Tal mês di jugn dal 2009 il Comun di Buje al à introdusût intal so teritori la racuelte diferenziade dai refudums cuntune grande propagande e cuntun biel manifest. A dicembar al è stât fat il prin scandai e sul gjornâl numar 3 di “Qui Buja”, consegnât prime di Nadâl, si pues lei, tra lis tantis informazions, un articul par talian dal titul “Buja, comune “riciclone”. Cussì o cjatìn scrit:

“E funzione e e funzione ben il gnûf servizi di racuelte diferenziade ativât tal nestri comun a partî dal passât mês di jugn in colaborazion cu la Net. Al è juste apont, in virtût dal gnûf sisteme di pôc introdusût a Buje che o contìn di ridusi i coscj dai servizis (che si scjariin automaticamentri intes boletis) a partî bielzà dal prossim an. I prins risultâts a son par altri une vore incoragjants e nus fasin ben sperâ. I dâts in nestri posses nus disin difatis che la percentuâl di raculte diferenziade e je cressude a tâl pont intal zîr di poucjis setemanis da postâsi adiriture al di sore dal 80%, dopleant ven a stâi il precedent 40%. In chest mût dome il 20% dai refudums al finìs cumò inte discjarie, rispiet al 60% di prin. Cunsiderât che i coscj di smaltiment in discjarie tai ultins 5 agns a son cressûts cussì tant che da 70 Euros sin rivâts a paiântint 150 a tonelade, podìn facilmentri imagjinâ cuâi che a saran i efiets positîfs che si podaran otegnî batint su pe racuelte diferenziade, cui che miôr al metarà in vore la racuelte diferenziade, al podarà gjoldi di plui grancj beneficis in tiermins di riduzion de Tarsu dovude. Une tasse che – come vualtris ben o savês – e devente purtrop di an in an simpri plui pesante pes fameis, propit pe cressite dal cost di smaltiment inte discjarie. In spiete dai prossims dâts, che o verificarìn tai prossims mês, podìn definî il comun di Buje ad ogni mût, bielzà di cumò, come un dai plui riciclons no dome dal Friûl, ma forsit di dute l’Italie.”

La racuelte diferenziade dai refudums a è cussì deventade une realtât ancje intal comun di Buje. Bisugne dî che in principi dute la int à cjatât un poucje di dificoltât intal savê cemût dividi lis scovacis che prin a lavin scuasit dutis intal stes bidon. In gracie de informazion dal comun e dal jutori dai rapresentants de Net che in puescj ben precîs dal comun a jerin a disposizion par dâ dutis lis informazions dal câs, plan planchin si sin usâts al gnûf sisteme che al permet al comun e ancje a nô di sparagnâ, come che o vin let parsore.

Une volte superadis lis primis dificoltâts, sin rivâts adore di jentrâ tal sisteme ancje se cualchi dubi nus ven tal moment che o scugnìn butâ vie une robe e non sin sigûrs di dulà che e larès butade. Pensant al gnûf sisteme di racuelte nus ven tal cjâf che i plui anzians son chei che, di sigûr, a ricuardaran i biei timps passâts cuant che lis scovacis no si saveve scuasit ce che a jerin.

Fasìn alore un salt indaûr intal timp par viodi ce che a si butave vie îr e dulà che si le butave vie. E fossi scuvierzarìn che si stave miôr cuant che si stave piês, se no nuiâti pal fat che no si veve di deventâ mats a domandâsi la che e lave butade une robe o chê altre. Scomencìn alore par ordin.

i vanzums e i refudums che a van tal umit

Une volte no ’nd jere tante bondance come cumò intal mangjâ e i plats a vignivin netâts fintremai a fâju tornâ scuasit nets. No si butavie vie nuie e no si lassave lâ la robe di mâl. Chei pôcs scarts che a jerin a cjatavin il lôr puest intal mangjâ dai anemâi, che ogni famee a tignive pal so sostentament, o ben intal mussulin.

Cu la semule de blave si faseve il paston aes gjalinis e dentri si meteve cualchi scart di verduris e po ancje lis scussis dai ûfs parcè che i vecjos a disevin che cussì a varessin fat i ûfs cu la scusse plui fuarte.

Pes vacjis invecit, si faseve boli simpri scarts di verduris, semule di forment, scussis di fasûi e si otignive chel che a Buje al vignive clamât il “beverum”. Tal noli, che al jere une part de semule dal forment, si infarinave la fuee dal olm par dâle tal laip al purcit, dulà che une bande si meteve la robe sute e di chê âlte chê bagnade. Ricuardìn che si lave in latarie a cjoli il sîr pal purcit e si dave da bevi ancje l’aghe di crostis dopo che e jere stade doprade par lavâ la massarie. Il pan vecjo, cuant che al vanzave, nol vignive mai butât vie.

