La fotografie 'e je une art. Sô carateristiche di fonde 'e je di fissâ dal timp une situazion ch'e esist o ch'e esisteve.

La mostre fotografiche «OCCHIO CRITICO», metude adun dai 'zovins dal «Gri di Buje», che si è sierade ai sîs di fevrâr e che à vût un miâr di presinces, 'e voleve sei un mût par sveâ la cussienze des profondes trasformazions dal paîs vignudis in chesc' ultins ains e par cirî di drezzâ, par chel pôc che aromai si po', un mût di fâ-su ch'e nol à tignût avonde cont de preesistenze.

La «leture» de mostre 'e podeve sei fate secont doi tais. Il prin al riguarde le cjase bessole, il secont la sô posizion tal borc.

Le cjase a Buje, pe gran part, 'e jere, fin sul scomenzâ di chest secul, une cjase di contadins (jessint l'agricolture il mût solit par sbarcjâ lunari), cun tune fisunumie, che, pur cambiant secont il tipo di abitanz, mezàdris, fituai o atri, 'e restave un pichet salt te architeture locâl, come ta chê dal Friûl in gjenerâl. Chest mût di fâ la cjase, dât che s'e fasevin di bessoi i nestris vons, 'e jere la uniche rispueste pussibil a duc' i parons ch'e àn comandât in Friûl dilunc i secui, puartant la lôr culture dominant. Nô no sin stâz boins di lâ indenant cu la lôr «filosofie» de cjase; anzit, j vin dât une sbur tade indenant a un fenomeno che si veve bielzà comenzât a viodi prin dal taramot, cul «boom economic». Ven a staj, no plui le cjase-curtîl stale, ma le vilute-zardin-capanòn.

Tal gîr di siet ains (ancje se j vevin comenzât ancjemò vinc' ains indaûr) j vin scancelât dal dut o quasi une identitât storiche e sociâl, par rivâ a chê pseudo-culture ch'e à burît-fûr il mito de «vilute».

Di pseudo-culture infati si trate, dal moment che la architeture 'e à simpri fat viodi a ce scjalin ch'al è rivât un popul. Nô j sin stâz boins nome di copiâ modei che cun nô no vevin nuje ce fâ, lant daûr dal mût di pensâ ch'al puarte a chê ch'e ven clamade «massificazion». Il secont tai di «lei» la mostre al riguarde l'inseriment de cjase in tal borc e il borc stess. A part qualchi rare ecezion (fasint simpri riferiment ae mostre), si à l'impression, come ch'al à dite Remo Cacitti ae presentazion de mostre, di vê denant une «periferia senza centro», tanc' edifizis sparnizzâz un chì un là. Cumò come cumò si à di fat un nivelament dal teritori, nè «rural», nè «urban» (dispes si use dî che une cjase «rurâl» 'e stone).

Ma jo 'o vuei sperâ che sí rivi ancjemò, midiant chel pôc ch'al mancje di rieostruî o di ripristinâ, a meti un sblec, tornant, se no dal dut, almancul par chel ch'al è pussibil, a ricreâ chê armonie ch'e jere prin dal taramot. I mudamenz 'e àn rot l'equilibri dal ambient, ridusint a flics i vecjos borcs. Si à vût, in sostanze, un cambiament dal mût di «sei a stâ». La mê convinzion e je che chel ch'al sucedarâ ae architeture e al teritori, tai ains a vignî, al dipenderà de ch'e cussienze culturâl di chei partègnin al mont «rurâl». Nome se chesc'e saran boins di fâ un struc di vieles tradizions, ancje tignint cont des modernes tecnologjes, si podarà salvâ la continuitât de nestre culture.