Nol è di ogni dì che un paîs al dedichi un monument ai foresc' emigranz par lavôr, massime in cheste Europe malade di nazionalisim e di senofobie.

E pûr chest al è capitât in Baviere, a Mùnchen, dulà ch'e àn tirât su un monument par ricuardâ i fornasîrs furlans che in tanc' e par tant timp 'e àn strussiât lì di lôr. L'opare 'e je dal scultôr bavarês Hans Osel e si pò viodile in Preysingplatz, tal quartîr di Haidhausen, dongje de glesie evangjeliche. Parsore di une fontane 'e son scolpîz te piere doi fornasîrs: un, in bas, al è un "stampadôr" ch'al forme un modon cul so "archet" e un altri, adalt, al ten in man une tasse di cops e su pe schene la refe dai modons.

Cussì chê che si pò ben defínî l'epopee tragjche dal popul furlan tal ultin secul 'e à un rico gnossiment public ancje tal forest! Che l'emigrazion furlane dal ultin secul al sedi un aveniment centrâl de storie culturâl dal nesti popul nissun chi di nô al pò dineâlu. La leterature locâl su remigrazion, sedi documentarie sedi critiche, 'e je ormai imponente.

'E son stâz dâz dongje archivis storics e fotografics, 'e son stadis cjapadis su testemoniancis orals e materials, 'e son stâz studiâz duc' i aspiez umans, economics e culturai dal fenomeno, al è stât metût in viste il contribût dât dai Furlans vie pal mont ae incressite des civiltâz forestis. Ancje remigrazion bujese 'e je stade ben cjapade in considerazion in dute la sô particolaritât, cence smenteâ il so aspiet artistic tipic.

Fra i studis resinz, par esempli, si pò lei cun profit chei di P. Sacco, F. Merluzzi e M. Pauluzzo Guerra (Immagine e cultura, I, 1 -1994 - 2 ss., 44 s. cun bibliografie). Che, paratri, l'emigrazion furlane 'e sedi un aveniment jentrât uficialmentri te storie di un altri paîs european, nol jere mai stât fin cumò claramentri marcât te leterature storiche foreste.

Par chest al è di grant interes il studi di Fritz Lutz, studiôs e scritôr bavarês di grande innomine, publicât tal 1990 in ocasion di un Geschichtswettbewerb der Stadt Mûnchen e cumò tradusût in talian di G. Del Piero e publicât cun notis e prefazion di A. Picotti par iniziative dai Amîs dal Friûl (Die friaulischen Ziegelarbeiter im München Osten. I fornaciai friulani in Baviera nella zona est di Monaco, Reane, Chiandetti Editôr 1944).

Dopo il vê contât il lavôr dûr dai fornasîrs e lis carateristichis de organisazion des "stagjons" fra il Friûl e München, l'autôr al spieghe in prin la situazion economiche de capitâl bavarese ae fin dal '800, il grant svilup edilizi dopo la uere 'franc-todescje dal 1870-71 "che portò all'impero tedesco la gigantesca somma di cinque miliardi di marchi in oro a titolo di risarcimento danni di guerra da parte della Francia".

Te part di München a soreli jevât 'e nassin come foncs fornâs par furnî material di costruzion. Tal 1911 si contavin lì ben 47 fornâs! 'E coventave duncje man d'opare foreste... e il Friûl miserabil d'inchevolte indi à furnide in abodance, dant un contribût decisîf al svilup urbanistic e sociâl de metropoli dal Isar. In cheste emigrazion di masse in prime linie 'e jerin chei di Buje.

Tal comun di Oberföhring, par esempli, al scrîf il studiôs, dulà ch'e lavoravin quindis fornâs, di Buje 'e vignivin duc' i sîs "capuzzaz" (Piemonte Pietro, Aita Giuliano, Zontone Leonardo, Savio Pietro, Pazzetta Pietro e Taboga Pietro). Ma Fritz Lutz al met in lûs ancje i problems sociai che cheste emigrazion 'e à stizzâz. Problems di rapuarz cu la int dal luc. Simpri a Oberföhring tôr dal 1900 dongje dai 900 abitanz dal luc 'e rivavin fìn a 800 lavoradôrs furlans.

E al continue l'autôr: "Nelle 42 fabbriche dell'area urbana di Monaco, tra la fíne del secolo scorso e l'inizio del presente, arrivavano ogni anno dall'Italia dai due ai tremila lavoratori stagionali. Si possono facilmente immaginare le tensioni sociali che ne derivavano!" Ma ancje problems di rapuarz cu lis autoritâz politichis e aministrativis.

A chest proposit al è interessant lei cemût che i sorestanz todescs 'e son plui voltis intervignûz cuintri i parons des fornâs par garantî cundizions plui umanis di lavôr e di sorevivence civîl. Il Lutz no si smentee nancje di ricuardâ i aspiez folcloristics che l'emigrazion furlane 'e à trasmetûz al mont popolâr bavarês. Si sa che une vilote todescje 'e ciantave i Furlans che davierte 'e rivavin in Baviere "cu lis sisilis".

Ma chi l'autôr al publiche ancje un signifícatîf poemut popolâr cjapât su di Kurt Graf e trascrit di Michel Ehbauer te "Bayerische Weltgeschichte" cul titul "Hero und Leander" in lenghe "münchnerisch-italienisch". La poesie 'e conte l'amôr tragjc di un operari di non Leandri pe sô "cara bella heroina", ch'e lavorave come camarele te locande "Zum Aumeister" su chealtre spuinde dal Isar.

Il studiôs bavarês al discôr, infin, dai rapuarz fra l'emigrazion furlane e l'art, che no podevin sigûr jessi tant fuarz ma che distes 'e àn vude qualchi storie interessant. E chi al ricuarde la vicende de Madone di Vile di Buje metude in clâr 'zà quasi quarant'agn di Pieri Menis (L'avventura della Madonna dei Fornaciai, Udine 1960). Duc' 'e san cumò a Buje che la Madone di Vile 'e j. ç stade fate a München dal scultôr Joseph Knabl su comission dai fornasîrs ch'e lavoravin cul capuzzat Jacun Ganziti te fornâs di Anton Grassl a Haidhausen.

Ma pôs 'e san che la uniche Madone restade, dopo lis distruzuins de ultime uere, dal famôs artist bavarês 'e je chê di Vile. Par dut chest, al conclût Fritz Lutz al jere just che la citât di Mùnchen 'e ricuardas ancje cun tun monument "diese fleissingen und bedürfnislosen Arbeiter aus dem Friaul, die mit ihrer Arbeit die Baustoffe für die rasch wachsende Grossstadt an der Isar geschaffen haben"!