I storics, cun reson, a' dìsin che il Friûl al è une arèe cultural e ch'a son i soi omps ch'a crèin i soi confins cun i lor movimenz e cun i lor savê. Nô furlans 'o podìn dî ch'o sin une grande Patrie parcech'o vin int che nus rapresente par ogni cjanton dal mont cul so lavôr, cu le sô voe, di imparâ e di judâ i soi fradis. Un furlan bujat ch'al à contribuît in chest mût a slargjâ i confins de nestre civiltât al è Berto Menut (Desiderato).

Par cognossilu 'o soi lade in Colosoman, là che cumò al vîf cun so fradi Vico e sô cugnade. La prime volte che lu ài viodût mi pareve impussibil ch'al ves otantenuf agn: un omenut magrulìn, cun biele cere e soredut dôi vôi vivarôs e plens di ligrie.

Lis contis di Berto, ch'o ài cjapât-sù tabajant cun lui, a' son la testimoniance di un omp che, par confuartâsi des sôs disgraziis, al jude i soi fradis cun chê umiltât ch'e plate ancje il lustri des sôs oparis.

Cu la sô batule ben misurade, al comenzà:

«0 soi nassût il 27 di setembar dal 1898, di pâri e mari emigrâz in Baviere tun paîs clamât Pastetten. Gno pâri, ch'al faseve il capuzzat, al lavorave tes fornâs di dute l'Europe e, come che si usave in chê volte, al cjapave lis percentuals sul lavôr dai soi operaris.

In chei agn di canai 'o ài viodût cun grant dolôr fruz di undis agn partî pal mont daûr di int cussì ruspie che par comandâ un lavôr lu faseve plui cui pîs che cu lis peraulis. A' jerin fruz plens di fan ch'a vevin i genoi ch'a si pleavin sot il pês di chel lavôr plui grant di lôr. Quant che la sere si pognevin su un stramaz di sclofis par polsâ, al jere ancjmò il piulâ des cariolis plenis di modons che ur cjantave le nine-nane e no lis contis de mame lontane. Ce tantis penis ch'o ài viodût! Ce tant vaî chê puare canae!

Quant ch'o finivi siet agn, gno pâri Pieri al è tornât a Buje cun dute la sô famèe. Jo, quant ch'o soi rivât a Buje, 'o soi restât imbambinît pe sô bielece, ancje s'o jeri un canaiut plen di matetâz. In chei agn, ch'o soi stât a Buje, mi soi gjoldût chel 'aiar furlan che par simpri mi è restât tal sanc.

La mê famèe 'e veve fate la cjase a Ursinins Pizzul e jo, par lâ a scuele a S. Scjefín, 'o passavi dongje di cisis ben netadis, 'o saltavi riuluz di aghe frescje, par 'zuc 'o contavi i clas pojâz a confin a miez dai cjamps... e tantis altris bielis robis ch'o ài tignût simpri tal cûr, par dute la mê vite.

Quant ch'o finivi undis agn, 'o ài scugnût partî cun gno pâri par lâ a vore tes fornâs di miege Europe. Ce tant dolôr par stacâsi de mê zo ventût e dai mei prins amôrs. 'O tremavi pensant a ce che mi varès spetât e mi sintivi i sgrisui imagjnant di scugnî fâ ce ch'o vevi viodût fâ agn prime dai fruz ch'a vevin la mê etât. Il gno cûr al jere tra la pore dal doman e la nostalgje dal partî lassant daûr un mont cussì biel. Mi semeave di vê tal stomi il cûr che si sbregave in doi.

Dopo agn di lavôr pes fornas dal mont j e la mê famèe 'o rivàvin a meti dongje i bêz par fâ-su un biel fôr par fâ il pan a Ursinins Pizzul. Quant che si crôt di sei a cjaval no si è nancje sul mus: tôr dal 1927 il nestri negozi al cjapà fuc! Cussì 'o vin scugnût tornâ a partî pal mont un'altre volte par pajâ i debiz!

Dopo vê tabajât cun gno fradi par decidi cui ch'al vares doprât l'unic "visto" ch'o podevin vê, a 29 agn 'o partivi pes Americhes.

Sbarcjant dal bastiment, ch'al veve stât dîs 'zornadis par rivâ a New York, mi pareve di deventâ mat. Bessol! No savevi la lenghe, s'o vevi fan no podevi rangjami a lavorâ la tiere come ch'o vevi viodût fâ i mei vons, parceche in chel puest 'o viodevi nome asfalt e pleton.

Cun chei pôs bez ch'o vevi pal viaz e cognossint altris furlans mi rangjavi a cirî un lavôr e il prin ch'o ài cjatât al jere di fâ il manovual in tun panifici. Cul lâ dai agn mi rangjavi simpri plui cu la lenghe, ch'o imparavi in tune scuele serâl, e migliorant la mê condizion culturâl e sociâl 'o soi rivât a jentrâ come segretari in tune biblioteche di New York: The New York public library.

In duc' i agn di emigrant une le mê grande bisugne, 'e je stade chê di puartâ o di creâ un tocut dal gno Friûl in chê tiere forense. Une dì, tabajant cun amîs furlans, 'o vignivi a savê de esistenze de ' Tamèe furlane'' e mi invidarin a lâ al riunion che si faseve tal doman.

