Le Union Europeane si sta slargjant simpri di plui e simpri plui a la svelte. Cul prin di genâr di chest an si son zontâts âtris doi Stâts: le Romanie e le Bulgarie. A plui di qualchidùn e son vignûts i sgrisui pensant aes tantes diferenzes ch’e son tra nô e lôr, baste pensâ aes popolazions singares ch’e vivin ta chei teritoris. I furlans però, soredùt cul prin, e an cualchi pont in comun. Prin di dut le dominazion romane e le ereditât che nus à lassât tes dôs lenghes. Un piçul esempli cuntun fat vêr che nol ûl vê nissune pretese scientifiche. Intun paisùt apene fûr Timişoara i jentri intune butegute che vendeve alc di dut e ae fantate daûr dal banc i domandi par furlan «Astu par câs une cjarte gjeografiche de Romanie?» jê, cence fâ une plèe, mi rispuint «Imediât» e dopo vê sgarfât in te scansìe mi dâ ce ch’i vevi ordenât.

Altri pont di colegament e jé le emigrazion. Cumò e son lôr ch’e vegnin culì a cirî furtune e les nestres aziendes ch’e van lavìe par tentâ di restâ sul marcjât internazionâl; ma tal secul passât e son stâts tancj i furlans emigrâts ta chel Paîs ch’al ufrive grandes oportunitâts di lavôr e plui di cualchidùn si è puartade daûr ancje le famèe, mi ven tal cjâf Agnul Perescine di Ursinins Piçul.

E ancjemò. Te seconde uere mondiâl, i nestris alpins e an vût ancje i soldâts rumens tant che compains di sventure in ta chê grande tragjedie ch’e fo le campagne di Russie.

In vuere chei ch’e vìncin e comàndin, chei ch’e pièrdin e pàin e e tàsin. Cussì al fo ancje par nô e par lôr. Nô i sin stâts assegnâts al bloc anglo-american, lôr a chel sovietic, fin tal 1989 cuant che el mûr di Berlin, colant, si tirà daûr dutes les divisions decidudes a Jalta tal fevrâr dal 1945.

Le partignince a doi blocs cussì diferents politicamentri nus à puartâts a esperiences altretant diferentes: nô i vin vût el plan Marshall, el boom economic, e, pûr cun cualchi congjunture, i sin passâts di une misare societât contadine a une societât consumistiche post-industriâl di ben-stâ e di massepassudàgnine; lôr e an sperimentât el socialisim reâl cul Stât ch’al pensave a dut (di ce ch’al ere nol mancjave nuje).

Nô si sçurvielavin e sfadiavin par scielgi ce comprâ tra les tantes e diferentes ufiuertes che el libar marcjât nus meteve a disposizion: l’automobil lu ordènio berline, coupé o familiâr? dal becjâr cjolio le ponte di pet o il filèt? tal ristorant, po, di no savê ce comandâ! in vacances vòdio a Lignan o tes Maldives?

Lôr no vevin chei fastilis. L’automobil e savevin ce che ur tocjave, al ere nome chel, un model che ca di nô al jere fûr produzion di timp e ancjemò, par vêlu, e scugnivin spietâlu cualchi an. In becjarie e podevin scjelgji liberamentri tra cuei, ales o sgrifes di poleç (el rest lu vendevin ai capitaliscj). Tal ristorant tu cjatavis pui camarîrs che aventôrs (lôr, al contrari di nô, e podevin vantâsi di no vê disocupazion) che ti puartavin un menu penç tanche un messâl, nome che par solit tu rivavis a mangjâ nome une “ciorbă de porc” (mignestre di purcit) e se ti lave ben ancje un toc di cjâr, verge e cevole però and’ere tante che tu volevis. Les feries e jerin belzà programades e in tal forest e podevin lâ dome dopo une certe etât e ogni tot ains. A chest proposit i vin cognossude une copie ch’e veve une fie laureade in midisine, ben, jê no podeve fâ les vacances in tun Stât ch’al fos cunfinant cun tun paîs ocidentâl!

Cheste esperience in Romanie le vin fate, in cuatri, tal mês di lui dal 1988.

Les fotos, fates in cheste ocasion, e van cjalades tant che notis di viaç e no come un reportage e no rìvin a pandi les tantes ores passades sul cunfin par jentrâ e par jessî, cules uardies che savòltin l’automobil e ti ribàltin borses e valîs; no dan l’idee dal ferôç control sule popolazion, cui pulizais in borghês o in divise tes garites fisses plantades al inizi e ae fin di ogni paîs (al ere miôr passâ drez cence fotografâju); no rìvin a dimostrâ le proibizion di ospitâ in cjase int di passàç come ch’i erin nô; no rìndin el comfort dai hotei a cuatri steles pajâts sui 70 dolars par gnot (no acetavin i lôr bêçs ma nome dolars o marcs) cul bagno sì ma cence aghe cjalde e cuntune television in blanc e neri ch’e trasmeteve cualchi ore par sere e nome les grandes concuistes dal regim socialist sot de guide inluminade di Nicolae Ceausescu el “Geniul din Carpati” (Gjenio dai Carpazi).

Si po viodi però un dai tancj fruts ch’e puartin le vacjute a passonâ tai rivai sul ôr des strades o le femenute ch’e torne a cjase di sere cui ôcs; les cjasutes misares e colorades; le int in code par cjoli parfìn el pan (cuant ch’al rivave); estensions enormes di terens ch’e vegnin lavorâts a man, cui cjavai, cules vacjes o cun cualchi trebie che chi di nô si viodeve tai museos; le religjositât de popolazion che le domenie si viest de fieste par lâ a messe e le grande disponibilitât de int a fâsi fotografâ; i cartei che par ogni cjantòn e esàltin chê “epoca de aur” che di lì a pôs mês si sarès sfantade puartant a une brute fin el “Conducator” e le sô femine.