Si faseve il pan gratât, si dropave par fâ la panade o lis sopis, fetis di pan rustît tal vueli dopo vêlu passât intun compost di ros d’ûf, zucar e lat e insiorât cul zucar par sore o ben cul vin che al vignive fat boli par fâ brusâ l’alcul che al jere dentri. Lis fetis dal pan a vignivin ancje metudis su pal for a brustulî e po dopo si lis pestave cul pestel par podë fâ la panade ai frutins plui piçui. Ricuardìn ancje che se une robe di mangjâ a colave par cjere, no si veve mai di butâle vie ma dome di soflâ par sore e po mangjâle. Par judâ i fruts che a fasevin fadie a mangjâ, disevin ancje che, se no si finive dut ce che si veve intal plat, si varès fat vaî la Madonute e par rispiet a chê sante femine, nissun frut al olsave straçâ il mangjâ.

la cjarte

La cjarte a coventave par impiâ il fûc. Si fasevin dai fassuts invuluçant te cjarte une grampute di stranc e un pôcs di stecuts di chei fins. Bisugne dî, ad onôr dal vêr, che la int e veve pôcs gjornâi, chei plui cognossûts a jerin la “Vite Catoliche” o la “Stampa Sera” che a Buje e vignive a vendile un frut di San Denêl. Stant che no esisteve la cjarte igjeniche, si meteve da bande chê dai gjornâi, si la fruçave par rindile plui morbide, si taiave in tancj tocs di forme cuadrade e po dopo si la picjave suntun claut intal gabinet che al jere dapît dal curtîl, lontan di cjase.

La cjarte e coventave ancje par conservâ la lane. Si invuluçavin lis mais inte cjarte di gjornâl metint cualchi grignel di pevar e ancje un ramaçut di rosmarin. A disevin che la stampe a salvave la lane dai atacs des tarmis.

la plastiche

La plastiche no esisteve une volte. No jerin nancje lis sportis di plastiche. Par solit si lave a fâ la spese cu lis sportis di sclofis o di tele. Intal negozi dut al jere vendût siolt e partant no ’nd jerin contenitôrs.

il veri

Tes cjasis, une volte, no vevin tantis butliis di veri e chês che a jerin si lis tignive cont di an in an soredut par imbutiliâ il vin. Par lavalis a metevin dentri dai claputs, tocuts di scussis di patatis e un fregul di sitiç, po dopo si veve di resentâ par benin e meti a disgotâlis cul cûl in su. Se si rompeve cualchi plat o cualchi tace, si lave a puartâ i creps intune buse di imbunî come par esempli insom de ferade a Buje.

Une butilie di veri e vignive tignude cont pal vueli. Par solit si lave a comprâlu tal negozi cu la butilie e si faseve messedâ mieç litro di vueli di sem e un cuart di vueli di ulive.

Intai agns ’60 al vignive un om dal Venit a cirî butiliis di veri e cui che al voleve cjapâ un franc, al meteve di bande chês che no i coventavin plui e lis vendeve a di chest om.

un cuc aes curiositâts dal timp dulà che dut al tornave a vivi

Vin dât un cuc, fintremai cumò, ai refudums che o vin di dividi in zornade di vuê cjalant la lôr storie di îr ma spostìn la nestre atenzion ancjemo su altris robis che a tornavin a cjapâ vite o che a rindevin un franc in gracie de inventive dai nestris nonos.

Par vecjo a ’nd jerein mistîrs che vuê no si sintin nancje plui a nomenâ e chescj mistîrs a tornavin a dâ vite ae robe che no coventave plui.

il peçotâr

Une volte al mês al passave in dutis lis frazions di Buje il peçotâr che al zirave vosant: “Parone, al è il peçotâr a Vile vuê”. Sintint chê clamade, lis feminis a lavin da lui puartant i peçots che jerin masse fruiâts par dropâju vint la cure di dividiju tra chei di coton e chei di lane. Il peçotâr ju pesave e al paiave un tant al chilo ma, se ti lave miôr, ti podeve paiâ cuntune cjicare o une pignate gnove.

Ricuardìn che i peçots a vignivin doprâts par comedâ i vistîts che si rompevin ma ancje par metiju un par sore di chel âti par fâ la tomere dai scarpets.

