Tombe paîs di aghis

di Ermes Taboga

FOTO

Aghe par lavorâ.

Il canâl dal Lavio (Canale Ledra-Tagliamento), simentât tai ains '80 in tune maniere che di sigûr no a 'zovât al paisag, al à une lungje storie.

In Andreuce, dongje dai portelons, si lei sun tune lapide che lì, il cinc di jugn dal 1881, 'e jè passade pe prime volte, par bagnâ la planure furlane, l'aghe dal canâl che i Venessians 'e vevin scomenzât tal Schirat già dal 1487, ma sospendût subite dopo par colpe de vuere cu l'Austrie. A lunc e a plui ripreses si ere tentât di fâ lâ indenant i lavôrs, cul scopo di creâ un canâl navigabil che, passant par Udin, al colegâs il Tiliment (e la Cjargne) al mâr.

Par ch'el ch'al riuarde Tombe, il Lavio al furnive fuarce a une pizzule centrâl (le turbine, lì ch'al sta Delio Pessete) fate costruî de C.E.B. (Cooperativa Elettrica Bujese) e jentrade in funzion dal 1926. Lis turbinis si cjatavin tal plan plui bas dal fabricât, 'e vignivin fates girâ de aghe dal Lavio, fate jentrâ pôc disore cun tun manufat ch'al cjapave dentri un teraplen cuviert cun blocs di siment e i sifons, in part ancjemò visibî, e cuindi rimetude tal canâl prime dal puint su le strade. Chest comedon nol permeteve di sfrutâ ben la modeste velocitât e fuarce de aghe (che no veve salt), nonostant ch'e vessin cirût di dai plui corse creant un sfogo cun doi granc' tubos ch'e slargjavin el puint. Par chel i dinamos, ch'e giravin ta chel che cumò al è il plan abitazion, 'e furnivin pocje corint: 100 chilovaz l'ore. Te turbine 'e lavoravin doi omps fis: Agnul Linz e Giuseppe Pezzetta (pari di Mario de Lûs, nono di Bepino). Le turbine 'e lavorà par un cuindis ains par furnî corint a Buje e po ‘e fo metude in vendite dal 42.

Dal '45 'e fo costruide le centrâl Savorgnane par cont de S.F.E. (Societâ Friulana di Elettricitâ) cjapant l'aghe dal Lavio.

Le corint a Tombe 'e vignive di Osôf, furnide de Cooperative Eletriche Osovane che le cjapave te Savorgnane. Le gabine si cjatave in face de scuele, su l'ôr de strade, de bande de cjase di Roberto Fanzut.

Te cjase dongje de Centrâl si stabilirin dôs famees: Raffaele Muner, ch'al veve tre fîs, e Jafet Rumiz. Chest nol veve fîs; le so femine 'e faseve le sartore e les 'zovines di Tombe 'e lavin a imparâ a cusî lì di jè. Vuè le centrâl 'e parten a l'ENEL, 'e jè automatisade e te cjase dongje nol sta nissun.

Par fâ in mût che le aghe de condote ch'e jessive de Centrâl 'e ves un sfogo libar e no cjatas rivoc, al fo drezzât e profondât el cors dal Orgelât, ch'al jentre un 100 metros a misdì, cun tun canâl fin in Andreuce. Cheste retifiche, slontanant l'Orgelât dal Batafiêr 'e gjavà l'aghe ae ruvede ch'e dave fuarce da plui di cent ains ae farie dai Vatolos ch'e forin rifondûz cun tune furnidure di corint. Mentri dal '40 'e vignive su le vecje farie di Sandri (slungjade viers nord dal '45 cun tun toc gnûf dulà ch'al lavore ancjemò Bepi cun so fi), ch'e funzionave a corint, ancje s'e veve dongje l'aghe dal Lavio. 'E murive un'atre farie che si ere nudride par scuasit 25 ains cu le fuarce de aghe dal Rouz, dongje de cjase di chei di Scriz, 'e jere la farie di Agnul di Doro (Angelo Tonino, classe 1885). Omp ingegnôs, brâf turnidôr di lavôrs in len, marescalc e carîr, ma no brâf ministradôr, Agnul al scugnì sierâ e spostasi a Osôf cu le so numerose famee: sîs fies e doi fìs. De vecje farie, dongje el puint al restà par ains nome el murùt ch'al tignive su le ruvede in te aghe. Vuè, soredut dopo che el Rouz al fo intubât, no reste olme.

