'E je une furtune di Diu che un omp al puedi cjantâ la nature e la vite, la sô tiere e la sô int, i sintimenz profonz che j sgripìin par dentri e i lamps di belece che j flurissin des mans. Tarcisio Baldas lu à fat prin di dut cul obietîf e po ancje cu la peraule e al é deventât testemoni dal nestri timp, vuardian dal nestri passât, presince di une storie vivude e di une civiltât ch'o sintìn cun tante nostalgje. Buje, la culine furlane, il Friûl intîr j son obleâz une vôre.

Al à savùt cumbinâ tecniche e poesie, une tecniche native, cun miez fotografícs plui sèmpliz e mancul sufisticâz di cumò par dânus risultâz di grande puritât e armonie. Tarcisio nus cjape par man e nus conte la storie di un paîs furlan, simbul di tanc' âtris paîs de Pizzule Patrie, inmaneâz ta chê stesse vite e ta chê stesse flabe di dolôr e di amôr, di puaretât e di dignitât, di fadie e di ligrie. II so voli al eterne i nûi e il sorêli, la fluridure de vierte, il cjant des cjampanes di sagre, i fruz e i granc' te vendeme, les cjapes di soreâl speglades te Ledre slargjade pai cjamps deventâz celesc' cu les monz a cjâf in jù.

Paron dal blanc e neri e plui indevant dal colôr, l'artist dal obietîf al va sù pes culines, si rimpine pes monz fîn tes Dolomites dai Ladins di miez e al filtre ombres e tonalitâz, al stampe fígures e panoramiches, al ricuei momenz di cròniche umile e sante. E quanche al torne in cjase i afíez familiârs lu sburtin a fotografâ maternitâz te curnîs dal cîl e dal vert, in tun ajar mont e net, ch'al lustre i sintimenz e ju insuage te vite dal Dut.

Al è il Friûl di dopo de prime vuere fin al Corante, il Friûl de riviste La Panarie di Chino Ermacora, chel Friûl ch'al plaseve a Diego Valeri, a Manara Valgimigli, a Ottavio Valero, a Enrico Fruch, a Pieri Menis, a Enrico Ursella. Al ere un Friûl che cui soi semenadôrs, cui soi bûs ch'e tìrín la vuargine, cui vignâi lusinz di raps e di bàmpui, cun tanc' fruz ch'e rìdevin tal sorêli cu les manutes altes e i vôi clârs di innocenze, cul so forment palomp.

Chel Friûl artesan, contadin, religjôs e un pôc patriotic, chel Friûl che nus à dât Stelutis aìpmis, il Cjant di Aquilee, In chê sere. Si à masse spudât su chel Friûl arcaic e si à volût sconfondi dut cun tune ditature demonizade forsit plui di ce ch'e jere di fat. Jo, ch'o eri frut, 'o sai che ancje a chei timps 'o erin contenz e ambizionôs di jessi Furlans e di fevelâ par fur-lan. E dopo 'e jé vignude la tragjedie mondiâl dal secont at, piês dal prin. E Baldas al à notât dut cu la sô Leika. Vuê al é sul atôm, sui cuêi di Buje, un arbul cjamât di tantes pomes, buines e ch'e duraràn. Al è Tarcisio Baldàs.

Discors let a Buje te salc consiliâr in ocasion dc presentazion dal libri cdit de Aministrazion comunâl: G. ELLERO, Tarcisio Baldassi fotografo 1927-1976, Buje 1988, pp. 157.