Anconis

di Osôf

Las anconas a' son la testemoneanza di una cultura dulà che l' aspiet coletif al era un pont fondamentâl in ta vita da int. Chesc' pizzui monumenz, faz-sù da l'omp, coma espression di una religjositât popolâr e miôr ancjmo coma espression carataristica di una civiltât, a' son propit chei elemenz che àn la fuarza di trasformâ un ambient naturâl in tun ambient culturâl. 

A Osôf no si cjatavin tantas anconas prin dal taramot, ma chês pocjas, su las cjasas e su l'ôr das stradas, a' èrin ce-tant elegantas e bielas sot l'aspiet artistic: segnai ch'a esaltavin la religjon, lûcs di pòlsa e di prejera. Tas anconas i nestris vons a' vèvin esprimût la lôr devozion o il lôr ringraziament par cualchi gracia otegnuda. Dibott dutas las anconas di Osôf a' èrin pituradas a fresc. Ancja siét stazions da Via Crucis, ch'a si cjatavin su la vecja strada ch'a puarta in Forteza, a' èrin afrescadas dal pitôr osovan Domeni Fabris. Chestas pituras a' èrin bielzà ladas pierdudas prin dal taramot par colpa dal timp e da trascuragjna da l'omp; l'ultin sbrendul, ch'al mostra il Crist cjamât da crôs, al è stât recuperât di pôc e sistemât tal altâr da glesiuta di San Jacum tal Borc Ulîf. 

Grazia al preziôs lavôr di inventariazion fat prin dal taramot dal geom. Walter Forgiarini (Duturin) di Osóf 'o podin tornâ a viodi in chestas pagjnas ancja dodis anconas ch'a son ladas pierdudas par simpri. Fin cumò nissun al à pensât di torna a piturâ chesc' capitèi; al sarés di sperâ ch'al fos fat un concors e cui sa che cualchi artist a nol vegni a pojâ la sô firma a Osôf.

Il teremot al à distrùtt una granda part di chest patrimoni tipic da nestra cultura popolâr, ma il piês al è stat fat da dismenteanza e da insensibilitât da int che no à rivât a capi che pierdint chestas espressions artisticas minôrs a' pierdeva una part da sô storia. Al part che a Osôf, in chesc' ultis timps, al torni a dismovisi in tal privâz chel sens religjôs che par antic al à fat nassi chesc' simbui di devozion; o esa ancja una dibisugna di "identificazion"? In tun paîs ch'al à gambiât musa, dulà che no si cjatin pui curtii, beorcjas e plazzutas, la int a' cir cualchi segnâl ch'a la judi a ricognossisi in chei lûcs e ch' al dismovi ta lôr anima il sens di jessi dutun cun chel puèst tant diviers di chel di prin. Un borc intîr (il borc dal Plevàn) tal mês di genâr dal 1988 al à domandât a l'Aministrazion comunâl di podê torna a vê, in tal puest di prin, l' antìga ancona (ch' a mostra la Madona cul Bambin) salvada dal teremot: l'Aministrazion no à ancjmò di rispuindi! 

I nestris timps, ben si sa, a' no son pui chei di una volta, cuanche ancja il cjaradôr, passant devant di una ancona, par rispiet el gjavava il cjapiel, ma di sigûr ancja vuê la presinza di chesc' segnai di fede a' infont ta l'omp un sintiment di pâs e di speranza: ricjezzas cirudas vuê pui che mai.