Aghe par lavâ.

A Tombe si contavin tanc' lavadôrs. Indispensabii une volte, vuè tocs di museo, par vie des machines di lavâ, 'e jerin sparniçâs in tanc' puesc' par jessi a puartade di man e par garantî le massime disponibilitât. El principâl, chel ch'al â viodût, e sintût, plui pezzoz, al è el lavadôr di Tombe. Fabricât dopo dal vinc' (sun tune colone al è scrit 1927), cun tune struture regolâr a pilastris in siment armât ch'e tegnin su une solete plane di 3 metros e 77 par 14 cirche, si conserve ben, scuasit intat ore presint, ancje s'al â vût des modifiches: 'e son stades alzades les pieres par podê lavâ stant in pîs e les vascjes, in origjne largjes tant che el Rouz, 'e son stades ridotes in doi laips alz e strez dulà ch'e côr l'aghe tirade su cun tune pompe eletriche. Une volte l'aghe dal lavadôr 'e vignive furnide dal Rouz ch'al nasseve te fontane dal Vuâr (cussi clamade par vie di un grant vuâr ch'al ere lì dongje), a dret de centrâl, cirche, e ch'al cjapave ancje aghe fra le braide di Menocjo e chê di Medio di un riul ch'al partive di là dal Lavio, al vignive jù su l'ôr de strade vecje di Cjamp e lì dal Barbon al cjapave aghe dal canâl di irigazion (su chest riul, a dret dal Salet e de canoniche 'e jerin âtris doi lavadôrs). Cuant che l'aghe dal lavadôr 'e jè deventade masse scjarse par vie ch'e ere vignude a mancjâ le prese dal Lavio, les femines 'e protestarin fuart e a lunc fin che le S.F.E. 'e fo obleade a meti une pompe tal lavadôr. Sul ôr dal Rouz si podeve viodi puesc' di lavâ ancje lì di Scriz, lì dal Rôs, lajù de braide di Testôr e soredut a Tombe di Sot, dulâ che un lavadôr avonde grant al vignive doprât in câs di emergenze e par lavâ i bugjei dal purcit.

Aghe di bevi.

Une falde bondante di aghe buine 'e à simpri furnît les tantes pompes batudes jù tai nestris curtii.

Vuè le falde si cjate a doi metros e cuarante sot el plan di campagne. A cinc metros in sot si cjate vonde aghe par bagnâ i cjamps, ma tocje lâ in sot almancul dodis metros par cjatâ aghe buine di bevi. E pensâ che le falde si è sbassade di un metro e miez dopo le retifiche dal Orgelât!

Ma Tombe 'e veve ancje fontanes che duc' 'e cognossevin e dopravin cuant che el lavôr dai cjamps al impiave le arsure: cui no cognossevial les fontanes dal Pasc, massime che dal Moc? E chê de Codate? E chê dal Vuâr ch'j ai ricuardât prime? Altres fontanutes 'e 'erin atôr pai fossai e 'e creavin riuluz e gatui ch'e traviersavin le campagne. Cumò 'e son stades bonificades opûr 'e son sparides cul sbassament de falde.

Les fontanes dal Pasc ch'e dan vite ancjemò al Tilimentuz 'e creavin une oasi naturâl veramentri biele. Cumò, dopo che el cors dal Tilimentuz al è stât sprofondât par da plui aghe ae pescjere di Bruno Micon, les fontanes 'e an gambiât fisonomie e, scuindudes des cises, dificil di cjatâ 'e son scuasit dismenteades.

