dome in chel precîs moment al à scomençât a jessi, ilustrazion simboliche e inceose di une situazion umane primarole, esemplâr par une coletivitât.

E se a partî dal '800, in Europe - fale che tai paîs scandinâfs - si pierdè la pratiche dal mît e de poesie epiche, in Friûl, invecit, chest gjenar leterari (ben pôc doprât dai poetis di cjase nestre) al cognos buine fortune par merit de opare leterarie di pre Domeni Zannier, tant che si pues ben dî che al vebi inviade une sô origjnâl tradizion di poesie epiche e storiche seconde a dinissune, e cuntune modalitât di lenghe une vore braurose.

Lis sôs oparis leterariis - che a son stadis voltadis in cetantis lenghis - a smicjin al obietîf di fâ cognossi al mont une tiere e une int che e à vût, e che e à ancjemò, la sô part intal progres de umanitât; la valence universâl de difese de sô dignitât e de sô identitât - fate di tantis identitâts -, metafore de dibisugne di prudelâ dutis lis identitâts e lis dignitâts dai popui dal mont.

In struc, la opare leterarie di pre Domeni Zannier - la sô ativitât e va indenant di passe cincuante agns e je une sorte di viaç emblematic zontraviers tieris, timps e oms difarents, che dut câs a fasin part de storie universâl; une sorte di mosaic epocâl e naratîf che dal sigûr nol cjate confront in altris leteraturis, e che i siei tassei a son antancj poemis che a comprindin miârs e miârs di viers, fondâts su une enciclopediche cognossince, pome madure di un studi e di une ricercje dal dut straordenarie, cemût che e je chê dal poete di Maian.

In cumò, daspò lavôrs tant che «Crist padan» e «Colombs d'Etrurie», dâts dal cjaminâ di un popul che al è ben identifìcât tai siei caratars di identitâtchê furlane -, ma che si liste ancje a simbul e metafore di ogni popul di cheste tiere, pre Domeni Zannier, cul gnûf poeme dal titul «Filii petrae» (Edizions Laurenzianis di Buje, cun disens di Arrigo Poz), «I fîs

de piere», nus puarte ancjemò plui indaûr te storie: te preistorie di popui di divignince difarente che a àn imbastide la gjernazie furlane, intal moment che l'om che al viveve intai landris di cheste regjon a'nt vignì fûr par simpri, lant incuintri ae storie.

Come ogni poeme, «Filii petrae» al è dividût in cjants, e al presente un preambul dulà che l'autôr al declare che cun chest lavôr si puarte a compiment la sô lungje cjaminade leterarie dilunc i secui de sô patrie e di dutis lis patriis, cun chê di cirî di ricreâ, cu la sô poesie, la storie, gjavant, di cheste storie, il miôr dal om cence dismenteâ i cjantons plui scûrs, e cirint di risussitâ dai sepulcris la memorie de umanitât par puartâle viers l'avignî.

Un programe puartât insom cuntun sgjâf storic che al presente cun precision i avigniments che a puartarin ae afìrmazion de civiltât dal om, e che in chest poeme al cjate une sorte di fîl ros intai episodis che a contin di un sbalç uman viers la storie, che si fâs dome prevedê, ma che al sucedarà plui indenant.

De piere al metal; de cjace al arlevament dai selvadis; de nassite dal lengaç elementâr al pinsîr, rivant fintremai al incuintri cun altris popui e ae discuvierte di un sacri che al ven purifîcât dal totemic terestri cjapant la muse di divinitâts dal cîl.

Ta chest mût, la famee dal clan dal ors: Ursin, la femine Lune, i fîs Polin, Fluride e Soreglut a vadin incuintri ae albe di une umanitât che e vîf ancjemò intun timp scûr, ma ancje intune tension viers gnovis civîls iluminazions, viers une vite spirituâl e culturâl che ancjemò a'nt sorevivin olmis e mîts madressûts in chê gnot lungje e lontane, che e à preparade la lûs di un misteri che e puartà l'om viers un gnûf avignî.

Dut chest al cjante il poeme di pre Domeni Zannier, intun mosaic che al à dal straordenari par composizion, contignûts e risultis poetichis, dulà che la storie di chest clan e devente za dentri de sô esperience «epos», epiche, e al sarà propit Laur - il cjantôr, simbul dal autôr stes dal poeme - a cjantâ lis impresis gloriosis dai erois che a àn difìndût il lôr popul e a contâlis ai fruts. La sô cjante, cussì, e devente epiche e simbul stes dal poeme di Zannier.