"... 'Nin indevant, ma a "sbighet",

e a finî lin in Salet;

Vé un cjasâl, une Castaldie,

e là el timp e' pàrin vie,

le galande 'e fûs el nît

in miez i prâz, là stan pulît... "

Emilio Aita (1910)

Favelâ dai Salez al à un savôr di incjânt; forsit pal fat ch'e 'erin parons i conz, fin a qualchi decine di ains indaûr, o parceche al è un borc isolât, ai "cunfins" di Buje o par qualchi atre reson leade al fat che pe nestre int, là ch'e jentrave le nobiltât al jere simpri alc di misteri. Le tradizion orâl 'e dîs che dai dusinte sessantesîs cjamps dai Salez e' son deventâz parons i conz Elti di Rodean, pal fat che qualchi secul indaûr e' vevin prestât bêz ae Comùne e dato che no 'erin stâz tornâz in timp e' deventàrin parons de tiere.

Daspò, un pôc a la volte, e'son stades fates les cjases, e e' son cussì rivâz i prins fituai. Les primes famees e' son stades chês di Aite e di Mochet, plui indenant e' son vignûz chei di Tic, i Forgjarins, chei dal Moro e chei di Castaldo di Lumignà. Chei di Castaldo e' vevin les clâs de cjase dai conz e dal sotpuarti che al permeteve di passâ di un curtil a di chel atri. Di chest fat al derive il sorenon. I ultins doi fatôrs e' son stâz siôr Zaneto di Glemone e Macan di Osôf ricuardât (in ben o in mâl seont i ponz di viste) parceche al à fat butâ fûr i fogolârs (and'ere un par cjase) e fat i spolers.

I conz si presentavin, pal solit, dôs voltes ad an o miôr e' levin chei dai Salez a cjoli le contesse mari e le fie a Glemone cul caretin, a mai e a setembar. Pe galete e pe vendeme. I cavalîrs e le uve e' erin a mieges. Prin ch'e rivassin i conz, par une setemane a dilunc une femine par famee' e veve di lâ a netâ le cjase e a freâ le padieles di ram, and'ere une parêt plene, des pizzules pizzules fin ai padielons. Qualchi volte i conz si presentavin di sorprese, soredut di domenie par lâ a Messe grande a San Stièfin. Quant ch'e vigniv in lumâz in lontananze duc'e' levin a mudâsi parceche le contesse 'e voleve che i "soi" fituai e' fossin vistîz mâl, di contadins, e non di siôrs.

Daspò dal '30 al vignì gambiât il fit. Bisugnave dâ al "amasso" 125 chilos di forment pai cjamps magris e 170 pai cjámps bogns. Dal '47, dopo faz i canai de irigazion, i conz e' batevin par alzâ il fit a 49 di blave par cjamp, ma i fituai no 'olevin savent. Cussì i conz e' comenzàrin a vendi i bocons plui lontans e un pôc a la volte i fituai e' deventàrin parons. Le sielte di conservâ (no come museo) ce ch'al è restât dopo el taramot, di recuperâ dut ce ch'al è pussibil, di tornâ a risistemâ dut ce ch'al jere: un borc, une cjase, un sotpuarti, les pieres des puartes, dai barcons, une scjale di clap, un arc e vie indenant, al fâs part de plui largje difese des carateristiches, des particolaritâz, de individualitât, de culture del nestri popul.

Al è clâr ch'e son ancje chei ch'e vuelin simpri sostituî dut, butantjù ce ch'al esist e chest no dome a cause dal taramot, ma pe lôr filusufie personâl. Il fat di recuperâ il preesistent al ûl dî oponisi ae strassarie e al cunsumisim culturâl e economic, acetât di tanc' di lôr. Dome tignint cont di chesc' principis si capis l'intervent fat tai Salez par intervent public.

I Salez e' son restâz par Buje un dai pôs puesc' di alt valôr ambientâl e architetonic, e chest no pal fat di vê dentri alc di particolarmentri storic, ma pal sô "insieme" in perfete armonie. In sostanze 'o podin rapresenâ i Salez come un lengaz, fat di peraules (cjases), ognune cun tun so significât, che, par modest ch'al sedi, insieme al dâ un biel discors. In sumis une robe biele di viodi e biel di sej a stâ. Un unic neo: pecjât ch'al è un pôc fûr di man, se al fos stât plui centrâl, le cort tra les cjases dai Castaldo e dai conz 'e podares sei stade doprade les seres d'astât, par rapresentazions teatrâls o musicâls in tun senari naturâl plen di sugjestion. Ma forsit propri chest sei fûr di man 'e je stade le sô salvece!

Si ringrazie Angjeline di Aite e Meni Sangoi pes informazions.