Viers el 1750 i mei parinc’ ‘e an comprât le fornâs dal’Abazie di Muec. E di pari in fî si ‘e tramandade fin a gno bisnono, Filip Cjocjo.

In te fornâs ‘e an lavorât fin ae muart dal gno bisnono, tal 1974. Si lavorave dal’avierte fin al autun, granc’ e frus. Si lavorave simpri. Si comenciave apene che al cricave el dì, fin quant che al vignive scûr. I granc’ ‘e stampavin modons cops e planeles; i fruts ‘e vevin di slargjâ sule place el lavor dai stampadors. E cussì i fruts ‘e corevin dut al dì.

Me none Livie ‘e à fat par ains chel lavor a lì, sot le guide di so pari. Pui voltes le gnot ‘e scugnivin jevâ di corse quant ch’e sintivin a tonâ e a lampâ, par cjapâ su el modon o el cop o le planele che vevin metût a suâ di dì; senò le ploe ‘e disfave dut el lavor fat te sornade. Pui voltes si son duc’ bagnâs e ‘e àn scugnût lassâ lì dut el lavor a ruvinasi parceche el temporâl al ‘e stât pui svelt di lor.

In tal an 1962, Austriacs ‘e son vignus in Friul à viodi cemût che si lavoravin i modons a man, parceche nome te fornâs di Cjocjo si lavorave ancjmò a man. Ches atres fornâs ‘e dopravin les machines.

Le fornâs d’astât ‘e jere un puest dulà che vecjus dal timp ‘e vignivin a pît, ancje ogni dì, par contâ les stories di cuanche ‘e jerin giovins, intant che i operaios ‘e lavoravin. ‘E fevelavin di politiche, di vuere e ancje dai laris ch’e vevin svaligjât i gjalinars o les cantines di poles, salamps e formadis; e i fruts che sintivin si smaraveavin.