Par une «Banca delle immagini». Si intitulave cussì un dai ultins articui di Andreina Nicoloso Ciceri in “Buje Pore Nuje!” dal 2000, l’ultin numar ch’al puarte le sô preziose e qualificade colaborazion. Ta chest scrit nus invidave a recuperâ e cjalâ cun voli di rivuart les fotografies che pal plui i conservìn in maniere disordenade, magari butades malamentri intune cassele di scarpes e dades ai fruts par che stessin boins quant ch’e jerin malâts.

Chest invît, fat di une studiose di chel calibro, mi à invoât a meti adùn “l’album di famée di Ursinins Piçul”. Chest no par un fat nostalgjic, el timp nol côr denant daûr e no si po lâ indenant cul cjâf par ledrôs, ma par mantignî e trasmeti le nestre memorie storiche. Parceche une comunitât cence une cussience di ce ch’e jè stade no sa ben indulà lâ, soredut in timps di massificazion e omologazion planetarie come i nestris. A chest al è di zontâ el valôr documentâl de fotografie, e cussì i podìn viodi cemût ch’i sin gambiâts nô come persones, cemût ch’al è trasformât el paîs, cemût ch’al è gambiât el mont dal lavôr, el rapuart cules besties, el mût di stâ insieme e vie indenant.

Un’âtre considerazion che si po fâ cjalant chestes inmagjines e jé le grande dignitât des persones ritrates. Si po ben dî ch’e si fasevin fotografâ da râr, ma ben. In dì di vuê podìno dî altretant?

Chest lavôr nol podeve jessi fat cence le colaborazion de int. Par chest i vuei ringraziâ di cûr ducj chei ch’e an colaborât a cheste iniziative. Mi plâs ricuardâ che i soi stât a “bati casse” no nome a Ursinin Piçul, ma ancje fûr dal borg, fûr di paîs, fûr di regjon e fûr da l’Italie. Nissun mi à dite di no. E cussì, cjapant sù un bocòn par bande, i pensi di vê rivât a meti adùn un documentari fotografic che mi auguri interessant.