Al pues jessi interessant, par chêi ch'a léin chest sfuei, savê cemût ch'e si è formade in me l'imagjne dal lôr paîs tanc' ains indaûr e parcè ch'e je gambiade tal timp. Come ch'a san ju esperz di marketing, l'image di une fabriche, di une aziende, di une marcanzìe, 'e je une "qualitât" di chê fabriche, di chê aziende, di chê marcanzìe, e al è plui facil vendi robis ch'a àn une buine imagjne. Insumis, si vent di plui une pelicule a colors quant che Zico al fâs tanc' gôi, parcèche la vitorie 'e je pusitive tant pe squadre di Udin che pal non de fabriche ch'al è scrit su lis mais blancjs e neris.

E jo 'o crôt che ancje un paîs (une citât, une regjon... ) al vedi interes a fâsi e a mantignî un bon non, une buine fame e, par dîle cun chei dal marketing, une biele imagjne. E Buje, disarês vuâtris, ce imagjne àe? Buje 'e entrà tal miò cûr di frut nere e pelose come il babau, compagnade di une nule di solfar! 'O varai vût tre o quatri ains, co une mê agne 'e disè a mê mari che nol ere il câs di fidâsi di un ch'al vendeve no m'impensi ce, parceche "al è fals come la monede di Buje"! No capivi ben ce ch'e ere la monede, ma chê di Buje e' veve di jessi une brute robe s'e ere false.

E ancje il non di chel paîs lontan (lontan par un frut che lu cjalave di Frofeàn, te Basse di Latisane) non mi dave une sensazion pusitive: mi ricuardave il scûr, il "buio", "le tenebre del tempio di Mammona", come ch'al diseve il plevan par condanâ chéi ch'a amavin masse i bêz: podevio vê voe di cognossi un pais dal gjenar? E ce int vivèvie tun paîs cussì?

A' passàrin i ains, e tal '48 a Udin, in prime medie, un compain mi disè di clamâsi Calligaro e di jessi di Buje: lu cjalai, no dîs cun suspièt, ma cun tante atenzion! Al ere un brâf frut, nol veve te sachete monede false e al zuàve ben di balon.

In prime superiôr o cognossèi un altri Calligaro di Buje, legri e onest, cusin di un tierz Calligaro di Buje, ch'al studiave pôc ma al seveve fâ ridi la int.

Chesc' doi, come il prin, a' erin brâfs zovins, simpatics, ch'a mjoràrin in me rimagjne dal lôr paîs: un paîs ch'al restave purpur lontan e misteriôs, parcèche non vevi bêz di spindi par lâ atôr pal Friûl.

Il quart Calligaro, 'zovin e student, lu incuintrai tai ains de Universitât, e mi fasè vignî une grande voe di viodi Buje, co mi disè par talian, che "Buja non esiste". "Come non esiste?" domandài colant jù des nulis "sono quasi vent'anni che mi parlano di Buja!"

"Esiste il Comune di Buja" - al spiegà - non il paese di Buja. Se vieni a trovarmi vedrai tante borgate vicine: Santo Stefano, Urbignacco,Monte, Ursinins Grande, Ursinins Piccolo... " Plui al fevelàve e mancul 'o capivi. "Va bene, verrò a trovarti... ". "Non puoi sbagliare. Superi Bueriis, giri a sinistra, quando vedi una fornace ti fermi... " A cjaval di un motorin, tun dopodismisdì di avost dal 1957, 'o viodèi Buje pe prime volte. L'imagjne 'e deventà verde, ondulade, plene di lûs, dolce, profumade di mil flôrs, e si fermà tal cûr di un fantat di vinc' ains.

"Bello davvero, questo posto" - disèi al mio compain - "ma credo che non lo rivedrò più... " . “Pensi di morire presto?" - mi domandà ridint. - "No, è fuori mano, bisogna venirci di proposito; se fosse sulla Pontebbana... " An dopo an o' cognossèi altris bujaz, ch'a no si clamavin Calligaro, e a' meliorarin l'imagjne dal lôr paîs. 'E ere dute int ch'a saveve lavorâ ben, ch'a studiave, a' faseve medais, a' scriveve libris, e aj tignive a fâmi savè di jessi di Buje: "Civis bujensis sum"! Une dì o' disèi a un di lôr: "Jse federade cul Friûl la Republiche di Buje?" "Eh no, fantat, mi rispundè Buje non è une Republiche, Buje 'e je un Regno!"

Al sarà stât ancje un Regno, ma par me al continuave a jessi fûr di man, e a Buje 'o tornài dome il 7 di Lui dal '68. Prime tal Cine dal Tabeàc e po in Mont, a messe a San Laurinz, e par une Kermesse là de Sagre di Primavere. La fieste 'e ere organisade di un grop pulitic, ch'al veve vût un grant sucès eletorâl e che propit a Buje al veve tirât-su un grum di vôs. No eri tranquil in chê di e no ài vût vôi par cjalâ Buje. I miei pinsîrs si piardevin tun gherdei di problems nassûz dopo lis elezions. 'O crôt che tanc' altris a' pensassin al avignî, ancje pacèche l'art dal pulitic 'e je la prevision (!), e qualchidun, judànsi cun qualchi tai di vin, al tentà di fâ il strolic. S'o pensi a ce ch'al è sucedût dopo, 'o crôt di podê scrivi che forsit nissun al à induvinât alc.

Al è miôr, d'altre bande, che i umins no cognossin il lôr futûr, che qualchi volte al plate brutis robis (la muart, il taramot...), e altris voltis, come tal miò câs, al è plen di salût e di furtune, ma tune direzion imprevedibil e incredibil.

La juste prevision dal miò futûr, in chê di lontane, 'e sarès stade cheste: "Tu tu vignarâs a Buje simpri plui di spes, ancje se no je su la Pontebane e se vuei no tu âs amîs culì atôr. Tu amarâs cheste tiare e cheste int simpri di plui, fin che une dì qualchidun ti domandarà di scrivi la storie dal paîs, e tu tu scrivarâs un libri ch'al varà su la cuviartine une biele foto a colors de gleise di San Laurinz, sdrumade dal taramot... Si, il tiò destin nol è chel di un pulitic: tu deventarâs un scritôr di storie!" Se qualchidun mi ves dit chestis peraulis, ai 7 di Lui dal '68, 'o varès cjapât pôre o no j varès crodût. A' ere, invezit, chê la veretât.

Vuei il libri al è une realtât e 'o crôt ch'al sedi impuartant non dome par me, ma ancje par duc' chei che lu leiaràn. Al contribuirà di fat a creâ une gnove imagjne di Buje, che par tanc' 'e sarà l'uniche in sens cultûral e storic. Jò, naturalmentri, 'o ài fat il pussibil par dâ di lèi, cence ofese pe veretât storiche, une imagjne pusitive di Buje, e 'o scuèn dî che il compit al ere facil parceche la federazion di borgadis ch'a fàsin corone a Mont 'e à une muse biele, ch'e puès jessi mostrade vie pal mont cence bisugne di cosmetics o di operazions di chirurgje plastiche. 'O crôt che il libri al sedi onest, parcè ch'al dîs ancje qualchi difiet, e duncje al mostre un ritrat credibil di Buje e de sô int.

Al pues jessi doprât ancje come biliet di visite, ma al è clâr che la vere imagjne di Buje la fàsin i bujaz dì par dì.

Al è dome di sperâ che i bujàz di doman a' sedin boins di dâ al mont une imagjne di Buje ch'e semei il plui pussibil a chê ch'e salte fûr des pagjnis dal miò libri.