Le strade pes Gjermanies e i soi striaments

Nus è capitât di compagnâ plui vol-tes, atôr par Buje e pal Friûl, per-sones vignudes di lontan, di paîs de Europe come des Meriches, par cognossi le tiere d'indulà che e jerin partîs i lôr vons, i lôr paris. A voltes, come par Clodoveo, e jere le realisazion dal siump di dute une vite: tornâ a Buje. Lu vin viodût meti vie tun pizul vâs di veri une prese di tiere cjapade sù tal curtîl di famee, che el so von al veve lassât ae fin dal votcent.

E jè une fuarce grande, une dibisugne che no à paragons chee che jù môf: cirî les lidrîs di une lenghe che inmò si fevele, di une culture che simpri e cara-terize el mût di vivi, di fâ, di pensâ. Ma i vin vivude su le nestre pièl, insie-me cun tanc' altris amîs zovins e man-cul zovins, un'altre dibisugne, che nus à puartâts pes Gjermanies: le dibisugne di capî indulà che levin, ce strades che fasevin, indulà che lavoravin i nestris fornasîrs.

Nol è cirî les lidrîs. Al è altri alc ch'al sburte a movisi, par capî, par vê un'al-tre clâf in man che nus dei le pussibi-litât di cognossi e di cognossisi di plui. L'isolament, scuasit le clausure dal lûc di vore. El paesagjo, di une dolceze e di une pâs, che si puedin palpales, a lengi le malincunie o a stizzâle? La mancjan-ce di corones di monts par mìes e mìes a dâ l'insirli de dibisugne di un pont fìs par podê orientâsi.

Cirî vuè di capî. Ce si puartavino intal cûr co e lavin a ingenoglâsi denant de Madonine nere di Altötting, che i santùs dopo si ju cjatavin intai libris di messe tignûs di cont tant che une relicuie. Ce ur mancjavial culì, tornâts a cjase, dal puest forest che ju tignive par mês e mês a sfadiâ, sigûr, ma ancje a cressi, a ingegnâsi, a meti tal cjâf chee strussie

che puarte- in ogni câs- a rivâ a fâ front aes nuvitâts de vite, a cjâf alt, cjalant dret in tai voi. Erino animes in pene cul segno dal sbrego tra "culì" e "là-vie", tra "ce-ch'o-soi" e "ce-che-i-varess-voe-di-jessi" o jerino dome contents di podê tornâ?