Jentrant in chê sede, mi pareve di tornâ a cjase come in chei siumps ch'o fasevi. Quant che mi àn dade la peraule par ch'o disés la mê, ju ài tignuz in trambulis par dos oris. No la finivi mai parceche mi pareve impussibil dopo tanc' agn di podê a fevelâ la mê lenghe furlane.

Cussì fasint ju vevi lassaz imbambiniz e lôr, fídansi de mê voe di lavorâ pai furlans, mi darin la cariche di segretari. 'O ài lavorât in te Famèe furlane par vinc' agn.

Cul lâ dai agn la nestre famèe si slargjave simpri plui e 'o vevin rivât a vê un palaz dut par nô, cun dentri organizade la sçuele di Talian, la Biblioteche, e i servizis sociai plui imediâz e tantis altris robis che a' podevin judâ un furlan che come me al rivave in tun puest che nol cognosseve.

Une volte, ch'o vìn organizade une gjte, par saltâ fûr de 'zitât cun 20 corieris 'o vevi mobilitât i puliziòz che quant ch'o passavin nus saludavin al mût militâr come s'o fossin autoritâz.

Par rinfuarzâ la nestre associazion 'o cirivi, cun boins risultâz, di fâmi amie int diplomatiche, puliziote e dutis ches personis ch'a podevin conventâ par judâ i mei fradis.

Vie pal dì 'o lavoravi te librerie e di sêre 'o lavoravi te Famèe Furlane par contentâ il gno cûr di furlan e la mê bisugne materiâl par mantignî la mê famèe.

Dopo 21 agn ch'o jeri pal mont par sodisfâ la mê nostalgje pal Friûl, e par viodi i mei vecjos 'o soi tornât a Buje. Ma, dopo scugnint tornâ in Americhe, il gno cûr al sbatacolave tal stomi come un danât. Ancje in chê volte 'o zuravi che apene podût 'o sarès tornât.

Finalmentri dal '62 quant ch'o finivi 64 agn, 'o levi in pension! Cence scoltâ lis bielis e golosis oportunitâz di fâ cariere cun suces 'o ài cjapât-sù la mê valis e 'o soi tornât tal gno paîs. Ce biel! 'O tornavi! 'O varès cjatât i mei amîs, lis culinis, la mê tiere!

Quant ch'o soi rivât, invezit, ce delusion! Dopo tanc' agn, il paîs al jere dut cambiât, i mei amîs no vevin plui nancje la stesse muse.

Mi pareve di sei tornât in Americhe quarant'agn prime.

Buje la viodevi disbredeade, ognun al veve il so tôr cul so plevan. Ce vevio di fâ? Tabajan cun amiis e int ch'e veve vôe di lavorâ 'o ài dât le mê colaborazion par creâ la "Pro loco", cjapant l'impen de presidence par doi agn.

'O speravi di rivâ a fâ come in Americhe, e di cjatâ la colaborazion e la fradae che 'o vevi cjatât pal mont.

I prins doi agn 'o vin vût un successon! Si jerin organizâz un magazin sul marcjât a S. Scjefin, sot de cjase di Jogne e lis riunions lis fasevin là di Cavalet.

'O vevin rivât a meti-dongje l'imprestament par podê liberâsi dai naulis ch'a costavin une vorone.

Ce biel viodi dute Buje ch'e faseve fíeste!

Dopo qualchi an, però, 'o ài scugnût molâ parceche chei che si stufavin mi disevin che a Buje nol dure nuje, e cussì manciant le fuerce umane al colave dut. In chei agn in cubie de mê femine, mi soi gjoldude la cjase curanle come un frut apene nassût.

Chel periodo di serenitât al à durât fin dal '73, quant che la mê Ferma a je mancjade. Mi soi sintût murî cun jê, 'o jeri come mat, no rivavi a capî plui nuje. Il mont mi jere colât intor. Dopo qualchi an, mi soi fat coragjo e par fâmi fuarce te mê solitudine 'o ài decidût di colaborâ cun Radio Effe par fâ une trasmission pomeridiane clamade: furlans pal mont.

Ogni dì 'o jevavi a buinore e 'o partivi cu la mê machine atôr pai paîs in Cjargne, di là da l'aghe, di sore Glemone, par sintî contis di emigranz.

Une dì, intant ch'o jeri in trasmission, 'o ài domandât a chei che mi scoltavin, di mandâmi un lôr scrit par dîmi s'a vevin vôe ch'o continuàs a trasmeti come ch'o fasevi e s'a vevin miôr ch'o lassàs stâ.

Tal gir di vinc' sornadis 'o ài ricevût 6. 000 cartulinis! Duc' mi disevin di continuâ a lâ indenant come ch'o vevi tacât. 'O vevi rivât ancjemò une volte a viergi la malite dai furlans! Ches 6. 000 cartulinis, che cumò 'o ten cun amôr tune valîs, a' son une grande sodisfazion!».

Cheste tabajate di Berto mi à fat capî che i confins de Patrie no si pò leâju a un toc di tiere: la Patrie 'e à i confins dal nestri cûr che si slargjn cul nestri jessi fjrlans per strades dal mont.