Ancje les fontanes dal Orgelât, in Cjamp di Buje, 'e semein un riulut di nuje, scuasit platât des fuees e des jerbates, ancje se crein un biel cors di aghe frescje e buine. Cul «riordino», le Roate 'e jè deventade un canâl ch'al compagne le strade drete come une sclopetade, cence cises e nîz di uceluz. Cheste fontane 'e nudris ancjemò le condote de aghe ch'e va a San Denêl, dongje el Tirassegno dulà che une pompe le sburte su in tune vascje picjade ad alt par furnî el paîs.

Prime dal '30, prime che vignis sfrutade cheste fontane cun tune prese a «caduta», ven a stai cence pompe, l'aghe de condote 'e vignive gjavade dal Orgelât cun tun tubo ch'al passave sot dal Lavio pôc prime che les aghes si misturassin in Andreuce là dai puintuz.

Aghe par bagnâ.

A Tombe al è dificil che el sut al fasi granc' damps: cjere fonde e falde alte ju ridusin al minim. Ma instès, posto che comande le culture de blave, bisugnose di tante aghe che les stagjons mates no sigurin, ca e là 'e son poz di dulà che si pompe l'aghe cul tratôr par bagnâ le campagne sclendaride de canicule.

Tal Salet, el fatôr dal Cont, Macan, al veve ideât e realisât fra el '20 e el '30 el «canâi di miez», cussi clamât el bocòn principâl dal sisteme di irigazion, par inagâ i cjamps. Plui tart, pôc prime dal ’50, chel trat al fo colegât a tanc' braz traviersai par servî miôr dute che biele campagne.

Aghe par pescjâ.

Ancjemò tes aghis dal Orgelât si viôt tante int butâ el amp, massime tes gares di pescje o tes zornades subite dopo, par cjapâ le trute. Une volte no coventave molale: le trute 'e jere bondante e si pescjave ancje el temul, un pes plui preseât de trute ch'al brame l'aghe pure e ch'al testemoneave le gjenuinitât di chel cors cence bisugne di provinâle. Vuè al è plui dificl cjatâlu!

Si podeve pescjâ le trute ancje tal Rouz, dulâ che cu les cuardes (e i gjavedons tai amps) si cjapave tante bisate e ancje gjavedons e gjambars.

Ancje el Lavio al 'ere gjenerôs di pes (scuâl, massime), come les poces dal Casel dulà che si cjapave tencje, sgjardule, pescesole.

Tal Rouz, cui gei di lavâ o scludint cuant che l'aghe 'e jere basse, si podeve cjapâ le vrie par une buine friture; tes tantes poces atôr pai prâz opûr là de Merie, dongje de Gravate, si cjapavin croz, magari di gnot, cul lusôr a carburo... cence contâ di âtres tcniches, doprades no par uadagn o tristerie, ma par furnî ches poares taules cun alc di bon.

Aghe par divertisi.

Le bondance di aghes, di divierse profonditât, 'e garantive a due' le pussibilitât di nadâ daûr le capacitât e el coragjo.

Par tanc' mui el Lavadôr al ufrì el prin «approccio», sot dai voi des maris, intant ch'e spetavin di judâles a slargjâ i linsui o a puartâ el gei. Po dopo, lassù dal Barbon, disore de Ferade, tal Lavio, te Poce dal Casel, tal Lagut dal Riscjel e, finalmentri, tal Orgelât si fasevin i pas par deventâ nadadôrs bulos e invidiâs. Chel ch'al lave a nadâ tal Orgelât, sfidant le corint di che aghe frede e fonde, al veve tante braure ch'al podeve meti fin diretamentri a un contraditori cu le frase: «Tas tu, che no tu vâs nancje a nadâ tal Orgelât!». Culì difat si misuravin i pui brâvs: cui a traviersâlu a dret, cui a rivâ fin lajù dal Batafiêr o magari in Andreuce, cui a saltâ dal puint (come Diego Piceche ch'al sbissignave fin su le strade) o a tufâsi. Mi visi che Tiliut di Delio, par dôs balutes di gjelato (vinc' francs) si butave de spingje dal puint di fiêr. E no nome lui. E duc' 'e cirivin di vantâ cualchi specialitât.

