“Lis cjasis e lis glesiis dal nestri paîs e fevelin furlan; a contin la storie dal lavôr di omps vignuts dal Friûl par fâ i modons dai nestris murs” cussì nus à dite il delegât dal “burgemeister” di Vilsbiburg, in Baviere, il 3 di maj, dì de inauguratsion di une mostre che l’”heimatmuseum” al dediche a lis fornâs e ai fornasîrs, une storie di fadîe e di emigratsion, di fruts e di capuciats. Lis manutis stampadis sui modons, i libris dal ospedâl, lis fotografiis, i documents e lis peraulis di afiet e di ricognossince par dî gratsie ai furlans dal lôr lavôr.

La nestre migratsion viodude di chê altre bande: ven a stai come se i piemontês e fasessin un monument ai terons che an lavorât a fâ automobii o i lombarts, fra cualchi an, ai neris che lavorin tes fonderiis.

La migratsion, ocasion par scjampâ de miserie, strissinant magari di cualche “ziegeleiakkordant”, ma ancje par cognossi altri monts, par imparâ, par tornâ e puartâ gnovis ideiis de tiere dai paris.

Gratsie amîs di Vilsbiburg: cheste e je la europe dai popui, chê dal lavôr, de dignitât, de solidarietât, de tolerance, de memorie: i murs dai modons di Vilsbiburg no segnin nissun cunfin!