Il peçotâr al cjapave sù ancje il ram e l’aluminio e la int, par vê un franc, a lave intes discjariis a cirî la robe butade vie. Par cjapâ sù il fier al vignive un om di Tarcint. Stant che nol jere l’aciâr, si dave lis pignatis vecjis di aluminio che a vignivin paiadis plui dal fier. Disevin i vecjos di no lassâ la mangiative dentri tes pignatis di aluminio ma a zontavin ancje che il mangjâ alì al jere plui bon.

il stagnin

Il stagnin al passave di paîs in paîs e si meteve su la place la che al comedave lis pignatis o lis cjacis rotis. Al passave di cjase in cjase a domandâ se a si veve alc di comedâ e po, dopo vê racuelt dut il lavôr, al tacave la zornade.

il gue

Il gue al passave a Buje da râr e par solit al vignive di Resie. A lui si davin fuarfis, curtis e rasôrs di uçâ o ben ancje ombrenis rotis di comedâ. Un dai tancj puest la che si meteve il gue al jere di fûr de gleseute di Sant Josef a Ursinins Piçul.

il pielâr

Par solit a Buje la sabide al passave il pielâr che al vosave: “Vêso piels feminis?”. A lui lis feminis i vendevin la piel dai cunins che e vignive voltade cu la pelice par denti e jemplade di fen par mantignî la forme e po dopo ancje la piel dal farc. Cussì fasint a rivavin adore di vuadagnâ cualchi palanche.

l’om dai vues

Tignint presint che no si butave vie nuie, ricuardìn che al jere un om che al vignive a toli sù i vues plui grues dai anemâi e ju paiave. Cualchi vues di purcit al vignive tignût in cjase e la medole a vignive doprade tant che onzint tes inflamazions.

I vues dal polam invecit, a vignivin metûts sul fûc a brusâ e po dopo si ju pestave cul pestel. Tite de Cuche di Buje al veve insegnât aes feminis di meti tal beveron de vacje une sedon di chescj vues pestâts che a fasevin ben a bestie.

Intal mont dai nestris nonos no jerin tancj fastidis pes scovacis, si cirive di tornâ a fâ vivi dut e di cjatâ un puest just a dutis lis robis, magari cjapant ancje un franc.

Cuant che lis feminis si petenavin, a metevin da bande i cjavei che dopo a vignivin vendûts in cambio di bêçs o ben di fermos, guselis o crics automatics. A jerin zovinis che a spietavin di vê i cjavei luncs par vendiju e cui becins metûts da bande si fasevin il coredo.

Se un pâr di scarpets al jere consumât dal dut cence plui sperance di podê jessi doprât, no si butave te discjarie ma, dut ce che si podeve brusâ, al vignive metût sul fûc.

Fasìn ancjemò un esempli di cemût che une robe a podeve vê cetantis vitis. Il sarturc al dave la blave par podê fâ la polente. La panole jere scuasit une plante magjiche parcè che nuie al lave strassât. Lis fueis plui bielis a vignivin metudis da bande par rinovâ il paion (il materas di une volte fat di fueis di panolis), par impaiâ cjadreis e par fâ sportis.

La sede de panole e vignive metude a secjâ e doprade per fâ un decot diuretic. Une volte sgranât il sorc, il panoglon al coventave par impiâ il fûc cunsiderât che al faseve une biele bore o ben al vignive dât ai frutins par che a podessin zuiâ a fâ la tor plui alte metintju incrosâts a doi a doi, un sore chel altri.

Par impiâ il fûc si dopravin ancje lis scjanussis di soreâl. Une volte taiadis intal cjamp, a vignivin metudis intal trasêf. Lis vacjis a mangiavin la fuee dal soreâl lassant dome il baston che si taçave cul curcjel, une sorte di massanc, par podê scjerni la vacje.

Ancje la cinise e tornave cont pal fat che, une volte passade par benin, si la meteve inta l’aghe par fâ la lissive e lavâ cussì la blancjarie che avignive monde e nete. Une fuee di orâr metude dentri inte cjalderie e dave il bon profum.

Cuant che si scovave la cjase, lis scovadicis si butavin intal ledan ma ricuardaitsi di no scovâ la cjase di sere parcè che i vecjos a disevin che sidinò si parave fûr la fortune e la bondance e si lassave il puest ae miserie.

Da dut chel che a fasevin i nestris vecjos, di sigûr rivarìn a imparâ alc e ricuardinsi che, come che à det une none di Buje, "une volte al jere un mont plui pulît!"