'E jere tant le gole di nadâ (e tant le pore dai nestris gjenitôrs) che nô mui no podevin simpri cjapâ su i mudandins par lâ a fâ el bagno. E alore, massime te poce dal Lavio, fûr di man, ce tanc' mui a nadâ cros. Ce 'zuades te scjadude dal Lavio, ce sals te Poce, ce tanc' dispies, ce bevudes!

D'unviêr, les grandes criures di chê volte 'e creavin lastres penges di glace tai fossâi, tes poces, e alore vie a slichiâ cu les slites di pueste pe glace. I mui si sburtavin indenant cui rampons (doi bastons curs cui claus in ponte, spiçâs par plantâu a fâ jeve cun lôr) a dute velocitât, cualchi volte te glace masse fine e alore le corse 'e finive cun tun bagno fûr stagjon. Ma nuje pore: al 'ere simpri cualchidun ch'al veve fulminans di len par impiâ un bançûl di soreâl e suâsi par no torna a cjase a cjapâles par vie dai vistîs bagnâs.

I puesc' preferìs 'e 'erin le Poce dal Casel e soredut une poce di lâ dal vignâl di Franco dal Salèt, dulâ che cumò 'e sta me agne Ines. In chê volte 'e 'ere une grande buse restade dopo ch'e vevin gjavât le grave par fâ le ferade, jemplade de aghe di un riulut ch'al vignive jù de zone des fabriches di cumò e di un braz dal canâl di irigasion. Un'atre buse 'e jere disòt de ferade (cumò Osovane) e l'aghe 'e finive te Merie che d'unviêr 'e deventave une lungje piste pes nestres slites.

Sul lavadôr, tal Rouz, tai fossâi, i fasevin ancje navigâ barcjutes di cjarte o fates cun grant ingen cu les fuees des cjanes. I cjatavin insome tantes manieres par divertisi cence 'zugatui, ch'e costavin e che nô no podevin comprâ...

Curiositâs su les nestres aghes.

Par capî ce tant ch'e jé gambiade le nestre idrografie al basti pensâ che une volte, su l'ôr de strade che de place 'e va viers le Osovane al 'ere un grant fossâl plen di aghe, ch'al fo bonificât par fabricâ cjases e le latarie. Jenfri cheste e le glesie 'e jere une buse fonde dulâ ch'al colà e al murì inneât, el tre di otubar dal 1890, Enrico Pezzetta (Piceche), un 'zovin di 29 ains, ch'al sofrive dal mâl dal assident. Le disgracie 'e jé documentade di une lapide picjade tal mûr de glesie.

Une grande impression al veve fat l'incident tocjât a Giordano Pezzetta, fradi di Delfine, tôr dal '22-'23: al 'ere sbrissât dal puint dal Orgelât (di len, in che volte) intant ch'al tir ave clas te aghe e, colât dentri, al riscjà di inneâsi. Lu salvà, cun fadìe, gno barbe Ugo Covasso (Savi).

Les poces dal Casel (chê a misdì de Osovane 'e jé stade bonificade, chê a nord 'e jé scjafojade des cjanes) 'e jerin ce ch'al restave dal vecjo Orgelât, dopo che le ferade lu veve tajât in doi e che le retifiche lu veve fat deventâ une aghe cuasit muarte.

Prime che a Tombe al rivas l'acuidot (tai ains sessante) le mularie e le 'zoventût 'e lavin le sabide, di solit, a fa el bagno in tun sifon dal canâl di irigassion dulâ che l'aghe 'e jere juste clipe.