| Tre madais par Tina Modotti di Gianfranco Ellero | |
| Tre madais par Tina Modotti di Gianfranco Ellero | |
| Dopo vê interpretât la personalitât di Pier Paolo Pasolini cun tune madae fondude tal 1995, stampade su "Buje pore nuje!" dal an passât, Arnaldo Baldassi al presente, par Sant'Osèf '98, un tritic su Tina Modotti, dal sigûr la furlane plui famose tal mont. Lui al restà striât des fotografiis di Tina, e Chei di Ursinins Pizzul 'a restarin incantesemâz devant dai bronz che lui al gjavà fûr dal so cûr recuardant la lûs e lis ombrenis fermadis de fotografe. 'E je la prime volte ch'e si fasin madais par ricuardâ la Modotti, nassude tal 1896 di une pùare famèe di Udin, ch'a viveve al 113 dal Borc di Praclûs, e 'a murì a Citât dal Messico tal 1942. Di frute 'a ere stade par vot ains a Klagenfurt, e di frutate a Udin, fin al 1913, co 'a lè in Meriche a vivi e lavorâ cun so pari, partît tal 1905. La sô vite di modiste, di atore di teatro, di atore di cine, di fotografe, di rivoluzionarie, di amìe dai pitôrs muralisc' messicans, di dirigjente dal Socors Ros, di infermiere te uere di Spagne, 'a è une strade simpri plui lusinte, ch'a passe par San Francisco, Los Angeles, Citàt dal Messico, Berlin, Mosca, Parigi, Madrid... Ma Tina 'e à un puest impuartant te storie de art fotografiche dome pal so ingèn, pe sô sensibilitât, pe sô creativitât, ch'aj permetevin di viodi la poesie tes formis sculpidis de lûs dal soreli. Al ere just recuardâle ancje in Friûl cul lengaz de art, no dome cun libris e, masse di spes, cun cjacaris e polemichis. Il pitôr Ermis Gazziero al fasè un quadri a vueli cjalant une fotografie di Weston, che mostre Tina sentade su la puarte de lôr cjase a Citât dal Messico, e qualchi altri al rapresentâ la so bielissime muse cun tune sculture. Ma nissun, prime di vuei, al veve pensât tre madais par ilustrâ la sô vite. E sicome il tritic al nassè a Buje, si puès domandâsi se Tina 'a veve qualchi leamp cun cheste citât di madaìsc'. Premetùt che Baldassi al creà lis madais dome par resons di amôr e di estetiche, al è biel podê scrivi che une sutile lidrîs, fra Tina e Buje, si rive a cjatâle! Tina 'e jere gnece di Pietro Modotti, o Pieri Modot come che lu clamavin a Udin, fotografo di lusso fin dai ultins ains dal Votcent. In prin al veve viart un studi in Borc di Vilalte, e plui tart in vie Carducci, dulà ch'al dave lezions a pajament a Silvio Maria Bujatti, Marcello De Monte e âtris zovins ch'a volevin imparâ il mistîr. Al è probabil ch'al sedi lât a scuele di Pieri o Modot, ma qualchi an prime di Bujatti e De Monte, ancje Giovanni Domenico D'Aita. Se cussì nol fos no si capirès parcè che il barbe di Tina al tignì a batìsin Iris D'Aita tal istât dal 1903, e un pâr di mês plui tart duc' e doi 'a forin premiâz te famôse esposizion regionâl di Udin. Pieri al vuadagnà la "menzione onorevole", il fotografo di Buje il "diploma di medaglia di bron zo", ch'al fo dat ancje a Cesare Turrin di Tarcint, a Bianca di Prampero di Udin e a Edoardo Strudthoff di Triest. (Pieri Modot al ere clamât di spes a fotografâ dal cont Antunin Prampar, senatôr e organisadôr de esposizion... ). Cjalìn, cumò lis madais. Sul recto de prime Tina 'a comparìs di tre cuarz come tune maraveose fotografie di Johan Hagemeyer, che si puès amirâ ta un dai libris segnalâz te bibliografie. D verso al presente in biei volums plastics i simbui de rivoluzion messicane, tirâz-ju di une famose fotografie di Tina. La seconde 'a ricuarde la grande rriostre di Villa Varda di Brugnera, metude-su di Cinemazero di Pordenon par celebrâ il cincuantenari de muart tal 1992. Sul recto si viodin i cjapiei dai campesinos, sul verso lis "calla lilies", rigjavadis di dôs classichis fotografiis di Tina. La tierce, dedicade ae Cineteca del Friuli di Glemone, 'a conte la scuvierte di une copie dal film "The tiger's coat", un dai tre interpretâz di Tina fra il 1920 e il 1922, par man di Livio Jacob tal 1988. In chest câs Baldassi al fasè une composizion cun figuris tiradis-jù de pelicule e dai manifesc' stampâz pe publicitât dal film. La prime madae 'a presente Tina come persone e come fotografe ideologiche. La seconde nus permet di viòdile in vieste di fotografe estetiche. La tierce la pant come femine di grande bielece e atore di cine. Un tritic di grande fuarce espressive e di alt significât culturâl, ch'al fâs onôr a Baldassi e a Chei di Ursinins Pizzul.
BIBLIOGRAFIE |
