Tai momenz che le memorie 'e polse sul timp pierdût, Buje mi torne simpri come prime dal taramot.

Alore le mê cjase (che no je pui) mi sta devant come vere: el pizzul pronao, les dôs colones, les cises di bos... J'entri in cjase e j'cjati come une volte mê mari e gno pari sentâz un dongje l'atri.

Mê mari 'e lei e ogni tant 'e bute el voli sul lavôr di papà, par indrezâlu, conseâlu...

Papà al intae el len opûr el vuès, ànsit tal ultin soredut el vuès. Al à preparât dibessôl une schirie di argagnùz, di furdùcjes come strumenz di chirurgje; si fâs dâ tocs di vuès san e cence magle; lu lave, lu slisse ch'al pâr avorio.

Mê mari j fâs sore el disèn di une muse, po' lui al sboze, al scave, al slissote, al regole, al corêz cun pasience ustinade.

Ê cussì e' son vignûz fûr j ritratùz des sôs femines: sô mari che la puartarà cun sé fin ae ultime ore, le sô femine che à vivût cun lui sessante agns, e sô fie.

Ma dutes tre cun muse 'zovine, come ch'e rèstin 'zovins tal cûr chei che si ame.

La mê cjase