E jè int che e fâs vacancis lontanis, che e cognos ducj i sucrits de Calabrie, ducj i grebans grecs de Sicilie. Int che si è sfuarçade di imparâ l'anglês par podê lâ in vacancis in cja' dal diaul e magari no sa il furlan che al è il lengaç dai siei vons e no si è mai interessade des testemoneancis antighis di cjase nestre, dai nestris sîts, dai nestris paisaçs.

Cjapìn, par un esempli il paîs di Buje, cul “j” lunc, un paîs sparniçât fra alts e bas, fra palûts e cuelinis e cuntune storie milenarie e viodìn insiemit se no pae la pene di fâ un zîr pal cumun.

Tachìn cul gjoldisi il fresc dai cjistinârs e dai frassins sul cuel di San Bastian, daspò, anin, sfiliant la Ledre apenis nassude, l'aghe e madrache vie fra i cisons di ornâr che a supin di jê il lôr sosten e che a dan vite cu lis lôr ladrîs a chês renzitis là che si plate la trute o il barb; daspò anin ju al viers di Tombe là che al à principi l'Orzelât o vie par Urbignà là che al à nassince il Cormôr; cence dî po dal Cuâr che al à ancje lui la sô licuide ladrîs ta chel di Buje prin di jessî e indalegrâ Mels, Pers e Farle.

Po no si scuegnal dî che une tiere che e jè mari di tantis aghis che a son simpri stadis la furtune dal om, e jè une tiere che e à vût la benedizion di Diu?

Cjalant chês aghis, paraltri, bisugne ancje dâ slas a la fantasie, a la inmagjinazion e pensâ a ce che a san, a ce che as àn viodût tal lôr lunc pelegrinâ dentri e fûr dal antîc lavio; a la inmense poesie di chês vongulutis d'arint che cul lôr fresc murmui a cjarecin lis ladrîs dai mulecs e dai ornârs e ur contin cul lôr inmagât lengaç, dut ce che as àn viodût e sintût lunc vie dal lôr viaç che al dure e si ripet di secui, lant al mâr e tornant a lis monts cun chei spiumôs nui blancs che a galopin pal cîl.

Tocje ancje cjalâ cun ce serenitât che chês aghis a acetin il lôr nassi e il lôr murî savint dal lôr prossim resurî e daspò fâ confront cu la nestre vite e vê fidance che pareli al sedi il nestri destin.

Si capìs, paraltri, che un che al ven a visitâ un paîs nol ven nome pe Ledre, l'Orzelât, il Cormôr e il Cuâr, ma al brame ancje di viodi cualchi biele glesie, cualchi lûc di cult e alore jo lu indreçarès al viers di Vile cu la sô glesie di San Pieri o de “Madone dai fornasîrs”: une glesie che e jè nomenade inmò dal 1300 e modificade dal 1700-1800, butade jù e tornade a fâ tal secul stât e fate gnove daspò dal teribil taramot dal 1976; lì si pò amirâ une statue de Madone dai fornasîrs fate tor de metât dal 1800 e une “Via Crucis” cui cuadris di bronz fats dai miôr artiscj talians contemporanis.

Pôcs pàs plui in sù, il ridulint sît di Ursinins Piçul cu la sô biele glesie di Sant Josef datade 1660 e un fregul disot une ancone de “Madone de uve”, cuntune sculture di cuet fate tôr la metât dal 1800 di Vissens Giordani (el mago Bide di Miòt).

Cumò il forest al à bevût un taiut e al pò frontâ chei pôcs metris di rive sù che, prin passant su la place dal marcjât e po denant dal Tabeac, lu puartin sul plaçâl dal dom di San Scjefin: 1889-1898. Il prin fabricât, paraltri al fo dal 1200 e incressût tal secul diesim sest; la façade che in dì di vuê si viôt e jè dal 1937 e il tôr al è stât finît dal 1940, la ristruturazion invecit e jè, naturalmentri, di dopo dal taramot dal 1976.

Di chi o podìn lâ in mont: de plêf di San Laurinç si sa di jê fin dal cuint e sest secul, la glesie romaniche e fo fate fra il diesim secont e il diesim tierç secul e chê che o viodìn in dì di vuê, fra il 1871 e il 1873; une capele e à afrescs dal 1300-1400 ; si puedin viodi ancje dôs statuis di len che a representin sant Antoni e la Santissime Trinitât, dal 1400, che a son di Domeni di Tumieç.

Dutis chestis bielis oparis, paraltri, il visitadôr nol à di cjalâlis nome cul voli rivolzût a l'art o l'estetiche, siben cul voli dal cûr e dal sintiment e pensâ a ce che chescj sagris sîts a representavin in chei timps di miserie invasions e maçalicis e inmagjinâ cun ce cûr che la int ju frecuentave, lant a cirî confuart, a domandâ graciis, a fâ avôts e confessions.

Chei mûrs ai ân scoltât dutis lis strussiis di un popul e ancjemò vuê, se si lassissi daûr par un moment la spasimade vite moderne e si jentre inta chei sagris e cidins sîts, inta chel lôr fresc cupêç si percepirà chel misteriôs sens di calme e di confuart che la int e à aurît in chei agns tant tribulâts.

Il visitadôr cumò al domandarà di viodi cualchi segnâl de storie antighe di Buje e nô lu menarìn sul cuel a soreli jevât de plêf e i mostrarìn i rescj dal cjistiel patriarcjâl fat inmò prime che l'imperadôr Oton secont di Sassonie (955-983) al regalàs il feut al Patriarcje Rodoald.

Podopo se si vûl viodi cualchi segnâl de civiltât rurâl si pò lâ intai Salets a viodi la cjase Elti cul so borc cui puiûi di len e cul sotpuarti a arc e i antii di piere o si po ancje lâ in Andreuze che e cjape il so non de famee Andreuzzi di Sandenêl che e veve lenti putropis propietâts inmò dal 1600. Lì si podarà viodi ancje un grant rôt di fiêr che, une volte, mot de aghe di une roe che in dì di vuê no jè plui, al faseve cori i mais di une farie.

Ancje lì nus vignaràn inniment lis vieris voris di cuant che si faseve lis forcjis a man e, pûr tal cidinôr presint, nus tontonarà intes orelis l'antîc bati dai mais e, denant dai vôi o varìn il slusignâ des fusinis sot l'ansemâ dai sfueis.

No steit a dîmi che nol pae la pene di vignî fin a Buje! tanteplui che lunc vie de spassizade si à l'intîf cu la int dal sît che e jè, di simpri, svearine e intrant ancje se un fregul bonarimentri soradine; int lavoradorie, artiscj di ogni mistîr bogns di fâ di dut, dal modon a la monede: int che e à stramudât valîs par dut il mont e che e à fat cognossi e preseâ par dut, il non di Buje cul “j” lunc.