Sul Bollettino della Pieve arcipretale di Gemona dal mês di setembar dal 1951 al mês di mai dal 1952 in sîs puntadis al comparive un Elenco di tabernacoli, ancone, nicchie, emblemi religiosi esistenti nel territorio della Pieve di Gemona fuori delle Chiese. Lì 'e vignivin regjstradis 115 anconis, ognune cun tune pizzule descrizion e l' indicazion dal luc. 'O vin volût provâ a viodi tropis di lôr ch' and' è restadis dopo la ruvine dal taramot, ancje sburtâz de biele iniziative cjapade de riviste Sot la nape 'za dal 1985 (cfr. G. BERGAMINI, Per la salvaguardia degli affreschi devozionali, 37, 1985, 5 - 16). Il belanz nol è par nuje confuartant. 76 anconis 'e son ladis distrutis dal dut e nome 39 'e son ancjmò in pins: 34 regoladis o in bon stât di conservazion,7 di podê recuperâ 5 che apene al reste qualchi segnâl. Lis vin fotografadis dutis, metint dongje 4 gnovis che no jerin prin dal taramot e 7 in parochie di Ospedalet. Cussì il totâl dal nestri inventari al segne 50 aconis tal Comun di Glemone. Come ch' o vin scrit l' an passât a proposit des anconis di Buie, chei semplizs monumenz 'e son un document rampit de vite dal popul, une espression de pietât popolâr, un trat de nestre antighe identitât culturâl. La lôr pierdite ' e segne duncje une modifiche profonde dal orizon de nestre civiltât. Al è di augurâsi alore che qualchidun i pensi parsore e al dedi une man par salvâ almancul alc di chest patrimoni culturâl.