Si sa ch' o vin duc' la nestre idèe su les robes di chest mont, ch'e pò plasè o no plasê, ma vuai s'o vessin di scancelâ il nestri pinsîr par pôre di chel di chêi âtris. No saressin plui ni persones ni omps. Al comence un an gnûf ch'al strissine i programs di chel vecjo e naturalmentri an fasarà di gnûfs. Che Diu nus'e mandi buine.

Perdonaimi se 'o soi pôc amant di un Friûl e di une Buje ridote a une Arcadie, a une pure dimension pastorâl, a un zardin ambientâl, sterilizât o scjerpi. Al semèe che la vite e il lavôr dal om 'e còntin quasi nuje devant di une plante di sorc e di un pôl o di un lavac di palût.

Ancje chel ch'al é stât fat e che plui nol corispuint al vivi e a la sô sigurece di cumò al è un tabù. No si pò slargjâ, no si pò tornâ a fâlu miêj, no si pò viergi. E intant si scjafòisi, si rùssisi e si trùssisi, si respire come i pes fûr di aghe, spetant la fín. 'E jé necessarie la strade ma si continue a dî di no e in âtres bandes adiriture si mûr. no lontan di ca.

'E covente la fuarce de lûs e al è no. 'E coventin industries e si dîs di no. Poben sentinsi tal prât e mangjìn jerbe, stant però atenz che no sei invelenade ancje chê. Si domandìno mai dulà ch'e puarte une politiche di mûr cuintri mûr, cence mediazions, riflessions, resonamenz?

No soi un missete, un sensâr cul fazzolet al cuel. Al é ben qualchidun a Buje e in Furlanie ch'al pò fâlu. Io 'o invidi solamentri a cjalâ i timps e a no blocâ l'avignî e il svilup de nestre tiere.

Par il rest Bon An e Tante Fortune a duc'. E che Diu nus benedissi.